Sección 130
Tekombo’e rehegua mba’ekuéra oñeme’ẽva’ekue José Smith upe Proféta rupive, Ramus, Illinois-pe, abril 2, 1843-pe
1–3, Túva ha Ta’ýra ojehechaukakuaa ijeheguiete yvyporakuérape; 4–7, Anhelkuéra oikove peteĩ esfera celestial-pe; 8–9, Tierra celestial ha’éta peteĩ Urim ha Tumim tuicháva; 10–11, Opa oikéva mundo celestial-pe oñeme’ẽ peteĩ ita morotĩ; 12–17, Ndojeikuaaukái Profétape upe Jeju Mokõiha aravo; 18–19, Pe intelihénsia jahupytýva ko tekovépe, opu’ãta ñanendive upe Jeikovejeýpe; 20–21, Opa jehovasakuéra ojehupyty léire ñe’ẽrendu rupive; 22–23, Túva ha Ta’ýra oguereko hikuái hete to’o ha kangueguigua.
1 Salvador ojehechauka vove, jahecháta chupe ha’eháicha. Jahecháta ha’e ha’eha peteĩ kuimba’e ñandeichagua.
2 Ha upe tekorory oĩva ñande apytépe ko’ápe, oĩta ñande apytépe upépe; ha katu oñemoirũta peteĩ glória ijapyra’ỹva reheve, glória ñande jaikuaa’ỹva ko’ág̃a.
3 Juan 14:23—Pe Túva ha Ta’ýra jehechauka, ko versíkulope, ha’e peteĩ jehechauka ijeheguíva; ha upe oje’éva, pe Túva ha pe Ta’ýra oikoha yvypóra korasõme, ha’e peteĩ secta-gua mbo’epy yma, ha japu.
4 Ambohováivo upe porandu—Ndojeipapáipa Tupã ára, anhelkuéra ára, profetakuéra ára, ha yvyporakuéra ára, pe planéta oikoháicha hikuái?
5 Che ambohovái, Héẽ. Ha katu ndaipóri anhelkuéra oministráva ko yvy ári, ndaha’éirõ umi upepeguáva térã ha’eva’ekue upepegua.
6 Anhelkuéra ndoikói peteĩ planéta ko yvy arichaguápe;
7 Ha katu oiko hikuái Tupã renondépe, peteĩ glóvo ojoguáva yguasu vidrio ha tataguiguápe, opa mba’e igloriarã ojehechaukahápe, ohasámava, ko’ag̃agua ha oútava ha oĩ meméva Ñandejára renondépe.
8 Upe tenda Tupã oikohápe ha’e peteĩ Urim ha Tumim guasu.
9 Ko yvy, ijestádo santifikádo ha manokuaa’ỹme, ha’éta upe kristalcha, ha ha’éta peteĩ Urim ha Tumim umi ipype oikóvape, ojeikuaaukataha rupive, opa mba’e ha’éva peteĩ rréino michĩvéva, térã opa rréino órden menor-guáva umi ipype oikóvape; ha ko yvy ha’éta Cristo mba’e.
10 Upérõ upe ita morotĩ, oñeñe’ẽvare Apocalipsis 2:17-pe, oikóta peteĩ Urim ha Tumim opa umi tekove oñeme’ẽvape g̃uarã peteĩ, ha upéva rupive ojeikuaaukáta mba’ekuéra ha’éva peteĩ órden superior-gua.
11 Ha opavave reino celestial-pe oikévape oñeme’ẽ peteĩ ita morotĩ, ojehaihápe peteĩ téra pyahu avave oikuaa’ỹva, ndaha’éirõ pe ohupytýva. Upe téra pyahu ha’e upe ñe’ẽ kláve.
12 Che aprofetisa, Tupã Ñandejára rérape, umi mba’evai oguerútava heta tuguy ñeñohẽ pe Kuimba’e Ra’y jeju mboyve, oñepyrũtaha Carolina del Sur-pe.
13 Ikatúne ou esklavokuéra rehegua mba’evai rupi. Kóva peteĩ ñe’ẽpu omombe’u chéve, añembo’e añetérõguare upe mba’ére, diciembre 25, 1832-pe.
14 Peteĩ ára añembo’érõguare chepy’aite guive aikuaa hag̃ua pe Kuimba’e Ra’y jeju aravo, ahendu peteĩ ñe’ẽpu he’i jeyjeýva chéve kóva:
15 José, che ra’y, reikovérõ rehupyty peve 85 áño, rehecháta pe Kuimba’e Ra’y rova; upévare, taiporãma kóva ndéve g̃uarã, ha anivéma chemyangekói ko mba’ére.
16 Ha péicha apyta, ikatu’ỹme aikuaa ko jeju oñe’ẽpa upe milénio ñepyrũmbýre, térã ambue jehechauka upe mboyveguarére, térã chépa amanova’erã ha péicha ahecha hova.
17 Che arovia pe Kuimba’e Ra’y jeju ndoikomo’ãiha upe ára mboyve.
18 Oimeraẽ intelihénsia jahupytýva ko tekovépe, opu’ãta ñanendive jeikovejeýpe.
19 Ha peteĩ tekove ohupytyvéramo kuaapy ha intelihénsia ambuévagui, ijesareko ha iñe’ẽrendu rupi, upe grádo peve ha’e oguerekóta ventáha múndo oútavape.
20 Oĩ peteĩ léi, oñemoambuekuaa’ỹva yvágape, oñemoĩva’ekue ko múndo ojejapo mboyve, opa jehovasa oñemopyendaha ári—
21 Ha jahupyty vove peteĩ jehovasa Tupãgui, ha’e ñaneñe’ẽrendúgui upe léi oñemopyendávare.
22 Pe Túva oguereko peteĩ tete to’o ha kangueguigua, ikatúvare ojepoko yvypóra oguerekoháicha; avei pe Ta’ýra; ha katu pe Espíritu Santo ndoguerekói peteĩ tete to’o ha kangueguigua, ha katu ha’e peteĩ tekove Espíritu-guigua. Upeicha’ỹramo, pe Espíritu Santo ndaikatumo’ãi oiko ñandepype.
23 Peteĩ yvypóra ikatu ohupyty pe Espíritu Santo, ha kóva ikatu oguejy hi’ári ha ndopytái hendive.