1 Añetehápe Che ha’e ndéve, nde joyke’ykuérare, oñembohasa’asyva’ekue, oñemuña ha oñemosẽva’ekue ijyvy jehejapyrégui—

2 Che, Ñandejára, ahejákuri ou hi’arikuéra jeiko’asy, oñembohasa’asyva’ekuépe, ijejapyharakuéra rupi;

3 Upevére, Che aguerekóta chupekuéra, ha chemba’éta hikuái pe ára Che aju vove ambyaty hag̃ua umi che jeguaka.

4 Upévare, tekotevẽ ojehavira ha ojeipy’ara’ã hikuái, jepe Abraham-cha, oñemandava’ekuépe oikuave’ẽ hag̃ua ita’ýra peteĩmi.

5 Opa umi ndogueropu’akaséiva jehavira, ha katu chenega, ndaikatúi oñesantifika.

6 Péina ápe, Che ha’e ndéve oĩhague ijapytepekuéra jeikovai, ha ñorairõ ha jerekose, ha joavy, ha tete potapy ha potapyvai; upévare ko’ã mba’e rupi, omongy’a hikuái ijehejapyrekuéra.

7 Imbeguékuri hikuái ohendu hag̃ua Ñandejára Itupã ñe’ẽpu; upévare, Ñandejára Itupã imbegue ohendu hag̃ua iñembo’ekuéra, ha ombohovái hag̃ua chupekuéra ijejopyvai árape.

8 Ipy’aguapy árape omomba’e’i hikuái che ñemoñe’ẽ; ha katu, ijejopyvai árape, oikotevẽ rupi chereka hikuái.

9 Añetehápe Che ha’e ndéve, jepeve umi iñangaipakuéra, che ryepy henyhẽ poriahuverekógui hesekuéra. Che ndapoipamo’ãi chuguikuéra, ha pe ñeko’õi árape chemandu’áta poriahuverekóre.

10 Che ahurákuri, ha oje’ékuri peteĩ tembiapoukapýpe, Che ame’ẽva’ekue ndéve upe mboyve, ahejataha ho’a che pochykue kysepuku che tavayguakuéra ñeimeporãrã; ha Che ha’e haguéicha jepe, oikóta.

11 Che pochykue pya’e oñeñohẽ hetáta opa tetãnguéra ári; ha Che ajapóta kóva hembiapovaikuéra kópa henyhẽ vove.

12 Ha upe ára opa ojejuhúva pe atalája ári, térã ambue ñe’ẽme, opa che Israel, ojesalváta.

13 Ha umi oñemosarambiva’ekue oñembyatýta.

14 Ha opa umi ojahe’ova’ekue oñemoangapyhýta.

15 Ha opa umi ome’ẽva’ekue hekove che rérare oñekoronáta.

16 Upévare, taiñangapyhy pene korasõ Sion rehe; opa yvypóra oĩgui che pópe; pepyta py’aguapýpe ha peikuaa Che ha’eha Tupã.

17 Sion noñemongu’emo’ãi hendágui, ita’yrakuéra oñemosarambirõ jepeve.

18 Umi opytáva ha ikorasõ potĩva ou jeýta ijehejapyrekuérape, ha’ekuéra ha ita’yrakuéra, vy’apavẽ opave’ỹva purahéi reheve, omopu’ã hag̃ua umi Sion renda itaperéva—

19 Ha opa ko’ã mba’e profetakuéra oñekumpli hag̃ua.

20 Ha péina ápe, noñeme’ẽikuri ambue tenda ndaha’éirõ pe Che ahechaukava’ekue; ni noñeme’ẽmo’ãi ambue tenda, ndaha’éirõ pe Che ahechaukava’ekue, tembiaporã che santokuéra ñembyaty rehegua—

21 Og̃uahẽ meve ára ndaiporiveimaha tenda chupekuéra g̃uarã; ha upérõ Che ahechaukáta chupekuéra ambue tenda Che arekóva, ha oñehenóita estakakuéra, umi kortína térã Sion ñemombareterã.

22 Péina ápe, che aipota opa umi ohenóiva che réra, ha chetupãitũva, che evanhélio opave’ỹvape he’iháicha, toñembyaty ha topyta tendakuéra marangatúpe;

23 Ha toñembosako’i pe rrevelasiõ oútavape g̃uarã, pe vélo ojaho’íva che témplo, che tavernákulope, pe yvy oñomíva, ojepe’áta vove, ha opa tete cherecha joaitéta.

