Ñepyrũmby

Doctrina ha Konveniokuéra ha’e rrevelasiõ divino ha ñemombe’u inspirádo aty, oñeme’ẽva’ekue Tupã rréino oñemoĩ ha oñemohendaporã hag̃ua yvy ape ári ára pahápe. Hetave umi sección ojehaíramo jepe Jesucristo Tupao Santokuéra Ára Pahapegua miembro-kuérape, umi ñemomarandu, ñemoñe’ẽ ha ñemokyre’ỹ ha’e opa yvypóra ñeimeporãrã ha oguereko peteĩ ñeipepirũ tavayguakuéra, oparupigua, ohendu hag̃ua Ñandejára Jesucristo ñe’ẽpu, oñe’ẽva chupekuéra iñeimeporãrã ko yvy ári, ha isalvasiõ opave’ỹvape g̃uarã.

Hetave umi rrevelasiõ ko ñembyatýpe oñemog̃uahẽva’ekue José Smith, upe ta’ýra rupive, Jesucristo Tupao Santokuéra Ára Pahapegua proféta ha presidente peteĩha. Ambuéva oñeme’ẽ umi hapykuerigua Presidencia-pe rupive (tojehecha D&K 135, 136, ha 138 moñepyrũ, ha umi Declaración Oficial 1 ha 2).

Doctrina ha Konveniokuéra kuatiañe’ẽ ha’e peteĩva umi tembiapo kanóniko Tupaogua, Santa Biblia, Mormón Kuatiañe’ẽ ha Pérla Hepyetéva ndive. Upevére, Doctrina ha Konveniokuéra ijojaha’ỹ, ndaha’éi rupi peteĩ ymaguare jehaipyre ñembohasa, ha katu ha’e ko aragua, ha oñeme’ẽva’ekue Tupãre umi Iproféta poravopyre rupi, oñemoĩjey hag̃ua Hembiapo marangatu ha Tupã rréino oñemopu’ã hag̃ua yvy ári ko árape. Umi rrevelasiõme, oñehendu Jesucristo ñe’ẽ kyrỹi ha katu imbaretéva, oñe’ẽ jeýva dispensasiõ ára oñekumplipaitetahápe; ha tembiapo hendive oñepyrũva ha’e Ijeju Mokõiha ñembosako’irã, oñekumpli hag̃ua opa proféta marangatu ñe’ẽme he’iháicha, múndo ñepyrũmby guive.

José Smith, upe ta’ýra, heñoiva’ekue Diciembre 23, 1805, Sharon, Windsor kondádo, Vermont-pe. Imitãme, ha’e ova umi hogaygua ndive, tenda ko ára ojeheróva Manchester, Nueva York kuarahyreiképe. Ha upépe oiko aja, 1820 arapotýpe, 14 áño orekópe, ha’e ohupytyva’ekue ivisiõ peteĩha, oúrõguare hendápe Tupãite voi, pe Túva Ijapyra’ỹva ha Ta’ýra Jesucristo. Ko visiõme, oje’e chupe Jesucristo Tupao añetegua, oñemoĩva’ekue Nuevo Testamento árape, ha oisãmbyhýva evanhélio plenitu, ndaporiveimaha yvy ári. Ouve ambue techauka divíno ha umívape heta ánhel ohekombo’e chupe; ojehechauka chupe Tupã oguerekoha peteĩ tembiapo ijojaha’ỹva chupe g̃uarã ko yvy ári, ha ha’e rupi, Jesucristo Tupao oñemoĩjeytaha yvy ári.

