Sección 73
Rrevelasiõ oñemeʼẽvaʼekue José Smith upe Proféta, ha Sidney Rigdon-pe, Hiram, Ohio-pe, enero 10, 1832-pe. Diciembre ohasavaʼekue ñepyrũ guive, Proféta ha Sidney omboʼékuri oikóvo, ha péva rupi, saʼieteve umi ñeʼẽvai opuʼãva Tupao rehe (tojehecha sección 71 moñepyrũ).
1–2, Elder-kuéra omboʼe memevaʼerã; 3–6, José Smith ha Sidney Rigdon ojapo memevaʼerã Biblia ñembohasa ojejapopa peve.
1 Añetehápe, péicha heʼígui Ñandejára, iporã chéve tomboʼe meme hikuái pe evanhélio, ha omokyreʼỹvo tupaokuéra tenda jerereguápe, conferencia ára peve;
2 Ha upérõ, péina ápe, ojeikuaaukáta chupekuéra, conferencia ñeʼẽpu rupive, umi imisiõkuerarã.
3 Koʼág̃a, añetehápe Che haʼe peẽme, che rembiguaikuéra José Smith, pe taʼýra, ha Sidney Rigdon, heʼi Ñandejára, iporã pemoñepyrũjey upe ñembohasa;
4 Ha, peẽme ikatúramo, pemboʼe umi tenda jerereguápe, conferencia ára peve; ha upe rire, iporã pejapo meme ñembohasa rembiapo ojejapopa peve.
5 Ha tahaʼe kóva peteĩ apopyre elder-kuérape, oñemeʼẽve peve kuaapy, jepe ojehaihaichaite.
6 Koʼág̃a, Che nameʼẽvéima peẽme ko ára. Pejekuʼa jokua ha pene akãguapy. Taupéicha. Amén.