1 Sikieni, Enyi mbingu, na tega sikio, Ewe nchi, na shangilieni ninyi wakazi wake, kwa kuwa Bwana ndiye Mungu, na zaidi yake yeye hapana Mwokozi.

2 Hekima yake ni kuu, njia zake ni za ajabu, na hakuna awezaye kuona upana wa matendo yake.

3 Makusudi yake hayashindwi, wala hakuna awezaye kuzuia mkono wake.

4 Tangu milele hata milele yeye ni yule yule, na miaka yake haikomi.

5 Kwani hivyo ndivyo asemavyo Bwana—Mimi, Bwana, ni mwenye huruma na neema kwa wale wote wanichao, na napenda kuwaheshimu wale wote ambao hunitumikia katika haki na kweli hata mwisho.

6 Tuzo lao litakuwa kuu na utukufu wao utakuwa wa milele.

7 Na kwao nitafunua siri zote, ndiyo, siri zote za ufalme zilizofichwa tangu siku za kale, na za zama zijazo, nitawafahamisha uradhi wa mapenzi yangu yanayohusu mambo yote ya ufalme wangu.

8 Ndiyo, hata maajabu ya milele watayajua, na mambo yajayo nitawaonyesha, hata mambo ya vizazi vingi.

9 Na hekima yao itakuwa kuu, na ufahamu wao utafika mbinguni; na mbele zao akili za watu wenye akili zitapotea, na ufahamu wa wenye busara utafichwa.

10 Kwani kwa Roho wangu nitawaangaza, na kwa uwezo wangu nitawajulisha siri za mapenzi yangu—ndiyo, hata mambo yale ambayo jicho halijayaona, wala sikio kusikia, wala hayajaingia katika moyo wa mwanadamu.

11 Sisi, Joseph Smith, Mdogo, na Sidney Rigdon, tukiwa katika Roho tarehe kumi na sita ya Februari, katika mwaka wa Bwana wetu elfu moja mia nane na thelathini na mbili—

12 Kwa uwezo wa Roho macho yetu yalifunguliwa na ufahamu wetu ukatiwa nuru, nasi tukaona na kuyaelewa mambo ya Mungu—

13 Hata mambo yale yaliyokuwa mwanzo kabla ya ulimwengu kuwako, yaliyowekwa na Baba, kupitia Mwanawe wa Pekee, ambaye alikuwa kifuani mwa Baba, hata kutoka mwanzo;

14 Ambaye sisi tunamshuhudia; na ushuhuda tunaoutoa ni utimilifu wa injili ya Yesu Kristo, ambaye ndiye Mwana, tuliyemwona na ndiye tuliyeongea naye katika ono la mbinguni.

15 Kwani wakati tulipokuwa tukifanya kazi ya kutafsiri, ambayo Bwana alitupangia, tulikuja kwenye mstari wa ishirini na tisa wa mlango wa tano wa Yohana, ambayo ilitolewa kama ifuatavyo—

16 Ukizungumzia juu ya ufufuko wa wafu, kuhusu wale watakao isikia sauti ya Mwana wa Mtu:

17 Na watatoka; wale waliofanya mema, kwa ufufuo wa wenye haki; na wale waliotenda uovu, kwa ufufuo wa wasio na haki.

18 Sasa hili lilitufanya sisi tustaajabu, kwa kuwa lilitolewa kwetu na Roho.

19 Na wakati tukitafakari mambo haya, Bwana aligusa macho ya ufahamu wetu nayo yakafunguka, na utukufu wa Bwana ukangʼaa pande zote.

20 Nasi tukauona utukufu wa Mwana, akiwa mkono wa kuume wa Baba, na kupokea utimilifu wake;

21 Na tukawaona malaika watakatifu, na wale waliotakaswa mbele ya kiti chake cha enzi, wakimwabudu Mungu, na Mwanakondoo, ambao humwabudu yeye milele na milele.

22 Na sasa, baada ya ushuhuda mwingi uliokwisha kutolewa juu yake, huu ni ushuhuda, wa mwisho wa zote, ambao tunautoa juu yake: Kwamba yu hai!