24 Ha opa mba’e oñembyaikuaáva, taha’e yvypóra térã mymba ñumegua, umi guyra yvytugua térã umi pira yguasupegua, oikóva yvy ape ári, oñehundíta;

25 Ha avei umi eleménto rehegua hykúta hakuetereígui; ha opa mba’e oñembopyahúta, che kuaapy ha che glória oiko hag̃ua opa yvy ári.

26 Ha upe árape yvypóra jehayhu’ỹ, ha mymbakuéra jehayhu’ỹ, héẽ, opa tete jehayhu’ỹ, opáta che rova renondépe.

27 Ha upe árape oimeraẽ tekove ojerurévape, oñeme’ẽta;

28 Ha upe árape Satana ndaipu’akamo’ãi oipy’ara’ã hag̃ua avave tekovépe.

29 Ha ndaiporimo’ãi vy’a’ỹ, ndaiporimo’ãigui ñemano.

30 Ha upe árape mitã nomanomo’ãi ndaha’éirõ ituja peve; ha hekove ha’éta peteĩ yvyramáta rekovéicha;

31 Ha omano vove, ndokemo’ãi, upéva he’ise, yvýpe, ha katu oñemoambuéta peteĩ tesa pirĩme; ha ojehupíta yvate, ha ipytu’u igloriósota.

32 Héẽ, añetehápe Che ha’e ndéve, pe ára Ñandejára ou vove, ha’e oikuaaukáta opa mba’e—

33 Umi mba’e ojehuva’ekue, ha umi mba’e ñemi avave tekove oikuaava’ekue; umi mba’e yvypegua, ojejapohague rupive, ha mba’erãpa oiko ha iñeime paha—

34 Umi mba’e hepyetéva, umi mba’e yvategua, ha umi mba’e iguypegua; umi mba’e oĩva yvýpe ha yvy ári, ha yvágape.

35 Ha opa umi ohasáva ñemuña che rérare, ha ogueropu’akáva jeroviápe, oñehenóirõ jepe ome’ẽ hag̃ua hekove che rehehápe, péicharõ jepe, ohupytýta hikuái opa ko’ã glóriagui.

36 Upévare, ani pekyhyje ñemanógui jepeve; ko múndope noĩmbáigui pende vy’apavẽ, ha katu chepype pende vy’apavẽ oĩmba.

37 Upévare, ani pejepy’apy upe tetére, ni pe tete rekovére; ha katu pejepy’apy pe ángare, ha pe ánga rekovére.

38 Ha akóinte peheka Ñandejára rova, peñongatu hag̃ua pene ánga ñeha’arõkuaápe, ha pehupytýta tekove ijapyra’ỹva.

39 Tekovekuéra oñehenói vove che evanhélio opave’ỹvape, ha ojapo konvénio peteĩ konvénio opave’ỹva reheve, ojehecha chupekuéra yvy arigua jukýicha ha tekovekuéra ñemohe’ẽháicha;

40 Oñehenói chupekuéra ha’e hag̃ua tekovekuéra ñemohe’ẽha; ha upévare, pe juky yvy ariguágui opáramo he’ẽngue, péina ápe, upe guive naiporãmo’ãvéima mba’everã, ndaha’éiramo oñemombo hag̃ua okápe ha oñepyrũmba hag̃ua tekovekuéra py guýpe.

41 Péina ápe, kóvape oĩ arandu, jepe heta Sion ra’ykuéra rehegua, ha katu ndaha’éi opavave; ojejuhúguikuri ha’eha hikuái ojapyharáva, upévare tekotevẽ ojehavira chupekuéra—

42 Pe oñembotuicháva oñemomirĩta; ha pe oñemomirĩva oñembotuicháta.

43 Ha ko’ág̃a, Che ha’éta peẽme peteĩ parávola peikuaa hag̃ua che rembipota Sion rredensiõ rehegua.

44 Peteĩ noble orekova’ekue peteĩ yvy renda, iporavopyréva; ha he’i hembiguaikuérape: Tapeho che víñape, héẽ, pe yvy ojeiporavoitévape, ha peñotỹ dóse olívo máta;

45 Ha pemoĩ ñangarekohára ijerére, ha pemopu’ã peteĩ tórre, oĩ hag̃ua peteĩ omañáva pe yvy jerére, ha’e hag̃ua pe tórre ñangarekohára, ani hag̃ua ojeity umi che olívo máta ou vove pe oporohayhu’ỹva, omonda ha ojapyhy hag̃ua imba’erã che viña’a.

