Sección 24
Rrevelasiõ oñeme’ẽva’ekue José Smith, upe Proféta ha Oliver Cowdery-pe, Harmony, Pensilvania, Julio 1830-pe. Ohasa mboyve irundyha jasyho pe Tupao oñemohendahague, pe ñemuña imbaretevéma ohóvo, ha umi líder ohekámante ñemo’ã oñemomombyrývo sapy’ami. Ko’ã mbohapy rrevelasiõ oñeme’ẽva’ekue ko árape, omombarete, omokyre’ỹ ha ohekombo’e hag̃ua chupekuéra.
1–9, José Smith oñehenói ombohasa, ombo’e ha omyesakã hag̃ua escritura-kuéra; 10–12, Oliver Cowdery oñehenói ombo’e hag̃ua pe evanhélio; 13–19, Ojehechauka léi milagrokuéra, umi ñe’ẽngái, yvytimbo pýgui jetyvyro ha vosa ha vakapire ati’yregua’ỹre ñesẽ rehegua.
1 Péina ápe, reñehenói ha rejeporavókuri rehai hag̃ua Mormón Kuatiañe’ẽ, ha che ministériope; ha che aipe’ava’ekue nde jehasa’asy ha añemoñe’ẽva’ekue ndéve, ha romosãso opa umi nderayhu’ỹvagui, ha reñemosãso Satana pu’akágui ha umi pytũmbýgui.
2 Upevére, ndaipóri hustifikasiõ nde jejapyharápe g̃uarã; upevére, tereho ha anive rejapo angaipa.
3 Embotuicha nde kárgo; ha reñemitỹ ha remo’ã rire umi ne ñu, pya’e tereho tupao oĩva Colesville, Fayette, ha Manchester-pe, ha ha’ekuéra oñangarekóta nderehe; ha ahovasáta chupekuéra, mokõive, espiritual ha temporalmente;
4 Ha katu nanemog̃uahẽiramo hikuái, amboúta hi’arikuéra ñe’ẽngái jehovasa rangue.
5 Ha nde rehenói meméta Tupãme che rérape, ha rehaívo umi mba’e oñeme’ẽtava ndéve pe Moangapyhyhára rupive, ha remyesakãvo tupaópe opa escritura-kuéra.
6 Ha ára reikotevẽte javete oñeme’ẽta ndéve upe mba’e ereva’erã térã ehaiva’erã, ha ha’ekuéra ohendúta, térã amboúta chupekuéra ñe’ẽngái jehovasa rangue.
7 Reme’ẽtagui opa ne pytyvõ Sion-pe; ha kóvape ne mbaretéta.
8 Eha’arõkuaa umi jehasa’asýpe, heta reguerekóta rupi; ha katu egueropu’aka umíva, ha péina ápe, che aime nendive, jepeve nde ára pahaite peve.
9 Ha umi yvy ariguáva tembiapópe ndeguerekomo’ãi mbarete, kóva ndaha’éigui ne llamamiénto. Ejesareko ne llamamiéntore ha reguerekóta reikotevẽva rembotuicha hag̃ua nde kárgo, ha remyesakã hag̃ua opa escritura-kuéra, ha emoĩ memévo nde po ha ekonfirmávo umi tupao.
10 Ha nde ryvy Oliver ogueraha meméta che réra múndo renondépe, ha tupaópe avei. Ha noimo’ãiva’erã ha’e he’ipaitemaha che káusa rehegua; ha péicha, Che aime hendive ipahaite peve.
11 Chepype oguerekóta glória, ha ndaha’éi ijehegui, taha’e tekokangy térã ñemombaretépe, taha’e ñeñapytĩ térã sãsóme;
12 Ha opa ára, ha opa tendápe, ha’e oipe’áta ijuru ha omomarandúta che evanhélio turu ñe’ẽmeguáicha, mokõive, arakue ha pyharekue. Ha ame’ẽta chupe mbarete yvypóra apytépe ojeikuaa’ỹháicha.
13 Ani pejerure milágro, ndaha’éiramo che amandáva peẽme, ndaha’éiramo peguenohẽ hag̃ua aña, pemonguera hag̃ua hasývape, ha pegueropu’aka hag̃ua mbói ipopĩava ha venéno oporojukakuaáva.
14 Ha ndapejapomo’ãi ko’ã mba’e, ndaha’éiramo ojeruréva peẽme umi oipotáva, oñekumpli hag̃ua escritura-kuéra; pejapótagui pe ojehaiháicha.
15 Ha oimeraẽva tenda peikehápe, ha napenemog̃uahẽi hikuái che rérape, pehejáta ñe’ẽngái jehovasa rangue, peityvyróvo umi yvytimbo pende pýgui, hovakekuéra, testimónio ramo, ha pemopotĩ pende py pe tapére.
16 Ha ojehu oimeraẽva omoĩva ipo pende ári mbaretépe, pemandáta tojejopy che rérape; ha, péina ápe, Che ajopýta chupekuéra peẽ peje haguéicha, che araitépe.
17 Ha oimeraẽva léi rupive oñemoĩva pende rehe, pe léi oñemoñe’ẽngáita chupe.
18 Ha ndereguerahamo’ãi vosa, ni vakapi ati’y’arigua, ni yvyra puku popegua, ni mokõi ao; pe tupao ome’ẽtagui peẽme, aravo peikotevẽte jave, tembi’u ha ao, sapatu, pirapire ha vakapi ati’y’arigua.
19 Reñehenóigui rehakã’o mbarete hag̃ua che víña, héẽ, jepeve ipahaite; héẽ, ha avei opa umi reordenava’ekue, ha ojapóta hikuái ko techaukarãme oĩháicha. Amén