23 Kwani tulimwona, hata mkono wa kuume wa Mungu; na tukasikia sauti ikitushuhudia kuwa yeye ndiye Mzaliwa Pekee wa Baba—

24 Kwamba kwa yeye, na kwa njia yake, na kutoka kwake, dunia zipo na ziliumbwa, na waliomo ni wana na mabinti wa Mungu.

25 Na hii tuliona pia, na tunalishuhudia, kwamba malaika wa Mungu aliye kuwa mwenye mamlaka katika uwepo wa Mungu, ambaye aliasi dhidi ya Mwana Pekee ambaye Baba alimpenda na ambaye alikuwa katika kifua cha Baba, alitupwa chini kutoka katika uwepo wa Mungu na Mwana,

26 Na aliitwa Mpotevu, kwa kuwa mbingu zililia juu yake—alikuwa Lusiferi, mwana wa asubuhi.

27 Nasi tuliona, na lo, ameanguka! ameanguka, hata yule mwana wa asubuhi!

28 Na wakati tukiwa bado katika Roho, Bwana alituamuru kuwa tuliandike ono hili; kwani tulimwona Shetani, yule nyoka wa zamani, aitwaye ibilisi, ambaye alimwasi Mungu, na anataka kuutoa ufalme wa Mungu wetu na Kristo wake—

29 Kwa hiyo, yeye hufanya vita na watakatifu wa Mungu, na kuwazingira.

30 Na tuliona ono la mateso ya wale ambao alifanya vita nao na kuwashinda, kwani hivi ndivyo sauti ya Bwana ilikuja kwetu:

31 Hivyo ndivyo asemavyo Bwana kuhusu wale wote wanaojua uwezo wangu, na kufanywa washiriki wake, na wakaruhusu uwezo wa ibilisi uwashinde, na kuukana ukweli na kuukataa uwezo wangu—

32 Hao ndiyo walio wana wa upotevu, ambao ndiyo nisemao kuwa ingekuwa heri kwao kama wasingalizaliwa;

33 Kwani wao ni vyombo vya ghadhabu, vilivyohukumiwa kuteseka kwa ghadhabu ya Mungu, pamoja na ibilisi na malaika zake milele;

34 Kuhusu niliyemsema hakuna msamaha katika ulimwengu huu wala katika ulimwengu ujao—

35 Akiwa amemkana Roho Mtakatifu baada ya kumpokea, na kumkana Mwana Pekee wa Baba, kwa kuwa wanamsulubisha kwa nafsi zao na kumfedhehesha kwa dhahiri.

36 Hawa ndiyo wale ambao watakwenda katika ziwa la moto na kiberiti, pamoja na ibilisi na malaika zake—

37 Na hao ndiyo pekee ambao mauti ya pili yatakuwa na uwezo juu yao;

38 Ndiyo, amini, hao ndiyo pekee ambao hawatakombolewa wakati wa Bwana ufikapo, baada ya kuteseka kwa ghadhabu yake.

39 Kwani wote waliobakia watarejeshwa kwa ufufuko wa wafu, kwa ushindi na utukufu wa Mwanakondoo, aliyechinjwa, aliyekuwa katika kifua cha Baba kabla ya dunia hazijaumbwa.

40 Na hii ndiyo injili, habari njema, ambayo sauti kutoka mbinguni ilitushuhudia—

41 Kwamba alikuja duniani, hata Yesu, ili kusulubiwa kwa ajili ya ulimwengu, na kuchukua dhambi za ulimwengu, na kuutakasa ulimwengu, na kuusafisha kutokana na udhalimu wote;

42 Ili kupitia kwake yeye wote wapate kuokolewa wale ambao Baba aliwaweka katika uwezo wake na kuumbwa naye;

43 Yule amtukuzaye Baba, na kuokoa kazi zote za mikono yake, isipokuwa wale wana wa upotevu wanaomkana Mwana baada ya Baba kumfunua.

