1 Kodi tsinde la Jese likunenedwa mu ndime 1, 2, 3, 4 ndi 5 ya mutu 11 wa Yesaya ndi chiyani?

2 Indetu akutero Ambuye: Ndi Khristu.

3 Kodi ndodo ikunenedwa mu ndime yoyamba ya mutu 11 wa Yesaya, imene ikuyenera kudzachokera ku tsinde la Jese ndi chiyani?

4 Taonani, akutero Ambuye: ndi mtumiki mu manja a Khristu, amene mbali ina ali mbadwa ya Jese komanso ya Efraimu, kapena wa nyumba ya Yosefe, amene mwa iye mwaikidwa mphamvu zambiri.

5 Kodi muzu wa Jese wonenedwa mu ndime 10 ya Mutu 11 ndi chiyani?

6 Taonani, akutero Ambuye, ndi mbadwa ya Jese, komanso ya Yosefe, kwa imene kuli koyenera unsembe, ndi mafungulo a ufumu, ngati mbendera, ndi pa kusonkhanitsa kwa anthu anga mu masiku otsiriza.

7 Mafunso a Elias Higbee: Kodi chikutanthauzanji za lamulo mu Yesaya, mutu 52, ndime 1, imene ikuti: Vala mphamvu zako, O Ziyoni—ndi anthu ati amene Yesaya adali kunena?

8 Iye adafanizira kwa iwo amene Mulungu akuyenera kuwaitana mu masiku otsiriza, amene akuyenera kukhala ndi mphamvu ya unsembe yakubweretsanso Ziyoni, ndi chiwombolo cha Israeli; ndipo kuvala mphamvu yake ndi kuvala ulamuliro wa unsembe, umene iye, Ziyoni, ali ndi ufulu wake mwa umbadwa; komanso kubwelera ku mphamvu iyo imene iye adaitaya.

9 Kodi tikuyenera kumvetsa chiyani za Ziyoni kudzimasula yekha ku maunyolo apakhosi lake; ndime 2?

10 Tikuyenera kumvetsa kuti otsalira obalalitsidwa akulimbikitsidwa kubwelera kwa Ambuye kuchokera kumene iwo adagwera; zimene ngati angachite, lonjezo la Ambuye ndilakuti iye adzayankhula kwa iwo, kapena kuwapatsa iwo vumbulutso. Onani ndime 6, 7 ndi 8. Maunyolo apakhosi lake ndi matembelero a Mulungu pa iye, kapena otsalira a Israeli mu kubalalitsidwa kwawo pakati pa Amitundu.