Sección 11
Rrevelasiõ oñeme’ẽva’ekue Josẽ Smith upe Proféta rupive, ityke’ýra Hyrum Smith-pe, Harmony, Pensilvania, Mayo 1829-pe. Ko rrevelasiõ oñeme’ẽva’ekue Urim ha Tumim rupive, oñembohovái hag̃ua José jerure’asy ha mba’eporandu. José Smith rembiasakuépe oje’e ko rrevelasiõ oñeme’ẽhague pe Sacerdocio Aarónico ñemoĩjey rire.
1–6, Umi víñape omba’apóva ohupytýta salvasiõ; 7–14, Eheka arandu, erosapukái arrepentimiénto, ejerovia pe Espíriture; 15–22, Eñongatu umi tembiapoukapy, ha eñemoarandu Ñandejára ñe’ẽme, 23–27, Ani enega pe rrevelasiõ ha profesía espíritu; 28–30, Umi Cristo-pe omog̃uahẽvagui oikóta Tupã ra’y ha rajykuéra.
1 Peteĩ tembiapo tuicha ha hechapyrãva oĩ osẽ hag̃uáicha yvypóra ra’ykuéra apytépe.
2 Péina ápe, Che ha’e Tupã; ehendu che ñe’ẽ oikove ha ipu’akapáva, hãimbevéva kysepuku hãimbejováivagui, oikéva omboja’o peve umi kangue joajuha ha karaku; upévare, ehendu che ñe’ẽ.
3 Péina ápe, pe ñu morotĩma ñemono’õrã; upévare, pe omono’õséva, tomoinge ikysekarapã imbarete reheve, ha tomono’õ ára ipuku aja, oñongatu hag̃ua hi’ángape g̃uarã salvasiõ opave’ỹva Tupã rréinope.
4 Héẽ, oimeraẽva omoingéva ikysekarapã ha omono’õva, péva oñehenói Tupãgui.
5 Upévare, pejeruréramo chéve, oñeme’ẽta peẽme; pembotáramo ojepe’áta peẽme.
6 Ko’ág̃a, rejerure haguére, péina ápe, ha’e ndéve, eñongatu umi che rembiapoukapy, ha eñeha’ã eguenohẽ tesakãme ha emopu’ã Sion káusa.
7 Ani reheka rrikésa ha katu arandu; ha, péina ápe, umi Tupã ñemimby ojeikaaukáta ndéve, ha upérõ nderríkota. Péina ápe, pe oguerekóva tekove ijapyra’ỹva irríko.
8 Añetehápe, añetehápe Che ha’e ndéve, jepe reipotaháicha chehegui, oñeme’ẽta ndéve; ha reipotáramo, nde ha’éta tembiporu rejapo hag̃ua heta mba’e porã ko ñemoñareatýpe.
9 Ani rembo’e mba’eve ko ñemoñareatýpe, ndaha’éiramo arrepentimiénto. Eñongatu umi che rembiapoukapy, ha eipytyvõ toñeguenohẽ tesakãme che rembiapo, che rembiapoukapýpe oĩháicha, ha rejehovasáta.
10 Péina ápe, reguereko peteĩ don, térã reguerekóta peteĩ don, jerovia reheve chehegui reipotáramo, korasõ japu’ỹ reheve, regueroviávo Jesucristo pokatu, térã che pokatu oñe’ẽva ndéve;
11 Péina ápe, Che ha’égui pe añe’ẽva; péina ápe, Che ha’e pe tesape pytũmbýpe omimbíva, ha che pokatu rupive che ame’ẽ ndéve ko’ã ñe’ẽ.
12 Ha ko’ág̃a, añetehápe, añetehápe, Che ha’e ndéve, emoĩ nde jerovia upe Espíriture, mba’e porã apoukaha—héẽ, ijojáva ojejapo hag̃ua, tekomirĩme ojeiko hag̃ua, tekojojápe ojehusga hag̃ua; ha kóva ha’e che Espíritu.
13 Añetehápe, añetehápe, Che ha’e ndéve, ame’ẽtaha ndéve che Espíritu-gui, omyesakãtava ne akã ha omyenyhẽtava ne ánga vy’apavẽgui;
14 Ha upérõ reikuaáta, térã péva rupi reikuaáta, opa mba’e chehegui reipotáva, ha’éva tekojoja rehegua, jerovia reheve, chéve chegueroviávo rehupytytaha.
15 Péina ápe, Che amanda ndéve ani hag̃ua reimo’ã reñehenoiha rembo’e hag̃ua, térã reñehenói peve.
16 Eha’arõve sapy’ami, reguereko peve che ñe’ẽ, che itaguasu, che tupao, ha che evanhélio, reikuaaporã hag̃ua che doctrina.
17 Ha upérõ, péina ápe, nde reipotaháicha, héẽ, rejeroviaháicha jepe, ojehúta nendive.
18 Eñongatu che rembiapoukapykuéra; ekirirĩ; eheka che Espíritu;
19 Héẽ, ejejoko cherehe ne korasõite reheve, reipytyvõ hag̃ua toñeguenohẽ umi mba’e oñeñe’ẽ haguégui—héẽ, che rembiapo ñembohasa; eha’arõmi rehupyty peve.
20 Péina ápe, kóva ha’e ne rembiaporã, eñongatu che rembiapoukapykuéra, héẽ, opa nde pu’aka, ne akã ha ne mbarete reheve.
21 Ani reñeha’ã remombe’u che ñe’ẽ, eñeha’ã uvei ehupyty raẽ hag̃ua che ñe’ẽ, ha upérõ, ne kũ ojeráta; ha upéi, reipotáramo, reguerekóta che Espíritu ha che ñe’ẽ, héẽ, Tupã pokatu reipy’amovã hag̃ua yvyporakuérape.
22 Ha katu ko’ág̃a ekirirĩ; eñemoarandu che ñe’ẽme, osẽva’ekue yvypóra ra’ykuéra apytépe, ha eñemoarandu avei che ñe’ẽme osẽtava yvypóra ra’ykuéra apytépe, térã pe ko’ág̃a oñembohasavahína, héẽ, rehupyty peve opa mba’e ame’ẽtava yvypóra ra’ykuérape ko ñemoñareatýpe, ha upérõ oñemoĩta opa mba’e ko’ãva ndive.
23 Péina ápe, nde ha’e Hyrum, che ra’y; eheka pe Tupã rréino, ha opa mba’e oñemoĩvéta ijojaháicha.
24 Emopu’ã che itaguasu ári, ha’éva che evanhélio;
25 Ani renega pe rrevelasiõ espíritu, ni pe profesía espíritu, ái pe máva ko’ã mba’e onegávagui;
26 Upévare, eñongatu ne korasõme, og̃uahẽ meve ára che arandúpe, resẽva’erãha.
27 Péina ápe, Che añe’ẽ opavavépe ojaposéva iporãva, ha omoingéva ikysekarapã omono’õ hag̃ua.
28 Péina ápe, Che ha’e Jesucristo, Tupã Ra’y. Che ha’e pe múndo resape ha rekove.
29 Chete pe ajuva’ekue umi chemba’évape, ha umi chemba’éva nachemog̃uahẽi;
30 Ha katu añetehápe, añetehápe, che ha’e ndéve, mayma chemog̃uahẽvape, umívape che ame’ẽta pu’aka ha’e hag̃ua Tupã ra’y ha rajykuéra, umi che réra ogueroviávape jepe. Amén.