44 Kwa hiyo, yeye huwaokoa wote isipokuwa wao—watakwenda zao kuingia katika adhabu isiyo na mwisho, ambayo ni adhabu bila mwisho, ambayo ni adhabu ya milele, kutawala na ibilisi na malaika wake milele, mahali ambamo funza wao hawafi, wala moto hauzimiki, ambayo ndiyo mateso yao—

45 Na mwisho wake, wala mahali pake, wala mateso yao, hakuna mwanadamu ajuaye;

46 Wala haikufunuliwa, wala haifunuliwi, na wala haitafunuliwa kwa mwanadamu, isipokuwa kwao wao washiriki wake;

47 Hata hivyo, Mimi, Bwana, nawaonyesha wengi kwa ono, lakini nafunga tena mara moja;

48 Kwa hiyo, mwisho, upana, urefu, kina na uchungu wake, hawaufahamu, wala hapana mtu yeyote isipokuwa wale waliotawazwa kwa hukumu hii.

49 Na tulisikia sauti ikisema: Andikeni ono hili, kwani lo, huu ndiyo mwisho wa ono la mateso ya wasiomcha Mungu.

50 Na tena, tunatoa ushuhuda—kuwa tuliona na kusikia, na huu ni ushuhuda wa injili ya Kristo kuhusu wao watakaotokea katika ufufuko wa wenye haki—

51 Hawa ni wale ambao wameupokea ushuhuda wa Yesu, na kuliamini jina lake, na wakabatizwa kwa jinsi ya kuzikwa kwake, kwa kuzikwa majini katika jina lake, na hii ni sawa na amri ambazo amezitoa—

52 Kwa kushika amri waweze kuoshwa na kusafishwa kutokana na dhambi zao zote, na kumpokea Roho Mtakatifu kwa kuwekewa mikono na yule ambaye ametawazwa na kufungwa kwa uwezo huu;

53 Na ambaye hushinda kwa imani, na kutiwa muhuri na Roho Mtakatifu wa ahadi, ambaye Baba humpeleka juu ya wale wote walio haki na kweli.

54 Hawa ndiyo wale walio wa kanisa la Mzaliwa wa Kwanza.

55 Hawa ndiyo wale ambao Baba amewapa vitu vyote mikononi mwao—

56 Hawa ndiyo wale walio makuhani na wafalme, ambao wamepokea utimilifu wake, na utukufu wake;

57 Na ni makuhani wa Aliye Juu Sana, kwa mfano wa Melkizedeki, ambaye alikuwa kwa mfano wa Henoko, ambaye alikuwa kwa mfano wa Mwana Pekee.

58 Kwa hiyo, kama vile ilivyoandikwa, wao ndiyo miungu, hata wana wa Mungu—

59 Kwa hiyo, vitu vyote ni mali yao, iwe uzima au mauti, au vile vilivyopo, au vile vitakavyo kuwepo, vyote ni vyao nao ni wa Kristo, na Kristo ni wa Mungu.

60 Nao watavishinda vitu vyote.

61 Kwa sababu hii, mtu yeyote na asijisifie mwanadamu, bali na ajisifie katika Mungu, ambaye atawaweka maadui zake wote chini ya miguu yake.

62 Hawa watakaa katika uwepo wa Mungu na Kristo wake milele na milele.

63 Hawa ndiyo wale watakaokuja pamoja naye, wakati akija na mawingu ya mbinguni kutawala dunia na watu wake.

64 Hawa ndiyo wale watakao kuwa na sehemu katika ufufuo wa kwanza.

65 Hawa ndiyo wale watakao toka katika ufufuo wa wenye haki.

66 Hawa ndiyo wale walioufikia Mlima Sayuni, na mji wa Mungu aliye hai, mahali pa mbinguni, patakatifu pa patakatifu.

67 Hawa ndiyo wale ambao wamefikia majeshi ya malaika yasiyo hesabika kwa mkutano mkuu na kanisa la Henoko, na la Mzaliwa wa Kwanza.

68 Hawa ndiyo wale ambao majina yao yameandikwa mbinguni, mahali ambako Mungu na Kristo ni waamuzi wa wote.

69 Hawa ndiyo wale watu wenye haki waliokamilishwa kwa njia ya Yesu aliye mpatanishi wa agano jipya, aliye kamilisha upatanisho huu mkamilifu kwa njia ya umwagikaji wa damu yake yeye mwenyewe.

