1 Ko’ág̃a, péina ápe, Che ha’e ndéve, remoĩ haguére peteĩ kuimba’e aña pópe umi jehai oñeme’ẽva’ekuére ndéve pu’aka ikatu hag̃ua rembohasa, Urim ha Tumim rupive, ko’ág̃a rehundíma umíva.

2 Ha rehundi avei ne don upe jave, ha oñemoypytũ pe ne akãmegua.

3 Upevére, oñeme’ẽjey ndéve; upévare, eñeha’ã ndejeroviareko ha eho meme ejapopa peve pe ñembohasa rembyre, reñepyrũ haguéicha.

4 Ani eñani pya’eve térã emba’apo hetave umi ne mbarete ha tembiporu oñeme’ẽva ndéve oheja rembohasa; ha katu ejesareko ipahaite peve.

5 Akóinte eñembo’e, ndepu’aka hag̃ua; héẽ, ndepu’aka hag̃ua Satanáre, ha resẽ hag̃ua Satana rembiguaikuéra pógui, omoporãva pe hembiapo.

6 Péina ápe, nerundise hikuái; héẽ, pe kuimba’e rejeroviava’ekuére jepe oñeha’ãkuri nerundi hag̃ua.

7 Ha péva rupi ha’ékuri hese ha’eha peteĩ kuimba’e ñaña, oipe’aségui umi mba’e oñeme’ẽva’ekue ndéve; ha oñeha’ãkuri avei ohundi ne don.

8 Ha remoĩ haguére umi jehai ipópe, péina ápe, umi yvypóra ñaña oipe’ákuri ndehegui.

9 Upévare, reme’ẽkuri umíva, héẽ, upe imarangatúva, umi hekoñañávape.

10 Ha, péina ápe, Satana omoĩ ikorasõnguérape omoambue hag̃ua umi ñe’ẽ rehaikava’ekue, térã, rembohasava’ekue, umi osẽva’ekue nde pógui.

11 Ha péina ápe, Che ha’e ndéve, omoambue haguére hikuái umi ñe’ẽ, omoñe’ẽ joavývo umi nde rembohasa ha rehaikava’ekue;

12 Ha péicha, pe aña oñeha’ã omopu’ã peteĩ plan katupyry ohundi hag̃ua ko tembiapo;

13 Omoĩgui ikorasõnguérape kóva ojapo hag̃ua, ijapúvo, he’i hag̃ua ndepillahague hikuái umi ñe’ẽ rembohasa gua’uva’ekuépe.

14 Añetehápe, Che ha’e ndéve, ndahejamo’ãiha Satana ojapo iplan ñaña kóvape.

15 Ha péina ápe, ha’e omoĩguikuri ikorasõnguérape retenta hag̃ua Ñandejára nde Tupãme, rejerurévo rembohasa jey hag̃ua upéva.

16 Ha upérõ, péina ápe, he’i ha opensa hikuái ikorasõme—Jahecháta ome’ẽpa chupe Tupã pokatu ombohasa hag̃ua; ha upéicharõ, ome’ẽ jeýta chupe pokatu;

17 Ha Tupã ome’ẽ jeýramo chupe pokatu, térã ombohasa jeýramo, térã ambue ñe’ẽme, upeichaguaite ñe’ẽ ohai jeýramo, péina ápe, jaguereko umíva, ha ñamoambuékuri;

18 Upévare napeteĩchamo’ãi umíva, ha ja’éta ijapuhague iñe’ẽme, ha ha’e ndoguerekoiha mba’evéichagua don, ni mba’evéichagua pokatu;

19 Upévare ñahundíta chupe, ha upe tembiapo avei; ha jajapóta kóva ani hag̃ua ñañemotĩ ipahápe, ha jahupyty hag̃ua mundogua glória.

20 Añetehápe, añetehápe, ha’e ndéve, Satana oguerekoha tuicha pu’aka ikorasõnguérare; ha omyaña chupekuéra tembiapovairã pe iporãva rehe;

21 Ha umi ikorasõ oñembyaipa, ha henyhẽ tembiapoñaña ha tembiapoky’akuéragui; ha ha’ekuéra ohayhuve pytũmby tesapégui, iñañágui hembiapokuéra; upévare, ndojeruréi hikuái chéve.

22 Satana omyaña chupekuéra ogueraha hag̃ua hi’angakuéra ñehundípe.

23 Ha upéicha omopu’ã peteĩ plan katupyry, opensávo ohundi Tupã rembiapo; ha katu kóva ipoguikuéra ajeruréta, ha omotĩta ha okondenáta chupekuéra pe huísio árape.

24 Héẽ, ha’e omyaña ikorasõkuéra pochýpe ko tembiapo rehe.

25 Héẽ, he’i chupekuéra: Peporombotavy ha pemoñuhã, peporohundi hag̃ua; péina ápe, péva ndaivaíri. Ha upéicha ombojuruhe’ẽ ha he’i chupekuéra ndaha’eiha angaipa oporombotavy, opilla hag̃ua peteĩ tekovépe ijapu jave, ohundi hag̃ua chupe.

