1 Pejapysaka Jesucristo ñe’ẽpúre, pene Redentor, pe Tuicha Che Ha’e, pe ijyva poriahuvereko oexpiava’ekue pene angaipakuéra;

2 Máva ombyatýtava itavayguakuéra, jepe ryguasu ombyatyháicha iryguasura’ykuéra umi ipepo guýpe, héẽ, opa ohendúvape che ñe’ẽ ha oñemomirĩva cherenondépe, ha ojeruréva chéve ñembo’e mbaretépe.

3 Péina ápe, añetehápe, añetehápe, Che ha’e peẽme, ko’ág̃a oñeperdonaha peẽme pene angaipakuéra, upévare, pehupyty ko’ã mba’e; ha katu penemandu’áke anive pejapo angaipa, ani hag̃ua ou pende ári ñeimevai.

4 Añetehápe, che ha’e peẽme pejeporavoha múndo apytégui pemomarandu hag̃ua vy’apavẽ púpe che evanhélio, turu ñe’ẽpupeguáicha.

5 Pemopu’ã pene korasõ ha pevy’a, che aimégui penembytépe, ha che ha’e penderehe ojeruréva Túva renondépe; ha ha’e hembipota porã ome’ẽ peẽme pe rréino.

6 Ha ojehaiháicha—Oimeraẽ mba’e jeroviápe pejeruréva, oñeme’ẽta peẽme, pejoajúramo ñembo’épe, che apoukapýpe he’iháicha.

7 Ha peñehenói pejapo hag̃ua umi aiporavova’ekue ñembyaty; umi aiporavova’ekue ohendúgui che ñe’ẽpu ha nomohatãi ikorasõ;

8 Upévare, Túvagui ouva’ekue apoukapy oñembyatytaha chupekuéra peteĩ tendápe añónte ko yvy ape ári, ombosako’i hag̃ua ikorasõ ha oñembosako’i hag̃ua hikuái opa mba’épe, ára oñeñohẽtahápe jeiko’asy ha ñehundi umi iñañáva ári.

9 Pe aravo hi’ag̃uímagui, ha og̃uahẽmbotáma ára pe yvy hi’ajutamahápe; ha opa oñembotuicháva ha umi hembiapoñañáva ha’éta ñana pirúicha; ha ahapypáta chupekuéra, he’i pe Señor de los Ejércitos, ani hag̃ua oĩ tekoñaña ko yvýpe;

10 Pe aravo hi’ag̃uímagui, ha umi che apóstol oñe’ẽva’ekue oñekumpliva’erã; ha’ekuéra he’ihaichaite ojehútagui;

11 Pu’aka ha tuicha glória reheve ajehechaukátagui yvága guive, opa tekoveaty ndive, ha aikóta tekojojápe yvyporakuéra ndive pe yvy ári mil ary, ha umi iñañáva ndogueropu’akamo’ãi.

12 Ha avei, añetehápe, añetehápe, Che ha’e peẽme, ha osẽkuri ñemomarandu mbarete ramo, pe Túva rembipota rupi, che apostolkuéra, umi Dóse oĩva’ekue chendive che ministério aja Jerusalén-pe, oñembo’ýta che akatúape, ára aju vove peteĩ pilar tataguigua ryepýpe, oñemondévo tekojoja ao reheve, koróna iñakã arikuéra reheve, glóriape chéicha jepeve, ohusga hag̃ua opa Israel rogayguápe, héẽ, opa umi cherayhu ha oñongatuva’ekue che rembiapoukapykuéra, ha avave ambuévape.

13 Peteĩ turu ipúta rupi, ipuku ha hatãporã, jepeve Monte Sinaí-peicha, ha opa pe yvy oryrýita, ha osẽta hikuái—héẽ, jepeve umi omanóva, chepype omanova’ekue, ohupyty hag̃ua peteĩ tekojoja koróna, ha oñemonde hag̃ua, cheichaite jepe, oĩ hag̃ua chendive, roñemopeteĩ hag̃ua ore.

14 Ha katu, péina ápe, che ha’e peẽme ko ára guasu og̃uahẽ mboyve, pe kuarahy iñypytũta, ha pe jasýgui oikóta tuguy; ha umi mbyja ho’áta yvágagui, ha oĩta techauka tuichavéva yvate yvágape ha yvýpe yvy ári;

15 Ha oĩta jahe’o ha tasẽ yvypóra atykuéra apytépe;

16 Ha oñemboúta peteĩ yvytu vai guasu amandáu reheve ohundi hag̃ua yvy arigua ñemitỹnguéra.

17 Ha ojehúta, pe múndo rembiapoñaña rupi, añevengáta umi iñañávare, ha’ekuéra noñearrepentírigui; che pochykue kópa henyhẽmágui; ha péina ápe, che ruguy nomopotĩmo’ãi chupekuéra nacherendúiramo.