70 Hawa ndiyo wale ambao miili yao ni ya selestia, ambayo utukufu wake ni ule wa jua, hata utukufu wa Mungu, wa juu kuliko wote, utukufu ambao umeandikwa ukifananishwa kama mwangaza wa jua la angani.

71 Na tena, tuliona ulimwengu wa terestria, na tazama na lo, hawa ndiyo wale ambao ni wa terestria, ambao utukufu wao ni tofauti na wale wa kanisa la Mzaliwa wa Kwanza ambao wameupokea utimilifu wa Baba, hata kama ule wa mwezi unavyo tofautiana na jua la angani.

72 Tazama, hawa ndiyo wale ambao walikufa pasipo na sheria;

73 Na pia ndiyo roho za watu waliowekwa kifungoni, ambao Mwana aliwatembelea, na kuwahubiria injili, ili kwamba wahukumiwe katika mwili kama wahukumiwavyo wanadamu;

74 Na ni wale ambao hawakuupokea ushuhuda wa Yesu katika mwili, lakini baadaye waliupokea.

75 Hawa ndiyo wale ambao ni watu wenye kuheshimiwa duniani, ambao walipofushwa kwa ujanja wa wanadamu.

76 Hawa ndiyo wale ambao hupata utukufu wake, lakini siyo utimilifu wake.

77 Hawa ndiyo wale ambao hupata uwepo wa Mwana, lakini siyo utimilifu wa Baba.

78 Kwa hiyo, wana miili ya terestria, na siyo miili ya selestia, na hutofautiana katika utukufu kama vile mwezi unavyo tofautiana na jua.

79 Hawa ndiyo wale ambao si majasiri katika ushuhuda wa Yesu; kwa hiyo, hawatapokea taji la utukufu wa ufalme wa Mungu wetu.

80 Na sasa huu ndiyo mwisho wa ono ambalo tuliliona la miili ya terestria, ambalo Bwana alituamuru sisi kuandika wakati tulipokuwa bado katika Roho.

81 Na tena, tuliona utukufu wa telestia, ambao ni utukufu ulio mdogo, kama vile utukufu wa nyota unavyo tofautiana na ule utukufu wa mwezi katika anga.

82 Hawa ndiyo wale ambao hawakuipokea injili ya Kristo, wala ushuhuda wa Yesu.

83 Hawa ndiyo wale ambao hawamkatai Roho Mtakatifu.

84 Hawa ndiyo wale watupwao chini jehanamu.

85 Hawa ndiyo wale ambao hawatakombolewa kutoka kwa ibilisi hadi ufufuo wa mwisho, hadi Bwana, hata Kristo Mwanakondoo, atakapomaliza kazi yake.

86 Hawa ndiyo wale ambao hawapokei utimilifu wake katika ulimwengu wa milele, ila wa Roho Mtakatifu kwa njia ya huduma ya terestria;

87 Na wa terestria kwa njia ya huduma ya selestia.

88 Na pia wa telestia hupata kuhudumiwa na malaika ambao wameteuliwa kwa ajili ya kuwahudumia wao, au wale ambao huteuliwa kuwa roho watumikao kwa ajili yao; kwa kuwa watakuwa warithi wa wokovu.

89 Na hivi tuliona, katika ono la mbinguni, utukufu wa telestia, ipitayo akili zote;

90 Na hakuna mtu ajuaye isipokuwa yule ambaye Mungu amemfunulia.

91 Na hivi tuliona utukufu wa terestria iizidiyo katika kila kitu utukufu wa telestia, hata katika utukufu, na katika uwezo, na katika nguvu, na katika utawala.

92 Na hivi tuliona utukufu wa selestia, ukizidi nyingine katika vitu vyote—mahali ambapo Mungu, hata Baba, hutawala juu ya kiti chake cha enzi milele na milele;

93 Ambaye mbele ya kiti chake cha enzi vitu vyote husujudu kwa upole na unyenyekevu, na kumpa yeye utukufu milele na milele.