26 Ha péicha ombojuruhe’ẽ ha ogueraha chupekuéra, ombotyryry peve umi hi’ánga yvy gotyo añaretãme; ha péicha oity chupekuéra ñuhã ha’ekueraite omoĩva’ekuépe.

27 Ha péicha oho yvate ha yvy gotyo, ápe ha pépe yvy ári, ohekávo ohundi umi yvypóra ánga.

28 Añetehápe, añetehápe, Che ha’e ndéve, ái pe ijapúvagui oporombotavy hag̃ua, oimo’ãgui ambuéva ijapu oporombotavy hag̃ua, ko’ãvape noñemombiáigui Tupã hustísiagui.

29 Ko’ág̃a, péina ápe, omoambuékuri hikuái ko’ã ñe’ẽ, Satana he’ígui chupekuéra: Ha’e penembotavýkuri—ha péicha ombojuruhe’ẽ chupekuéra ojapo hag̃ua tembiapovai, nde retenta hag̃ua Ñandejára nde Tupãme.

30 Péina ápe, ha’e ndéve, nerembohasamo’ãvéima umi ñe’ẽ osẽva’ekue nde pógui;

31 Péina ápe, ndojapomo’ãigui hikuái iplan ñaña ijapúvo ko’ã ñe’ẽ rehe. Péina ápe, reguenohẽramogui umichaguaite ñe’ẽ, he’íta hikuái ndejapuha, ha rembohasa gua’uhague, ha katu ndete rejerehague pe ereva’ekuégui.

32 Ha péina ápe, oguenohẽta hikuái kóva, ha Satana omohatãta tavayguakuéra korasõ, omyañávo pochýpe nderehe, ani hag̃ua oguerovia hikuái umi che ñe’ẽ.

33 Péicha opensa Satana ipu’akávo ne testimóniore ko ñemoñareatýpe, ani hag̃ua osẽ tembiapo ko ñemoñareatýpe.

34 Ha katu ema’ẽ, kóvape oĩ arandu, ha ahechauka rupi ndéve arandu, ha ame’ẽ ndéve umi tembiapoukapy rejapova’erã ko’ã mba’ére, ani ehechauka múndope ejapopa peve ko ñembohasa rembiapo.

35 Ani emomba’eguasu ha’ehague ndéve: Kóvape oĩ arandu, ani ehechauka múndope—che ha’égui, ani ehechauka múndope, eñemo’ã hag̃ua.

36 Péina ápe, nda’éi ndéve ani hag̃ua rehechauka umi hekojojávape;

37 Ha katu ndaikatúigui akóinte rehusga mávapa umi hekojojáva, térã ndaikatúigui akóinte rehechakuaa umi iñañáva hekojojávagui, upévare ha’e ndéve, eguerokirirĩ, iporã meve chéve aikuaauka múndope opa mba’e upéva rehegua.

38 Ha ko’ág̃a, añetehápe ha’e ndéve, peteĩ ñemombe’u umi mba’e ehaiva’ekuégui, osẽva’ekue nde pógui, ojehaiha umi Nefi pláncha ári.

39 Héẽ, ha nemandu’a umi jehaípe oje’ehague oñeme’ẽveha peteĩ ñemombe’u ko’ã mba’e rehegua umi Nefi pláncha ári.

40 Ha ko’ág̃a, pe ñemombe’u ojehaíva umi Nefi pláncha ári, oñe’ẽve rupi umi mba’e, che arandúpe, Che aikuaaukasévare tavayguakuérape ko ñemombe’úpe—

41 Upévare, rembohasáta jehaikuéra oĩva umi Nefi plánchape, rehupyty peve rréi Benjamín rreinádo jepe, térã reg̃uahẽ meve umi rembosava’ekue ha reñongatuva’ekuépe;

42 Ha péina ápe, reguenohẽta Nefi jehaipyre ramo; ha péicha Che amoapoñuãita umi omoambueva’ekuépe che ñe’ẽ.

43 Ndahejamo’ãi ohundi hikuái che rembiapo; héẽ, ahechaukáta chupekuéra che arandu tuichaveha pe aña katupyrýgui.

44 Péina ápe, peteĩ pehẽnguénte oguereko hikuái, térã peteĩ Nefi ñemombe’u ñemombyky.

45 Péina ápe, oĩ heta mba’e Nefi plácha ári ojehaíva, omyesakãvéva che evanhélio; upévare, ha’e che arandúpe, embohasa hag̃ua umi Nefi jehaipyre pehẽngue peteĩha, ha emoĩ ko tembiapo ryepýpe.

46 Ha péina ápe, ko tembiapo rembyre oguereko opa umi che evanhélio pehẽngue che profetakuéra marangatu, héẽ, ha avei che discípulo-kuéra, ojerureva’ekue iñembo’ekuérape og̃uahẽ hag̃ua ko tavayguápe.