18 Upévare, Che, pe Tupã Ñandejára, omboúta mberu yvy ape ári, oñakaramátava umi ipype oikóva rehe, ha ho’úta ho’okuéra, ha omongakuaáta umi yso hyepypekuéra;

19 Ha ikũnguéra ojejokuáta ani hag̃ua oñe’ẽvai cherehe; ha umi ho’o ho’áta ikanguekuéragui, ha umi hesa ojeíta hendágui;

20 Ha ojehúta umi mymba ka’aguypegua ha guyra yvyturegua ho’úta chupekuéra.

21 Ha pe tupao tuicha ha ijeja’e’ỹvéva, ha’éva pe hekovaivéva opa yvy ári, ojeitýta tatarendy oporohapývape, oje’e haguéicha proféta Ezequiel juru rupi, oñe’ẽva’ekue ko’ã mba’ére, ne’ĩrava gueteri ojehu, ha katu añetehápe ojehuva’erã, che aikoveháicha, umi tembiapoky’a norreinamo’ãigui.

22 Ha avei, añetehápe, añetehápe, Che ha’e peẽme, pe mil ary opa vove, ha yvyporakuéra oñepyrũ jey onega iTupãme, upérõ aperdonáta pe yvy, ha katu ára mbyky ajánte;

23 Ha oúta pe ipaha, ha pe yvága ha pe yvy oñehundíta ha ndaiporimo’ãvéima, ha oĩta peteĩ yvága pyahu ha peteĩ yvy pyahu.

24 Opa mba’e itujáva opátagui, ha opa mba’e oñembopyahúta, pe yvága ha pe yvy jepe, ha opa ipypeguakuéra, mokõive, yvypóra ha mymbakuéra, umi guyra yvyturegua, ha umi pira yguasupegua.

25 Ha ni peteĩ akãrague, ni michĩmi, noñehundimo’ãi, ha’égui che po apopyre.

26 Ha katu, péina ápe, añetehápe che ha’e peẽme, pe yvy opa mboyve, Miguel, che arkánhel, ombopúta ituru, ha upérõ opa umi omanóva opáyta, umi iñeñotỹha ojepe’átagui, ha ha’ekuéra osẽta—héẽ, jepe opavave;

27 Ha umi hekojojáva oñembyatýta che akatúape, tekove ijapyra’ỹvape g̃uarã; ha umi iñañáva che asúpe, atĩtava ahechakuaa chemba’eha Túva renondépe;

28 Upévare che ha’éta chupekuéra—Pejei che ypýgui, peẽ peñemoñe’ẽngáiva, pe tatarendy opave’ỹvape, oñembosako’iva’ekue pe aña ha hi’anhelkuérape g̃uarã.

29 Ha ko’ág̃a, péina ápe, che ha’e peẽme, araka’eve che nda’eihague che juru rupi ha’ekuéra oujeytaha, ndaikatúigui ou hikuái che aimeháme, ndorekóigui hikuái pu’aka.

30 Ha katu penemandu’áke, ndojeikuaaukaiha yvypórape opa che huisiokuéra; ha umi ñe’ẽ osẽ haguéicha che jurúgui, péicha jepe oñekumplíta, pe itenondéva itapykuéta ha itapykuéva itenondéta, opa mba’e ajapova’ekuépe che pokatu ñe’ẽ rupive, ha’éva che Espíritu pokatu.

31 Che Espíritu pokatu rupive ajapógui umíva; héẽ, opa mba’e, mokõive, espiritual ha temporalva:

32 Umi espiritual raẽve, upéi umi temporalva, ha’éva che rembiapo ñepyrũmby; ha avei, umi temporal raẽve ha upéi umi espiritual, ha’éva che rembiapo paha—

33 Añe’ẽvo peẽme tesakãme peikũmby hag̃ua; ha katu chéve g̃uarã che rembiapokuéra ndopái, ni naiñepyrũmbýi; ha katu ame’ẽ peẽme peikũmby hag̃ua, peporandúgui chéve ha peime peteĩ ñe’ẽme.