Ára ohasávo, José Smith ombohasa ha oguenohẽ Mormón Kuatiañe’ẽ pytyvõ divíno rupive. Upéva aja, ha’e ha Oliver Cowdery oñeordena Sacerdocio Aarónico-pe, Juan el Bautista rupive, Mayo 1829-pe (tojehecha D&K 13), ha uperiremi oñeordena avei chupekuéra Melquisedec Sacerdocio-pe, umi Apóstol ymaguare, Pedro, Santiago ha Juan rupive (tojehecha D&K 27:12). Uperire ojejapókuri ambue ordenasiõ, ha umívape, oñeme’ẽ chupekuéra umi lláve sacerdocio rehegua, Moisés, Elías pe profeta, Elías ha heta proféta ymaguare rupive (tojehecha D&K 110; 128:18, 21). Péicha, ko’ã ordenasiõ ha’ékuri pe autorida divina ñemoĩjey yvypórape ko yvy ári. Abril 6, 1830-pe, yvága sãmbyhy guýpe, Proféta José Smith omoñepyrũ pe Tupao, ha péicha, Jesucristo Tupao añetegua, omba’apo jey institusiõ ramo yvyporakuéra apytépe, autorida reheve ombo’e hag̃ua pe evanhélio ha oadministra hag̃ua umi ordenánsa salvasiõ rehegua. (Tojehecha D&K 20 ha Pérla Hepyetéva, José Smith—Tembiasakue 1).

Ko’ã rrevelasiõ marangatu oñemog̃uahẽva’ekue ñembo’e ñembohovái ramo, ára tekotevẽte jave, ha ou tekovepegua tembiasakuéra añetévagui, ojehúva máva añetévape. Pe proféta ha umi hapykuerigua ohekava’ekue ñemoarandu divino, ha ko’ã rrevelasiõ omoañete ohupytyhague hikuái. Umi rrevelasiõme, jahecha Jesucristo evanhélio ñemoĩjey ha jeikuaauka ypy ha pe dispensasiõ ára oñekumplipaitetaha ñepyrũmby. Ko’ã rrevelasiõme ojeikuaauka avei pe Tupao ñemopu’ã oeste gotyo, Nueva York ha Pensilvania guive, Ohio, Misuri, Ilinois, ha ipahaite, pe Gran Cuenca del oeste de los Estados Unidos-pe, ha péicha avei Santokuéra rembiapo guasuete oñeha’ãvo omopu’ã Sion yvy ári ára ko’ág̃aguápe.

Heta sección iñepyrũmegua ha’e Mormón Kuatiañe’ẽ ñembohasa ha ñeguenohẽ rehegua (tojehecha umi sección 3, 5, 10, 17, ha 19). Oĩ sección uperiregua ohechaukáva Proféta José Smith rembiapo, ojapóvo peteĩ ñembohasa inspirádo Biblia-gui, ha upe aja oñemog̃uahẽva’ekue heta sección doctrinal imba’eguasúva (péicha, tojehecha umi sección 37, 45, 73, 76, 77, 86, 91, ha 132, peteĩteĩ ohóva Biblia ñembohasa rehe).

Umi rrevelasiõme ojeikuaauka evanhélio doctrina, omyesakãva umi prinsípio guasu ha’éva pe Divinida naturalésa, yvypóra apo ypy, añetegua Satana rehegua, mortalida propósito, tekotevẽha ñaneñe’ẽrendu, tekotevẽha ñañearrepenti, Espíritu Marangatu rembiapo, umi ordenánsa ha jepokuaa salvasiõ rehegua, pe yvy renonderã, mba’éicha opytáta yvypóra Jeikovejey ha Huísio rire, ñemenda rehegua joaju apyra’ỹva, ha família naturalésa ijapyra’ỹva. Péicha avei, pe Tupao estructura administrativa jeikuaauka sa’isa’i, umi obispo, pe Primera Presidencia, Dosegua Konsého ha umi Seténta ñehenói rupi, ha ambue ofísio ha kórum presidente ñemopu’ã reheve. Ipahápe, testimónio oñeme’ẽva Jesucristo-gui—Idivinida, Ituichakue, Iñemoĩporãmba, Imborayhu ha Ipu’aka rredentorgui—ojapo ko kuatiañe’ẽgui peteĩ tembiapo imba’eguasuetéva familia humana-pe g̃uarã ha “hepyete Tupaópe g̃uarã, opa Yvy arigua mba’erepýicha” (tojehecha D&K 70 moñepyrũ).