46 Ko’ág̃a, pe noble rembiguaikuéra oho ha ojapo ijára omandava’ekue chupekuéra, ha oñotỹ umi olívo máta, ha omopu’ã korapy ijerére, ha omoĩ ñangarekohára, ha oñepyrũ omopu’ã peteĩ tórre.

47 Ha omoĩ aja gueteri hikuái umi pyenda, oñepyrũ he’i hikuái ojupe: Ha maerãpa che jára oikotevẽ ko tórre?

48 Ha oñeporandu hikuái ojupe heta ára pukukue, he’ívo: Mba’érepa che jára oikotevẽ ko tórre, ha’évo kóva py’aguapy ára?

49 Ndaikatúipa oñeme’ẽ ko pirapire umi kambístape? Natekotevẽigui ko’ã mba’e.

50 Ha ojoavy aja hikuái oñondive, oñepyrũ hekorei, ha ndojapysakái hikuái ijára rembiapoukapýre.

51 Ha pyharekue ou pe oporohayhu’ỹva, ha oity pe ikorapy jere; ha pe noble rembiguaikuéra opu’ãkuri kyhyjépe ha oñani; ha pe oporohayhu’ỹva ohundi hembiapokuéra ha oity umi olívo máta.

52 Ko’ág̃a, péina ápe, pe noble, upe víña jára, ou ohecha hembiguaikuérape, ha he’i chupekuéra: Mba’éicha piko! mba’épa ogueru ko tuichaite mba’evai?

53 Ndaikatúipa pejapóra’e pe Che amandava’ekue peẽme, ha—peñotỹ rire pe víña, ha pemopu’ã pe korapy ha pemoĩ ñangarekohára umi tápia ári—pemopu’ã avei pe tórre, ha pemoĩ peteĩ ñangarekohára upe tórre ári ha peñangareko che víñare ani hag̃ua ou pende ári pe oporohayhu’ỹva, pepytarangue peke?

54 Ha péina ápe, upe tórre ñangarekohára ohechátakuri pe oporohayhu’ỹva imombyrývo gueteri; ha upérõ ikatútakuri peñembosako’i ha ndapehejái pe oporohayhu’ỹva oity pe korapy jere, ha pesalva che víña pe porohundihára pógui.

55 Ha pe víña jára he’i peteĩva umi hembiguáipe: Tereho ha embyaty che rembiguaikuéra rembyre, ha ejapyhy opa mbarete che rogapegua, ha’éva che ñorairõharakuéra, che mitãrusukuéra ha avei umi kakuaa opa che rembiguaikuéra apytégui, ha’éva che róga mbarete, ndaha’éirõ umi Che ha’eva’ekue opyta hag̃ua;

56 Ha tapeho ko’ag̃aite che víña retãme ha perredimi che víña, che mba’égui; Che ajoguava’ekue pirapire reheve.

57 Upévare, tapeho ko’ag̃aite che retãme; peity umi cherayhu’ỹha tápia; peity yvýpe itórre, ha pemosarambi umi iñangarekohára.

58 Ha oñembyatýrõ hikuái penderehe, chevenga umi che rayhu’ỹvagui, pya’ete Che aju hag̃ua che róga rembyréndi aiko hag̃ua ko tetãme.

59 Ha pe tembiguái he’i ijárape: Araka’épa oikóne ko’ã mba’e?

60 Ha ha’e ombohovái hembiguáipe: Che aipota vove; pya’e tereho, ha ejapo opa mba’e Che amandava’ekue ndéve;

61 Ha kóva ha’éta che séllo ha jehovasa nde ári—peteĩ majordómo ijeroviareko ha iñarandúva che róga mbytépe, peteĩ sãmbyhyhára che rréinope.

