Seksiyon 137
Usa ka panan-awon gihatag ngadto ni Joseph Smith ang Propeta, sa templo sa Kirtland, Ohio, Enero 21, 1836. Ang higayon mao ang pagpangalagad sa mga ordinansa agi og pagpangandam alang sa pagpahinungod sa templo.
1–6, Ang Propeta nakakita sa iyang igsoong lalaki nga si Alvin didto sa celestial nga gingharian; 7–9, Ang doktrina sa kaluwasan alang sa mga patay gipadayag; 10, Ang tanang bata maluwas didto sa celestial nga gingharian.
1 Ang kalangitan naabli ngari kanamo, ug nakita nako ang celestial nga gingharian sa Dios, ug ang himaya niini, kon dinhi man sa lawas o gawas sa lawas ako dili makasulti niini.
2 Nakita nako ang talagsaon nga katahom sa ganghaan diin mosulod ang mga manununod sa gingharian, nga daw sama sa nagtuyok nga mga siga sa kalayo;
3 Usab ang mahimayaon nga trono sa Dios, diin naglingkod ang Amahan ug ang Anak.
4 Nakita nako ang matahom nga mga dalan niana nga gingharian, nga may panagway nga sementadong bulawan.
5 Nakita nako ang Amahan nga si Adan ug si Abraham; ug ang akong amahan ug ang akong inahan; ang akong igsoong lalaki nga si Alvin, nga dugay nang namatay;
6 Ug natingala ko kon sa unsang paagi siya nakabaton og panulondon niana nga gingharian, kay mibiya siya niini nga kinabuhi sa wala pa ang Ginoo makapahimutang sa iyang kamot aron sa pagpundok sa Israel sa ikaduha nga higayon, ug wala pa mabunyagi alang sa kapasayloan sa mga sala.
7 Sa ingon niana miabot ang tingog sa Ginoo ngari kanako, nga nag-ingon: Ang tanang namatay nga wala makahibalo niini nga ebanghelyo, kinsa modawat unta niini kon gitugotan pa sila sa pagpabilin, mahimong mga manununod sa celestial nga gingharian sa Dios;
8 Usab ang tanang mamatay sukad karon nga wala mahibalo niini, kinsa modawat unta niini sa tibuok nilang kasingkasing, mahimong manununod niana nga gingharian;
9 Kay ako, ang Ginoo, mohukom sa tanang tawo sumala sa ilang binuhatan, sumala sa tinguha sa ilang mga kasingkasing.
10 Ug nakita usab nako nga ang tanang bata nga namatay sa wala pa sila moabot sa panuigon sa pagkamay-tulubagon maluwas diha sa celestial nga gingharian sa langit.