Umi rrevelasiõ ohai ñepyrũva’ekue José Smith haiharakuéra, ha Tupao miembro-kuéra vy’ápe okompartíkuri oñondive umi kópia pópe ojehaíva. Ojejapo hag̃ua peteĩ jehaipyre tapiavéva, umi haihára pya’e okopia umi rrevelasiõ peteĩ kuatiañe’ẽ pópe jehaipyrépe, Tupaogua líder-kuéra oiporuva’ekue ombosako’i hag̃ua rrevelasiõ oñeimprimítava. José ha santokuéra iñepyrũmegua, ohechákuri umi rrevelasiõ Tupaópe ohechaháicha: oikovéva, ikyre’ỹva ha ikatúva oñemoporãve rrevelasiõ ñemoĩve reheve. Ha ohechakuaa avei hikuái ikatuhára’e ojejavy ojeipota’ỹre, ojehai ha oñembosako’ívo umi rrevelasiõ oñeguenohẽ hag̃ua. Upéicha, ary 1831-pe, peteĩ Tupao conferencia ojerure José Smith-pe “omyatyrõ hag̃ua umi jejavy térã mba’e oĩporã’ỹva ha’e ikatúva ojuhu Espíritu Marangatu rupive”.

Umi rrevelasiõ ojehecha ha oñemoĩporã rire, Tupao miembro-kuéra Misuri-gua oguenohẽ peteĩ kuatiañe’ẽ hérava A Book of Commandments for the Government of the Church of Christ, oguerekóva heta Proféta rrevelasiõ ñepyrũgua. Upevére, ko ñeha’ã peteĩha oñeguenohẽ hag̃ua umi rrevelasiõ opákuri, peteĩ populácho ohundívo santokuéra imprenta oĩva Jackson kondádope, Julio 20, 1833-pe.

Oikuaávo oñehundihague Misuri-gua imprenta, José Smith ha ambue Tupaogua miembro omoñepyrũ ñembosako’i oguehohẽ hag̃ua umi rrevelasiõ Kirtland Ohio-pe. Omyatyrõ hag̃ua jejavy, omyehesakã hag̃ua ñe’ẽ ha ohecha hag̃ua Tupaopegua doctrina ha organización mopu’ã, José Smith osupervisa umi rrevelasiõ haipyre edisiõ, oñeguenohẽ hag̃ua 1835-pe, Doctrine and Covenants of the Church of the Latter Day Saints ramo. José Smith oautorisa ambue Doctrina ha Konveniokuéra edisiõ, oñeguenohẽva Proféta martírio riremi, 1844-pe.

Santokuéra Ára Pahapegua ñepyrũgua omomba’eguasuva’ekue umi rrevelasiõ, ha ohecha umíva Tupãguigua ñemomarandu ramo. Peteĩ ára, 1831 pahávo, heta Tupaogua Élder-kuéra ome’ẽ testimónio imbaretéva Ñandejára otestifikahague hi’ángape, umi rrevelasiõ añeteguaha. Upe testimónio oñeguenohẽ Doctrina ha Konveniokuéra 1835-gua edisiõme, umi Dóse Apóstol testimónio ojehaíva ramo:

Umi Dóse Apóstol
Testimónio
kuatiñe’ẽ Doctrina ha Konveniokuéra Añeteguágui

Umi Testígo Testimónio Ñandejára Rembiapoukapy Kuatiañe’ẽ rehegua, tembiapoukapy Ha’e ome’ẽva’ekue Itupaópe, José Smith, upe ta’ýra rupive, oñehenoiva’ekue Tupao ñe’ẽ rupi ko propósitorã:

Upévare, ore rome’ẽse testimónio opa mundogua yvypórape, mayma tekove yvy ape ariguápe, Ñandejára ome’ẽhague testimónio ore ángape, Espíritu Santo rupive oñehẽva ore ári, ko’ã tembiapoukapy oñeme’ẽhague Tupã inspirasiõ rupive ha iporãha opa tekovépe g̃uarã ha añetehápe añeteguaha.

