Sección 25
Rrevelasiõ oñemeʼẽvaʼekue José Smith, pe Proféta rupive, Harmony, Pensilvania-pe, Julio 1830-pe (tojehecha sección 24 moñepyrũ). Ko rrevelasiõ ohechauka Ñandejára rembipota Emma Smith, pe Proféta rembirekópe g̃uarã.
1–6, Emma Smith, kuña poravopyre, oñehenói oipytyvõ ha omoangapyhy hag̃ua iména; 7–11, Oñehenói avei chupe ohai hag̃ua, omyesakã hag̃ua umi escritura ha oiporavo hag̃ua umi himno; 12–14, Umi hekojojáva purahéi haʼe peteĩ ñemboʼe Ñandejárape; 15–16, Ñeʼẽrendu principio ko rrevelasiõmegua haʼe opavavépe g̃uarã.
1 Ehendu Ñandejára ne Tupã ñeʼẽ, añeʼẽ aja ndéve, Emma Smith, che rajy; añetehápe haʼégui ndéve, mayma omoguahẽva che evanhélio haʼe taʼýra ha tajýra che rréinope.
2 Ameʼẽ ndéve peteĩ rrevelasiõ che rembipota rehegua; ha ndejeroviareko ha reguatáramo virtu rapére che renondépe, amoʼãta nde rekove ha rehupytýta peteĩ jehejapyre Sion-pe.
3 Péina ápe, oñeperdona ne angaipakuéra, ha nde haʼe peteĩ kuña poravopyre, che ahenoivaʼekue.
4 Ani rekaguai umi mbaʼe nderehechaivaʼekue rupi, oñeñongatúgui ndehegui ha múndogui, che arandúpe, peteĩ ára oútavape.
5 Ha ne llamamiento oficio haʼéta haʼe hag̃ua peteĩ angapyhy che rembiguái José Smith, pe taʼýrape g̃uarã, ne ména, ijehasaʼasýpe, pyʼaguapy rehegua ñeʼẽ reheve, tekomarangatu espíritupe.
6 Ha rehóta hendive ára osẽ jave, ha haʼéta ihaihára, ndaipóri jave ambue ohaíva chupe g̃uarã, amondo hag̃ua che rembiguái Oliver Cowdery-pe che aipotahápe.
7 Ha reñeordenáta ipo rupi remyesakã hag̃ua umi escritura, ha reñemoñeʼẽ hag̃ua tupaópe, oñemeʼẽháicha ndéve che Espíritu rupive.
8 Omoĩtagui ipo ne akã ári, ha rehupytýta pe Espíritu Santo, ha nde ára reiporúta rehai ha heta reñehekombaʼe hag̃ua.
9 Ha ndaipóri mbaʼére rekyhyje hag̃ua, ne ména oñangarekótagui nderehe tupaópe; chupekuéra g̃uarã haʼégui illamamiento, ojehechauka hag̃ua chupekuéra opa mbaʼe che aipotáva, ojeroviaháicha hikuái.
10 Ha añetehápe haʼe ndéve rehejáta umi mbaʼe ko mundogua ha rehekáta peteĩ iporãvéva.
11 Ha oñemeʼẽta avei ndéve reiporavo hag̃ua umi himno sagrádo, ojehechaukaháicha ndéve, che tupaópe g̃uarã, ha péva che arohory.
12 Che ánga horýgui korasõ purahéipe; heẽ, umi hekojojáva purahéi haʼe peteĩ ñemboʼe chéve g̃uarã, ha oñembohováita peteĩ jehovasa reheve iñakãʼarikuéra.
13 Upévare, emopuʼã ne korasõ ha evyʼa, ha eñongatu umi konvénio ejapovaʼekue.
14 Eho meme espíritu rekomarangatúpe, ha eñeñangareko orgúllogui. Tahory ne ánga ne ménape ha pe glória ohupytýtavape.
15 Eñongatu meme che rembiapoukapykuéra, ha peteĩ hustísia koróna oñemeʼẽta ndéve. Ha kova nderejapóiramo, ndaikatumoʼãi reju che aimeháme.
16 Ha añetehápe, añetehápe, haʼe ndéve, kóva haʼeha che ñeʼẽ opavavépe. Amén.