62 Ha upepete osẽ pe hembiguái, ha ojapo opa mba’e ijára omandava’ekue chupe; ha heta ára rire opa mba’e oñekumplíkuri.

63 Ha avei, añetehápe Che ha’e peẽme, ahechaukáta peẽme che arandu opa tupaokuéra rehegua, oĩporãramo hikuái oñeisãmbyhyka hag̃ua, joja ha hekópe, isalvasiõrã—

64 Pe tembiapo che santokuéra ñembyatyrã oho meme hag̃ua, Che amoĩ hag̃ua chupekuéra che rérape umi tenda marangatúpe; ñemono’õ ára og̃uahẽmagui, ha tekotevẽ oñekumpli che ñe’ẽ.

65 Upévare, Che ambyatyva’erã che tavayguakuérape, pe trígo ha ñana paravolapeguáicha, oñeñongatu hag̃ua pe trígo umi granérope ikatu hag̃ua oreko tekove ijapyra’ỹva, ha oñekorona hikuái glória celestial reheve, Che aju vove che Ru rréinope ambojopói hag̃ua peteĩteĩ tekovépe hembiapo haguéicha;

66 Ha pe ñanavai katu ojejokuaáta apesãme, ha umi ijokuaha imbaretéta, ojehapy hag̃ua tatarendy ogue’ỹvape.

67 Upévare, peteĩ tembiapoukapy Che ame’ẽ opa tupaokuérape, oñembyaty memetaha hikuái umi tenda Che ha’e haguépe.

68 Upevére, Che ha’e haguéicha peẽme peteĩ tembiapoukapy mboyvépe, aníke ojejapo pene ñembyaty pya’épe ni sarambípe; ha katu toñembosako’i opa mba’e pene renondépe.

69 Ha opa mba’e oñembosako’i hag̃ua pene renondépe, peñongatu pe tembiapoukapy Che ame’ẽva’ekue ko’ã mba’e rehegua—

70 He’i térã ombo’éva, ojejogua hag̃ua opa umi yvy pirapirére, umi ikatúva ojejogua pirapirére, umi tenda oĩva upe tetã jerére, Che ha’eva’ekue ha’etaha Sion retã, che santokuéra ñembyaty ñepyrũrã;

71 Opa yvy ikatúva ojejogua Jackon kondádope, ha umi kondádo ijerereguápe, ha peheja che pópe hembýva.

72 Ko’ág̃a, añetehápe Che ha’e peẽme, tombyaty opa tupao ipirapirekuéra; tojejapo ko’ã mba’e hi’árape, ha katu ndaha’éi pya’e; ha peñeha’ã peguereko ñembosako’ípe opa mba’e pene renondépe.

73 Toñehenói kuimba’e herakuãporãva, kuimba’e iñarandúva jepeve, ha pembou chupekuéra ojogua hag̃ua ko’ã yvy.

74 Ha umi tupao kuarahyresẽmegua, oñemopu’ã rire, ohendúramo ko’ã ñemoñe’ẽ, ikatúta ojogua umi yvy ha oñembyaty umívape; ha péicha ikatúta omopu’ã hikuái Sion.

75 Ko’ág̃a voi oĩma ñongatupy ohupyty hag̃uáicha, héẽ, hetaiterei jepe, oñerredimi hag̃ua Sion, ha oñemopu’ã hag̃ua umi henda nandi, anivéma hag̃ua ojeity, umi tupao che réra ogueraháva oĩramo ohendu hag̃uáicha che ñe’ẽpu.

76 Ha avei Che ha’e peẽme, che aipota umi oñemosarambiva’ekue ihayhu’ỹhakuérare, toñeha’ã meme ohupyty hag̃ua ñemyengovia ha rredensiõ, umi peneisãmbyhýva po rupive ha orekóva pu’aka penderehe—

77 Tavayguakuéra léi ha kostitusiõme he’iháicha, Che ahejava’ekue oñemoĩ, ha oñemanteneva’erã opa tete derécho ha ñemo’ãrã, umi prinsípio ijoja ha imarangatúvape oĩháicha;

78 Peteĩteĩ tekove oiko hag̃ua doctrina ha principio ára tenonderãmeguápe, sãso tekopotĩ rehegua Che ame’ẽva’ekuéicha, opa tekove ombohovái hag̃ua iñangaipa teére huísio árape.