Rome’ẽ ko testimónio múndope, ha’évo Ñandejára orepytyvõhára; ha ha’e Tupã pe Túva, ha Ta’ýra Jesucristo grásia rupive, oñemẽ’ẽha oréve ko priviléhio rome’ẽ hag̃ua ko testimónio múndope, ha upévape rovy’aiterei, akóinte roñembo’évo Ñandejárape upéva rupive yvypóra ra’ykuéra toĩporã.

Umi Dóse réra ha’e:

Thomas B. Marsh
David W. Patten
Brigham Young
Heber C. Kimball
Orson Hyde
William E. McLellin
Parley P. Pratt
Luke S. Johnson
William Smith
Orson Pratt
John F. Boynton
Lyman E. Johnson

Tenondevegua Doctrina ha Konveniokuéra edisiõme, oñemoĩve rrevelasiõ ha ambue asúnto ofisial; ojehupytyháicha, ha Tupaogua asamblea térã conferencia competente omboajeháicha. Edisiõ 1876-gua, ombosako’iva’ekue Élder Orson Pratt, Brigham Young ñeisãmbyhy guýpe, omohendákuri umi rrevelasiõ féchare ha omoĩkuri moñepyrũ pyahu, umi ñepyrũmby histórico reheve.

Oñepyrũvo edisiõ 1835-gua, peteĩ serie orekóva siéte mbo’epy teolóhico oñemoĩ avei ipype; ko’ãva ojehero Lectures on Faith. Ko’ãva oñembosako’iva’ekue ojeporu hag̃ua Escuela de los Profetas, Kirtland, Ohio-pe, 1834 guive 1835 peve. Iporãramo jepe, doctrina ha ñehekombo’éramo, ko’ã diskúrso ojeipe’ava’ekue Doctrina ha Konveniokuéragui, edisiõ inglés-pe 1921-gua guive, noñeme’ẽi ha noñepresentái rupi rrevelasiõ ramo opa Tupaópe.

Doctrina ha Konveniokuéra edisiõ 1981-gua, inglés-pe, peteĩháme oñemoĩva’ekue umi mbohapy dokuménto. Ko’ãva ha’e umi sección 137 ha 138, oñemoĩvo omanóva salvasiõ ñemopyenda; ha Declaración Oficial 2, omomarandúvo opa Tupaogua kuimba’e hekomarangatúva ikatuha oñeordena sacerdocio-pe, taha’e ha’éva irrása térã ikolor.

Peteĩteĩ Doctrina ha Konveniokuéra edisiõ pyahúpe oñemyatyrõ jejavy upe mboyvegua, ha oñemoĩve marandu pyahu, umi parte histórica sección-kuéra moñepyrũme. Ko edisiõme oĩporãve umi ára ha tenda réra, ha ojejapo ambue ñemyatyrõ. Ko’ã ñemoambue ojejapo oñemoĩporãve hag̃ua upe material, información histórica ha’etéva ndive. Ko edisiõ ipahagua oguereko avei ambue característica especial, ha umíva apytépe ojejuhu umi mápa ojerrevisapyréva, ohechaukáva umi tenda geográfico imba’eguasuvéva, ojehupyty haguépe umi rrevelasiõ, ha Tupao rembiasakue rehegua ta’anga, umi pehẽ ohóva ojuehe, sección-kuéra moñepyrũme ha umi téma oñemoporãva’ekue ñemombyky, oñemoĩva oñeipytyvõ hag̃ua umi oleévape, ontende ha oguerovy’a hag̃ua umi marandu ñe’ẽ Ñandejára ome’ẽva’ekue Doctrina ha Konveniokuérape. Ñe’ẽ oĩva umi sección moñepyrũme ojeipe’a Historia Manuscrita de la Iglesia ha History of the Church ñeguenohẽgui, (oñeñe’ẽvare iñepyrũme José Smith tembiasakue ramo) ha Joseph Smith Papers.