34 Upévare, añetehápe Che ha’e peẽme chéve g̃uarã opa mba’e ha’eha espiritual; ha araka’eve name’ẽiva’ekue peẽme peteĩ léi ha’éva temporal; ni avave tekovépe, ni umi yvypóra ra’ykuérape; ni Adán, pende rúpe, máva che ajapova’ekue.

35 Péina ápe, che ame’ẽva’ekue chupe ijehegui isãso hag̃ua; ha ame’ẽva’ekue chupe tembiapoukapykuéra, ha katu mba’eve tembiapoukapy temporal name’ẽi chupe, che rembiapoukapykuéra ha’égui espiritual; umíva ndaha’éi natural ni temporal, ni tete ni to’o potapyvai rehegua.

36 Ha ojehúkuri Adán, oipyra’ãvo chupe pe aña—ha péina ápe, pe aña oikova’ekue Adán mboyve, oñemoĩgui cherehe, he’ívo, Eme’ẽ chéve ndererakuãporã, ha’éva che pokatu; ha avei, mbohapyha pehẽ umi yvagagua tekoveaty omomombyry chehegui, sãso orekóva rupi hikuái oiporavo hag̃ua.

37 Ha oñemombova’ekue chupekuéra iguýpe, ha péicha oiko chuguikuéra pe aña ha hi’anhelkuéra;

38 Ha péina ápe, oĩ peteĩ tenda oñembosako’iva’ekue chupekuéra g̃uarã iñepyrũmby guive, tenda ha’éva añaretã.

39 Ha tekotevẽ pe aña oipy’ara’ã umi yvypóra ra’ykuérape, térã ndaikatumo’ãi isãso hikuái ijehegui; araka’eve ndoguerekóiramo pe iróva, ndaikatumo’ãi oikuaa hikuái pe he’ẽva—

40 Upévare, ojehu pe aña oipy’ara’ã Adán-pe, ha ha’e ho’u pe yva oñembotovéva ha ojapyhara pe tembiapoukapy, ha péicha opyta aña rembipotaguýpe, oñeme’ẽgui jeipy’ara’ãme.

41 Upévare, che, Tupã Ñandejára, amosẽuka chupe Jardín de Edén-gui, che renondégui, ijejapyhara rupi, ha kóvape ha’e omano espiritualmente, ha’éva ñemano peteĩha, jepeve upéichagua ñemano, ha’éva ñemano paha, ha’éva espiritual, ohupytýtava umi iñañávape, che ha’e vove: Pejei, peẽ peñemoñe’ẽngaiva’ekue.

42 Ha katu, péina ápe, che ha’e peẽme, che pe Tupã Ñandejára, ame’ẽva’ekue Adán ha iñemoñarépe, ani hag̃ua ha’ekuéra omano ñemano temporal reheguápe, che, Tupã Ñandejára ambou peve anhelkuéra omomarandu hag̃ua chupekuéra arrepentimiénto ha rredensiõ, ojerovia rupi che Ra’y Unihénito rérare.

43 Ha péicha che, Tupã Ñandejára, ame’ẽ yvypórape ijeipy’ara’ã ára—iñemano natural rupive opu’ã hag̃ua ñemanokuaa’ỹme tekove ijapyra’ỹvape, héẽ, opavave ogueroviáva jepe;

44 Ha umi ndogueroviáiva, kondenasiõ ijapyra’ỹvape; ndaikatúigui oñerredimi chupekuéra ije’a espiritual-gui, noñearrepentíri rupi;

45 Ha’ekuéra ohayhuve pytũmby tesapégui, ha hembiapo ñaña hikuái, ha ha’ekuéra ohupyty hembiapo repy pe máva oñe’ẽrendusévagui.

46 Ha katu péina ápe, che ha’e peẽme, umi mitã michĩ oñerredimiha múndo ñepyrũmby guive, che Unihénito rupive;

47 Upévare, ndaikatúi ojapo hikuái angaipa, noñeme’ẽigui pu’aka Satanáme oipy’ara’ã hag̃ua umi mitã michĩvape, térã oñepyrũ meve hikuái ombohovaikuaa cherenondépe;

48 Oñeme’ẽgui chupekuéra jepe che aipotaháicha, che rembipotápe he’iháicha, tuicha mba’e ojejerure hag̃ua ituvakuéra pógui.

49 Ha avei, Che ha’e peẽme, pe umi oguerekóvape kuaapy namandái ra’e che oñearrepenti hag̃ua?

50 Ha pe ndorekóiva ñeikũmby katu, opyta cherehe ajapo hendive ojehaívape he’iháicha. Ha ko’ág̃a nda’emo’ãvéima peẽme mba’eve ko árape. Amén