Sección 100
Rrevelasiõ oñeme’ẽva’ekue José Smith upe Proféta ha Sidney Rigdon-pe, Perrysburg, Nueva York-pe, octubre 12, 1833-pe. Ko’ã mokõi joyke’y, imombyrývo hogayguakuéragui heta ára, ojepy’apy’imi hesekuéra.
1–4, José ha Sidney ombo’eva’erã evanhélio angakuéra salvasiõrã; 5–8, Oñeme’ẽta chupekuéra upe aravoitépe umi he’i’va’erã; 9–12, Sidney ha’éta hérape oñe’ẽva ha José ha’éta peteĩ rrevelador, ha imbaretéva testimóniope; 13–17, Ñandejára omopu’ãta peteĩ tavaygua ipotĩva, ha umi iñe’ẽrendúva ojesalváta.
1 Añetehápe, péicha he’i peẽme Ñandejára, che angirũnguéra Sidney ha José, pende rogayguakuéra oĩ porã; che pópe oĩ hikuái, ha Che ajapóta hendiekuéra chéve oĩporãháicha, chepype oĩgui opa pokatu.
2 Upévare, chesegi ha pehendu ñemoñe’ẽ Che ame’ẽtava peẽme.
3 Péina ápe, péicha Che aguereko heta tavaygua ko tendápe, umi tenda jerereguápe; ha ojepe’áta peteĩ okẽ iporãva umi tenda jerereguápe ko kuarahyresẽmegua retãme.
4 Upévare, Che, Ñandejára, ahejákuri peju ko tendápe; péicha iporãguikuri chéve angakuéra salvasiõrã.
5 Upévare, añetehápe Che ha’e peẽme, pehupi pene ñe’ẽpu ko tavayguakuérape; peñe’ẽ umi akãremiandu Che amoĩtava pene korasõme, ha napeneñemoapañuamo’ãi tekovekuéra renondépe;
6 Oñeme’ẽtagui peẽme pe aravoitépe, héẽ, upe javete, mba’épa pejeva’erã.
7 Ha katu Che ame’ẽ peẽme peteĩ tembiapoukapy, oimeraẽ mba’e pejéva che rérape, toje’e korasõ añetépe, marangatu espíritupe, opa mba’épe.
8 Ha Che ame’ẽ peẽme ko promésa, kóva pejapóramo, pe Espíritu Santo oñehẽta otestifika hag̃ua opa mba’e peñe’ẽvagui.
9 Ha iporã chéve nde, che rembiguái Sidney, taha’e ko tavayguakuéra rérape oñe’ẽva; héẽ, añetehápe, Che roordenáta ko llamamiéntope g̃uarã, héẽ, ha’e hag̃ua che rembiguái José rérape oñe’ẽva.
10 Ha Che ame’ẽta chupe pokatu testimóniope ipu’akapa hag̃ua.
11 Ha Che ame’ẽta ndéve pokatu ndepu’akapa hag̃ua remyesakãvo opa escritura, ha’e hag̃ua hérape oñe’ẽva; ha ha’éta ndéve g̃uarã peteĩ rrevelador, reikuaa porã hag̃ua opa mba’e ha’éva che rréino rehegua ko yvy ári.
12 Upévare, peho meme, ha tovy’a pene korasõ; péina ápe, péicha Che aimégui penendive ipaha peve jepeve.
13 Ha ko’ág̃a Che ame’ẽ peẽme peteĩ ñe’ẽ Sion rehegua. Sion oñerredimíta, ojehaviráramo jepe chupe peteĩ ára mbyky aja.
14 Pende joyke’ykuéra, che rembiguái Orson Hyde ha John Gould, oĩ che pópe; ha oñongatúramo hikuái che rembiapoukapykuéra, ojesalváta.
15 Upévare, taiñangapyhy pene korasõ; opa mba’e oikótagui umi oguata jojáva ñeimeporãrã, ha tupao ñemomarangaturã.
16 Che amopu’ãtagui chemba’erã peteĩ tavaygua ipotĩva, cheservítava tekojojápe;
17 Ha opa umi ohenóiva Ñandejára réra ha oñongatúva hembiapoukapykuéra, ojesalváta. Taupéicha. Amén.