Sección 31
Rrevelasiõ oñemeʼẽvaʼekue José Smith, pe Proféta rupive, Thomas B. Marsh-pe, Setiembre 1830-pe. Upe mbaʼe ojehúkuri peteĩ Tupao conferencia riremi (tojehecha sección 30 ñepyrũ). Thomas B. Marsh oñemongaraíkuri ára upe mboyve, upéva upe mes-pe, ha oñeordenákuri Tupao élder ramo, oñemeʼẽ mboyve kóva ko rrevelasiõ.
1–6, Thomas B. Marsh oñehenói omboʼe hag̃ua pe evanhélio ha ojeʼe chupe hogayguakuéra oĩporãtaha; 7–13, Oñemeʼẽ chupe ñemoñeʼẽ ipyʼaguapy hag̃ua, akóinte oñemboʼe, ha ojapo hag̃ua pe Moagapyhyhára heʼíva chupe.
1 Thomas, che raʼy, rejehovasapyre nde, jerovia reguerekóva rupi che rembiapóre.
2 Péina ápe, nde rehasákuri heta jehasaʼasy nde rogaygua rupi; upevére, che rohovasáta ndéve ha nde rogayguápe, heẽ, umi mitã michĩ rerekóvape; ha oúma pe ára haʼekuéra ogueroviata ha oikuaataha pe añetegua, ha peteĩta hikuái nendive che tupaópe.
3 Emopuʼã ne korasõ ha evyʼa, ne misiõ aravo og̃uahẽmagui; ha ojeráta ne kũ, ha remombeʼúta umi mbaʼeporã pyahu vyʼapavẽ rehegua ko ñemoñareatýpe.
4 Remombeʼúta umi mbaʼe ojehechaukavaʼekue che rembiguái José Smith, pe taʼýrape. Eñepyrũta emboʼe ko ára guive, heẽ, remonoʼõ hag̃ua pe ñu morotĩmavape ojehapy hag̃ua.
5 Upévare, emoigue nde kysekarapã opa ne ánga reheve, ha oñeperdona ndéve ne angaipakuéra, ha ne lómo henyhẽta pe oñemonoʼõvagui reheve, pe mbaʼapohára ohupytýgui hembiapo repy. Upévare, nde rogayguakuéra oikovéta.
6 Péina ápe, añetehápe che haʼe ndéve, esẽ ijapyteguikuéra sapyʼami ha emombeʼu che ñeʼẽ, ha che ambosakoʼíta peteĩ tenda chupekuérape g̃uarã.
7 Heẽ, che amohuʼũta pe tavayguakuéra korasõ, ha haʼekuéra nemog̃uahẽta. Ha che amopuʼãta pe tupao nde po rupive;
8 Ha remombarete ha rembosakoʼíta chupekuéra ára oñembyatýta ramo g̃uarã chupekuéra.
9 Ndepyʼaguapýke umi jehasaʼasýpe; ani rejahéi umi ojahéivare. Eisãmbyhy nde rogapy tekopyʼaguapýpe ha eime ñemovãʼỹme.
10 Péina ápe, che haʼe ndéve nde haʼetaha pohanohára tupaópe g̃uarã, ha katu ndahaʼemoʼãi múndope g̃uarã, haʼekuéra nanemog̃uahẽmoʼãigui.
11 Tereho nde rapére oimeraẽ tenda che aipotahápe, ha pe Moangapyhyhára ohechaukáta ndéve mbaʼépa rejapovaʼerã ha moõpa rehovaʼerã.
12 Tapiaite eñemboʼe, ani hag̃ua reike pyʼaraʼãme ha rehundi nde jopói.
13 Ndejeroviarekóke ipahaite peve, ha péina ápe, che aime nendive. Koʼã ñeʼẽ ndahaʼéi yvypóra ni yvyporakuéra ñeʼẽ, ha katu che mbaʼe, heẽ, Jesucristo, ne Rredentor, Túva rembipota rupive. Amén.