47 Ha ha’e chupekuéra, umíva oñeme’ẽtaha ojeroviaháicha iñembo’ekuérape;

48 Héẽ, ha kóva ha’ékuri ijerovia—pe che evanhélio, ame’ẽva’ekue chupekuéra ombo’e hag̃ua hi’árape, tog̃uahẽ umi ijoyke’y, Lamanita-kuérape, ha avei opa umi oikóva chugui Lamanita iñesẽ rupive.

49 Ko’ág̃a, ndaha’éi kóva añónte—ijerovia iñembo’ekuérape ha’ékuri, tojekuaauka avei ko evanhélio, ikatúramo g̃uarã ambue tetãnguéra ohupyty ko yvy;

50 Ha péicha oheja hikuái iñembo’ekuérape peteĩ jehovasa ko yvy ári, oimeraẽva ogueroviáva ko evanhélio ko yvýpe, oguereko hag̃ua tekove ijapyra’ỹva;

51 Héẽ, ikatu hag̃ua opavave ohupyty, taha’e ha’éva tetã, avaretã, ñe’ẽ, térã tavaygua.

52 Ha ko’ág̃a, péina ápe, ojeroviaháicha iñembo’ekuérape, aguerúta ko che evanhélio pehẽngue che tavayguakuéra jeikuaápe. Péina ápe, ndaguerúi umíva ambyai hag̃ua umi ha’ekuéra ohupytymava’ekue, ha katu amombareteve hag̃ua.

53 Ha péva rupi Che ha’eva’ekue: Ko ñemoñareaty nomohatãirõ ikorasõ, Che amoĩta che tupao ijapytepekuéra.

54 Ko’ág̃a, Che nda’éi péva ahundi hag̃ua che tupao, ha katu amongakuaa hag̃ua che tupao;

55 Upévare, oimeraẽva che tupaogua natekotevẽi okyhyje, umíva ohupytýtagui jehejapyre ramo yvága rréino.

56 Ha katu umi ndokyhyjéiva chehegui ni noñongatúiva che rembiapoukapykuéra, ha katu omopu’ãva tupao ijupe g̃uarã ohupyty hag̃ua pirapire, héẽ, ha opa heko ñaña ha omopu’ãva umi aña rréino—héẽ, añetehápe, añetehápe, che ha’e ndéve, umívape amyangekoitaha, ha amboryrýi ha amosusũta ipy’a mbytete peve.

57 Péina ápe, Che ha’e Jesucristo, Tupã Ra’y. Ajuva’ekue umi chemba’évape, ha umi chemba’éva nachemog̃uahẽi.

58 Che ha’e tesape omimbíva pytũmbýpe, ha umi pytũmby ndoikũmbýi.

59 Che pe ha’eva’ekue che discípulo-kuérape—Ambue ovecha aguereko ndaha’éiva ko rredilpegua—ha oĩkuri heta nacheikũmbýiva.

60 Ha ahechaukáta ko tavayguápe arekohague ambue ovechakuéra, ha ha’ekuéra ha’eha peteĩ Jacob róga rakã;

61 Ha aguenohẽta tesakãme umi tembiapo hechapyrãva, ha’ekuéra che rérape ojapova’ekue;

62 Héẽ, ha aguenohẽta avei tesakãme che evanhélio oñembo’eva’ekue chupekuéra, ha péina ápe, nonegamo’ãi hikuái umi nde rehupytyva’ekue, ha katu omongakuaáta ha oguenohẽta tesakãme umi che doctrina-pegua añetegua, héẽ, ha peteĩete doctrina chepype oĩva.

63 Ha Che ajapo kóva amoĩ hag̃ua che evanhélio, ani hag̃ua oĩ hetaite ñorairõ; héẽ, Satana omyaña tavayguakuéra korasõ oñorairõ hag̃ua umi che doctrina-pe oĩvare; ha ko’ã mba’épe ojavy hikuái, omokarẽgui umi escritura ha ndoikũmbýi hikuái umíva.

64 Upévare, Che aikuaaukáta chupekuéra ko ñemimby tuicháva;

65 Péina ápe, ambyatýtagui chupekuéra ryguasu ombyatyháicha iryguasura’ykuéra umi ipepo guýpe, nomohatãirõ hikuái ikorasõ;

66 Héẽ, ha ha’ekuéra ouséramo, oukuaa, ha ho’u jejopy’ỹme umi tekove ýgui.

67 Péina ápe, kóva ha’e che doctrina—oimeraẽva umi oñearrepenti ha oúva cherendápe, umíva ha’e che tupao.

68 Oimeraẽva omombe’u heta térã sa’ive kóvagui, ndaha’éi chemba’e, ha katu oñemoĩ cherehe; upévare, ndaha’éi che tupaogua.

69 Ha ko’ág̃a, péina ápe, oimeraẽva che tupaogua, ha ogueropu’akáva che tupaópe ipahaite peve, amopu’ãta che itaguasu ári, ha umi añaretã rokẽ ndaipu’akamo’ãi hesekuéra.

70 Ha ko’ág̃a, nemandu’áke upe ha’éva múndo rekove ha resape ñe’ẽre, ne Redentor, ne Ñandejára ha nde Tupã. Amén.