Sección 3
Rrevelasiõ oñeme’ẽva’ekue José Smith upe Profétape, Harmony, Pensilvania, Julio 1828-pe, umi 116 páhina pópe jehaipyre ñehundi rehegua, oñembohasava’ekue Mormón Kuatiañe’ẽ ñepyrũhágui, hérava Lehi Kuatiañe’ẽ. Pe Proféta, py’ahetápe, ohejava’ekue umi páhina ohasa ipógui Martin Harris pópe, oipytyvõva’ekue ára mbykymi haihára ramo, Mormón Kuatiañe’ẽ ñembohasápe. Pe rrevelasiõ oñeme’ẽ Urim ha Tumim rupive. (Tojehecha sección 10).
1–4, Ñandejára rape ha’e peteĩ jere ijapyra’ỹva; 5–15, José Smith oñearrepentiva’erã térã operdéta don ombohasa hag̃ua; 16–20, Mormón Kuatiañe’ẽ osẽ tesakãme osalva hag̃ua Lehi ñemoñare.
1 Tupã rembiapo, ha hembipota, ha ipropositokuéra ndaikatúi oñehundi, ni ndaikatúi oiko chugui mba’eve’ỹ.
2 Tupã ndoguatáigui tape karẽre, ni ndojevýi akatúa ni asu gotyo, ni novãi pe he’ívagui, upévare, umi iguataha ijoja ha hape ha’e peteĩ jere ijapyra’ỹva.
3 Nemandu’áke, nemandu’áke ndaha’eiha Tupã rembiapo oñehundíva, ha katu yvyporakuéra rembiapo;
4 Peteĩ tapicha ohupytýramo jepe heta rrevelasiõ, ha oguereko pu’aka ojapo hag̃ua heta tembiapo hechapyrãva, upevére ha’e oñembotuicha imbarete rupi, ha nomomba’éi umi Tupã ñemoñe’ẽ ha oho hembipota he’íva ha hete oipotáva rapykuéri, ho’ava’erã ha ogueruva’erã hi’ári peteĩ Tupã ijojáva vengánsa.
5 Péina ápe, ojejerovia nderehe ko’ã mba’e reheve, ha katu hasyetépara’e umi ne rembiapoukapy; ha nemandu’áke avei umi promésa ojejapova’ekue ndéve, nderejapyharáirõ umíva.
6 Ha péina ápe, py’ỹiete rejapyharava’ekue Tupã rembiapoukapy ha leikuéra, ha reho umi yvypóra py’amovã rapykuéri.
7 Péina ápe, nderekyhyjeveiva’erãmo’ã yvypóragui Tupãgui. Yvypóra nomomba’éirõ jepe Tupã ñemoñe’ẽ, ha ojapo’i umi iñe’ẽ—
8 Upevére ndejeroviarekova’erãmo’ã; ha ha’e oipysótakuri ijyva ha nemo’ã opa aña árma hendypávagui; ha oĩva’erãmo’ã nendive opa ára rejejopy jave.
9 Péina ápe, nde ha’e José, ha rejeporavo rejapo hag̃ua Ñandejára rembiapo, ha katu upe jejapyhara rupi, re’áta nereñeñangarekóiramo.
10 Ha katu nemandu’áke, Tupã iporiahuvereko; upévare, eñearrepenti pe ejapova’ekuégui, oñemoĩva tembiapoukapy ame’ẽva’ekue ndéve rehe, ha rejeporavo gueteri, ha reñehenói jey tembiapópe;
11 Ha péva nderejapóiramo, reñemotyre’ỹta ha ha’éta ambue kuimba’éichante, ha ndereguerekomo’ãvéima don.
12 Ha reme’ẽvo umi rembohasava’ekue pe visiõ ha pu’aka Tupã ome’ẽva’ekue ndéve rupi, reme’ẽvo pe imarangatúva kuimba’e rembiapoñaña pópe,
13 Nomomba’éiva Tupã ñemoñe’ẽ ha ojapyhara umi promésa imarangatuvéva ojejapova’ekue Tupã renondépe, ha ojerovia pe ha’énte he’ívare, ha oñembotuicha arandu orekóvare.
14 Ha péva rupi ojeipe’a nde priviléhio peteĩ ára aja—
15 Rehejágui oñepyrũmba ne sãmbyhyhára ñemoñe’ẽre iñepyrũmby guive.
16 Upevére, che rembiapo oñemotenondéta, peteĩ Salvador jeikuaa oúgui múndope, Hudiokuéra testimónio rupi, péicha avei, peteĩ Salvador jeikuaa oúta che tavayguápe—
17 Ha Nefita, ha Jacobita, ha Josefita, ha Zoramita-kuérape, ituvakuéra testimónio rupi—
18 Ha ko testimónio ojeikuaaukáta Lamanita ha Lemuelita, ha Ismaelita-kuérape, ho’ava’ekue jeguerovia’ỹme ijypykuéra rembiapovai rupi, ha ko’ãva ha’e, Ñandejára ohejava’ekue ohundi umi ijoyke’y, Nefita-kuérape, hembiapovai ha hembiapoky’akuéra rupi.
19 Ha upevarãite oñeñongatu ko’ã pláncha, oguerekóva ko’ã jehaipyre— oñekumpli hag̃ua Ñandejára promésa, ha’e ojapova’ekue itavayguápe;
20 Ha Lamanita-kuéra toikuaa umi ijypykue rehegua, ha toikuaa Ñandejára promésagui, ha toguerovia pe evanhélio ha tojerovia Jesucristo méritore, ha tojeglorifika hikuái jerovia oguerekóva rupi hérare, ha tojesalva arrepentimiénto rupi. Amén