1 Añetehápe, añetehápe, Che ha’e peẽme, Che, pe añe’ẽva che Espíritu ñe’ẽpu rupive, jepeve Alfa ha Omega, pene Ñandejára ha pende Tupã—

2 Pejapysaka, O peẽ, peme’ẽva’ekue pende réra pesẽ hag̃ua pemomarandu che evanhélio; ha pehakã’o che víña.

3 Péina ápe, Che ha’e peẽme, ha’eha che rembipota tapesẽ ha ani pembotapykue, ani hag̃ua penderekorei, ha katu pemba’apo penembarete reheve—

4 Pemopu’ãvo pene ñe’ẽpu turu pupeguáicha, pemomarandúvo añetegua, umi rrevelasiõ ha tembiapoukapy Che ame’ẽva’ekue peẽme he’iháicha.

5 Ha péicha, pende jeroviarekóramo, oñemyengoviáta peẽme heta mono’õmbyre reheve, ha peñekoronáta terakuãporã, ha glória, ha ñemanokuaave’ỹ ha tekove ijapyra’ỹva reheve.

6 Upévare, añetehápe Che ha’e che rembiguái William E. McLellin-pe, Che aipe’a komisiõ ame’ẽva’ekue chupe oho hag̃ua umi tenda kuarahyresẽmeguápe;

7 Ha Che ame’ẽ chupe peteĩ misiõ pyahu ha peteĩ tembiapoukapy pyahu, ha upévape, Che, Ñandejára, aja’o chupe ikorasõ guyguýre;

8 Ha iñangaipákuri; upevére, Che aperdona chupe ha ha’e jey chupe, Tereho umi tenda sur-guápe.

9 Ha toho hendive che rembiguái Luke Johnson, ha tomomarandu umi mba’e Che amandava’ekue chupekuéra—

10 Ohenóivo Moangapyhyhára Ñandejára rérape, ombo’étava chupekuéra opa mba’e oikotevẽva—

11 Akóinte oñembo’évo ani hag̃ua ikangy hikuái; ha kóva ojapóramo, Che aiméta hendivekuéra, jepe ipaha peve.

12 Péina ápe, kóva ha’e Ñandejára ñande Tupã rembipota penderehegua. Taupéicha. Amén.

13 Ha avei, añetehápe péicha he’i Ñandejára, toje’ói che rembiguái Orson Hyde ha che rembiguái Samuel H. Smith umi tenda kuarahyresẽmegua gotyo, ha tomomarandu umi mba’e Che amandava’ekue chupekuéra; ha ijeroviarekóramo hikuái, péina ápe, Che aiméta hendivekuéra, jepe ipaha peve.

14 Ha avei, añetehápe Che ha’e che rembiguái Lyman Johnson-pe, ha che rembiguái Orson Pratt-pe, oje’ói hag̃ua avei hikuái umi tenda kuarahyresẽmegua gotyo; ha péina ápe, péicha Che aime avei hendivekuéra, jepeve ipaha peve.

15 Ha avei, Che ha’e che rembiguái Asa Dodds-pe, ha che rembiguái Calves Wilson-pe, oje’ói hag̃ua avei hikuái umi tenda kuarahyreiképe, ha tomomarandu che evanhélio, jepeve Che amanda haguéicha chupekuéra.

16 Ha pe ijeroviarekóva ogueropu’akáta opa mba’e, ha oñemopu’ãta ára pahápe.

17 Ha avei, Che ha’e che rembiguái Major N. Ashley-pe, ha che rembiguái Burr Riggs-pe, toje’ói avei hikuái sur renda gotyo.

18 Héẽ, toje’ói opa ko’ãva, Che amanda haguéicha chupekuéra, ohóvo peteĩ ógagui ambue ógape, ha peteĩ víllagui ambue víllape, ha peteĩ tavaguasúgui ambue tavaguasúpe.

19 Ha oimeraẽ óga peikehápe, ha penemog̃uahẽ hikuái, peheja pende jehovasa upe ógape.

20 Ha oimeraẽ óga peikehápe, ha napenemog̃uahẽi hikuái, pya’e pesẽta upe ógagui, ha peityvyróta yvytimbo pende pýgui, testimónio ramo hesekuéra.

21 Ha penerenyhẽta tory ha vy’águi; ha peikuaa kóva, pe huísio árape, peẽ ha’éta upe óga hue, ha pekondenáta chupekuéra;

22 Ha ivevyivéta oguerovia’ỹvape g̃uarã huísio árape, upe ógape g̃uarãgui; upévare, pejeku’a jokua ha pendejeroviareko, ha pegueropu’akáta opa mba’e, ha peñemopu’ãta ára pahápe. Taupéicha. Amén.

23 Ha avei, péicha he’i peẽme Ñandejára, O che tupaogua élder-kuéra, peme’ẽ’akue pende réra peikuaa hag̃ua hembipota penderehegua—

24 Péina ápe, Che ha’e peẽme, tupao rembiaporã ha’eha oipytyvõ hag̃ua oñangarekóvo ko’ãva rogayguakuérare, ha avei oñangareko hag̃ua umi oñehenóiva rogaykuakuérare ha oñembouva’erã múndope omomarandu hag̃ua evanhélio múndope.

25 Upévare, Che, Ñandejára, ame’ẽ peẽme ko tembiapoukapy, pehupyty hag̃ua tenda pende rogayguakuérape g̃uarã, pende joyke’ykuéra ikatuha peve omohu’ũ ikorasõ.

26 Ha opa ikatúva ohupyty umi tenda hogayguakuérape g̃uarã, ha tupao pytyvõ chupekuéra g̃uarã, ani peheja múndore jeho, taha’e kuarahyresẽ gotyo térã kuarahyreike gotyo, norte térã sur gotyo.

27 Pejerure ha oñeme’ẽta peẽme, pembota ha ojepe’áta peẽme, ha ojekaaukáta peẽme yvatégui, jepe Moangapyhyhára rupive, moõpa pehova’erã.

28 Ha avei, añetehápe che ha’e peẽme, opa kuimba’e orekóva tembiaporã ome’ẽ hag̃ua hogaygua teépe, tome’ẽ, ha mba’evéicharõ ndopytamo’ãi ikorona’ỹre; ha tomba’apo tupaópe.

29 Mayma kuimba’e tojesareko opa mba’épe. Ha pe hekoreíva ndoguerekomo’ãi hendag̃ua tupaópe, ndaha’éirõ oñearrepenti ha omyatyrõ umi ijepokuaa.

30 Upévare, tojoaju ministériope che rembiguaikuéra Simeon Carter ha Emer Harris;

31 Ha avei che rembiguái Ezra Thayse, ha che rembiguái Thomas B. Marsh;

32 Avei che rembiguái Hyrum Smith, ha che rembiguái Reynolds Cahoon;

33 Avei che rembiguái Daniel Stanton, ha che rembiguái Seymour Brunson;

34 Ha avei che rembiguái Sylvester Smith, ha che rembiguái Gideon Carter;

35 Ha avei che rembiguái Ruggles Eames, ha che rembiguái Stephen Burnett;

36 Ha avei che rembiguái Micah B. Welton, ha avei che rembiguái Eden Smith. Taupéicha. Amén.