1 Ha avei, rojerure pehecha hag̃ua iporãha opa santokuéra ombyaty upe oikuaáva opa mba’e oikova’ekuégui, ha umi jehasa’asy ha mba’e ivaíva omoĩva’ekue hi’arikuéra ko Estádo tavayguakuéra;

2 Ha avei opa mba’erepykuéragui ha mboýpa umi ñembyai ohasava’ekue hikuái, mokõive terakuã ha tete ñehungáme, péicha avei umi mba’erepykuéra rehegua;

3 Ha avei, opa tekove réra ijejopykuérape oĩva’ekue, ikatuha peve ojehupyty ha ojeikuaa.

4 Ha ikatu oñehenói peteĩ komite oheka hag̃ua ko’ã mba’e ha ombyaty hag̃ua umi ñemombe’u ha oje’epyréva, ha avei ombyaty hag̃ua umi jehaipy japu oñeguenohẽva’ekue isarambivahína;

5 Ha opa mba’e oĩva umi rrevísta ha kuatiañe’ẽrusúpe, ha opa tembiasa japu oñeguenohẽmava’ekue ha umi ojehaivahína, ha mávapa ohai, ojeikuaauka hag̃ua umi tekotie’ỹ ha tembiapoñaña joaju imbaretéva ha oporojukáva, ojejapova’ekue ko tavayguakuéra rehe—

6 Ndaha’éi ojeikuaaukánte hag̃ua opa mundopýre, ha katu oñeme’ẽ hag̃ua opa goviérno mburuvichakuérape, opa iñypytũ ha iñañangue tuichakuépe, ñeha’ã paha ramo, Ñande Ru Yvagagua ojerureva’ekue jajapo hag̃ua, jajerure porã ha jajerurepaite mboyve upe promésa ñekumpli, oguenohẽtava chupe tenda ha’e oñemihágui; ha avei opa upe tetã opyta hag̃ua excusa-ỹre, ha’e oity mboyve ijyva mbarete ipu’akapáva.

7 Ha’e peteĩ tembiaporã tekotevẽtereíva jajapo Tupã ha anhelkuéra ndive, ñañembo’ytaha renondépe, ha avei tekotevẽ ñandejupe g̃uarã, ñane rembireko ha ñande ra’ykuéra oñemoñakãityva’ekue, ñeimevaiete, vy’a’ỹ ha jepy’apy rupi; jejuka, jeiko’asy ha jejopy ivaivéva po guýpe, oñepytyvõ, oñemokyre’ỹ ha oñemantenéva upe espíritu rembiapóre, omoĩ mbareteva’ekue tuvakuéra gueroviapy, ohejava’ekue umi japu ta’yrakuéra korasõme, ha omyenyhẽva’ekue ko múndo apañuãigui, ha oñemombaretevévakuri ohóvo, ha ko’ág̃a ha’e opa ñembyai momyiha, ha yvy tuichakue ipyahẽ hembiapovai pohýi guýpe.

8 Ha’e peteĩ iérroguigua júgo, peteĩ ñapytĩ mbarete; ha’e umi jokuaha ha itasã, umi añaretã jokuapy ha py rehegua itasãpohýi.

9 Upévare, ha’e peteĩ tembiaporã tekotevẽtereíva jajapo, ndaha’éi jadevéva umi ñane rembireko ha ra’y tee añónte, ha katu umi imena’ỹva ha ityre’ỹvandi, iména ha tuvakuéra ojejukava’ekue ipo iérroguigua guýpe.

10 Tembiapo ypytũ ha oporomoypytũva, ohupytýva upe añaretã jepeve oryrýi hag̃ua kyhyjégui ha opyta ñemondýi pa’ũme ha hesa’yjupa, ha pe añaite po jepeve oryrýi ha okachapa.

11 Ha avei, ha’e peteĩ tembiaporã tekotevẽtereíva jaguerekóva upe ñemoñareaty okakuaáva ndive, ha opa umi ikorasõ potĩva ndive—

12 Oĩgui gueteri heta ko yvy ári, opa sécta apytépe, partído ha denominasiõ, oñembohecha’ỹva tekovekuéra ñemoñuhã ha’évéva rupi, omaña ñemíva oporoity hag̃ua, ha nog̃uahẽiva añeteguápe, ndoikuaáiguinte moõpa ojuhúta—

13 Upévare, ñamoĩmbaite ñande rekove ha umi jaguerekóva, jaikuaaukávo opa mba’e ñemi pytũmegua, jaikuaaha peve umíva; ha ko’ãva añetehápe yvágagui ojehechauka—

14 Upéicha oñeñatendeva’erã ko’ã mba’ére, tuicha jesareko reheve.

15 Avave ani ohecha umíva mba’e michĩramo; oĩgui heta tenonderãme, santokuéra reheguáva, odependéva ko’ã mba’ére.

16 Joyke’ykuéra, peẽ peikuaa peteĩ yga guasúpe ouporãha peteĩ timón michĩ ogueraha porãva chupe amavai árape, umi yvytu ha ypu’ã ou ha ohóvare.

17 Upévare, joyke’ykuéra pejehayhúva, tory porãme jajapo opa mba’e ikatúva; ha upérõ ikatu japyta, jeikuaa porã reheve, jahecha hag̃ua Tupã salvasiõ ha tojehechauka ijyva.