94 Wale waishio katika uwepo wake ni wa kanisa la Mzaliwa wa Kwanza; nao huona kama wanavyoonekana, na kujua kama wanavyojulikana, wakiwa wamepokea utimilifu wake na neema yake;

95 Naye huwafanya kuwa sawa katika uwezo, na katika nguvu, na katika utawala.

96 Na utukufu wa selestia ni moja, kama vile utukufu wa jua ni mbali.

97 Na utukufu wa terestria ni mmoja, kama vile utukufu wa mwezi ni mbali.

98 Na utukufu wa telestia ni mmoja, kama vile utukufu wa nyota ni moja; maana iko tofauti ya utukufu hata kati ya utukufu wa nyota na nyota katika ulimwengu wa telestia.

99 Kwani hawa ndiyo wale ambao ni wa Paulo, na Apolo, na wa Kefa.

100 Hawa ndiyo wale ambao husema kuna wale wa huyu na wengine wa mwingine—wengine wa Kristo na wengine wa Yohana, na wengine wa Musa, na wengine wa Elia, na wengine wa Esaya, na wengine wa Isaya, na wengine wa Henoko;

101 Lakini hawakuipokea injili, wala ushuhuda wa Yesu, wala manabii, wala agano lisilo na mwisho.

102 Mwisho wa wote, hawa wote ni wale ambao hawatakusanywa pamoja na watakatifu, kulakiwa kwenye kanisa la Mzaliwa wa Kwanza, na kupokelewa mawinguni.

103 Hawa ndiyo wale waongo, na wachawi, na wazinzi, na makahaba, na yeyote apendaye na kufanya uwongo.

104 Hawa ndiyo wale ambao huteseka kwa ghadhabu ya Mungu duniani.

105 Hawa ndiyo wale ambao huadhibiwa kwa moto wa milele.

106 Hawa ndiyo wale ambao hutupwa chini jehanamu na kuteseka na ghadhabu ya Mwenyezi Mungu, hadi wakati mtimilifu, wakati Kristo a takapowaweka maadui zake wote chini ya miguu yake, na kukamilisha kazi yake;

107 Wakati atakapoutoa ufalme, na kuukabidhi kwa Baba, pasipo doa, akisema: Nimeshinda na nalikanyaga kinu peke yangu, hata kinu cha kushindikia mvinyo wa ghadhabu ya Mwenyezi Mungu.

108 Ndipo atakapovikwa taji la utukufu wake, na kukaa juu ya kiti cha enzi ya uwezo wake na kutawala milele na milele.

109 Lakini tazama, na lo, tuliona utukufu na wakazi wa ulimwengu wa telestia, kwamba walikuwa hawahesabiki kama vile nyota katika anga la mbingu, au kama mchanga ulio ufukoni mwa bahari;

110 Na tulisikia sauti ya Bwana ikisema: Hawa wote watapiga magoti, na kila ulimi utakiri kwake aketiye juu ya kiti cha enzi milele na milele;

111 Kwani watahukumiwa kulingana na matendo yao, na kila mtu atapokea kulingana na matendo yake, na utawala wake, katika makao yaliyotayarishwa;

112 Nao watakuwa watumishi wa Aliye Juu Sana; lakini mahali Mungu na Kristo wakaapo hawawezi kuja, milele na milele.

113 Huu ni mwisho wa ono ambalo tuliliona, ambalo tuliamriwa kuliandika wakati tulipokuwa bado katika Roho.

114 Lakini ni makuu na ya ajabu matendo ya Bwana, na siri za ufalme wake ambazo alizionyesha kwetu, ambazo hupita akili zote katika utukufu, na katika nguvu, na katika utawala;

115 Ambayo alituamuru tusiyaandike wakati tulipokuwa tungali katika Roho, na ambayo hajaruhusu mwanadamu ayanene;

116 Wala mwanadamu hawezi kuyafunua, kwani ni ya kuonwa tu na kueleweka kwa uwezo wa Roho Mtakatifu, ambaye Mungu huwapa wale wampendao, na kuwatakasa mbele zake;

117 Hao huwapa heshima hii ya kuona na kutambua wenyewe;

118 Ili kwa njia ya uwezo na mafunuo ya Roho, wakati wakiwa katika mwili, waweze kustahili uwepo wake katika ulimwengu wa utukufu.

119 Na utukufu, na heshima, na utawala vina Mungu na Mwanakondoo, milele na milele. Amina.