79 Upévare, ndaijojái peteĩ tekove toĩ ambue poguýpe.

80 Ha upevarã Che amoĩva’ekue ko tetãmegua Kostitusiõ, umi kuimba’e iñarandúva po rupive, Che amopu’ãva’ekue upevarãite, ha arredimíkuri pe yvy tuguy ñeñohẽ rupive.

81 Ko’ág̃a, mba’épepa ambojojáta Sion ra’ykuérape? Ambojojáta chupekuéra kuña ha hue ijoja’ỹva parávolare, tekovekuéra akóinte oñembo’eva’erãgui ha naikangyiva’erã, kóicha he’íva—

82 Oĩva’ekue peteĩ távape peteĩ hue ndokyhyjéiva Tupãgui, ni ndorrespetáiva yvypórape.

83 Ha oĩva’ekue avei upe távape peteĩ viúda, ha ou hendápe, he’ívo: Chevengamína che rayhu’ỹhakuéragui.

84 Ha ndojaposéikuri ára aja, ha katu upéi he’i ijupe: Ndakyhyjéirõ jepe Tupãgui ni ndarrespetái yvypórape; upevére, ko viúda chemoangekóigui, Che avengáta chupe, ani ou memégui chemonguerái.

85 Péicha ambojojáta Sion ra’ykuérape.

86 Pejerure meme pe hue py gotyo;

87 Ha péva nopenáirõ penderehe, pejerure meme upe governador py gotyo;

88 Ha pe governador nopenáirõ penderehe, pejerure meme upe presidente po gotyo;

89 Ha pe presidente nopenáirõ penderehe, upérõ opu’ãta Ñandejára ha osẽta hekoha ñemígui, ha ipochýpe ojopýta upe tetã;

90 Ha ipochy tuicha ha ipochy vaípe oipe’áta, hi’árape, umi majordómo hekoñañávape, ijeroviareko’ỹva ha hekojoja’ỹva, ha ome’ẽta chupekuéra hendag̃ua umi hovamokõi ha umi oguerovia’ỹva apytépe;

91 Héẽ, umi pytũmby okapeguápe, oĩháme tasẽ ha pyahẽvai, ha tái ñembopururũ.

92 Peñembo’e, upévare, og̃uahẽ hag̃ua ijapysápe umi pende jerure’asy, Che aiporiahuvereko hag̃ua chupekuéra ani hag̃ua ou hi’arikuéra ko’ã mba’e.

93 Pe Che ha’eva’ekue peẽme ojehuva’erã, opa tekove opyta hag̃ua excusa-ỹre;

94 Umi kuimba’e iñarandúva ha mburuvichakuéra ohendu ha oikuaa hag̃ua umi araka’eve noikũmbyiva’ekue;

95 Che ajapo hag̃ua che rembiapo, che rembiapo ojeikuaa’ỹva, ha ajapo hag̃ua che rembiaporã, che rembiaporã ojeikuaa’ỹva, yvyporakuéra ohechakuaa hag̃ua umi hekojojáva hekoñañávagui, he’i pende Tupã.

96 Ha avei Che ha’e peẽme, oñemoĩ che rembiapoukapy ha che rembipota rehe che rembiguái Sidney Gilbert tovende che almasẽ umi che rayhu’ỹvape, Che ame’ẽva’ekue che tavayguakuérape g̃uarã.

97 Aníke oñemongy’a pe Che ame’ẽva’ekue umi cherayhu’ỹvare, umi che réra ogueraháva omboaje rupive;

98 Ha’égui kóva peteĩ angaipa vaiete ha ipohyietéva cherehe ha che tavayguakuéra rehe, umi mba’e Che ha’eva’ekue rupive, ha pya’e oútava tetãnguérape.

99 Upévare, che aipota che tavayguakuéra tojerure ha toñongatu iderécho umi Che ha’eva’ekue chupekuéra, ndojehejáirõ jepe oiko hikuái upépe.

100 Upevére, Che nda’éi ndoikomo’ãiha hikuái upépe; oguerúramo hikuái yva iporãva ha tembiapo ijojáva che rréinope, oikóta hikuái upépe.

101 Ojogapóta hikuái, ha ambuévape ndojehejamo’ãi; oñotỹta hikuái umi víña, ha ho’úta hikuái hi’águi. Taupéicha. Amén