Sección 69
Rrevelasiõ oñemeʼẽvaʼekue José Smith upe Proféta rupive, Hiram, Ohio-pe, noviembre 11, 1831-pe. Umi rrevelasiõ aty oñeguenohẽ pyaʼeseʼakue oñemboajékuri conferencia especial noviembre 1 ha 2-guápe. Ára noviembre 3-pe, oñemoĩve pe rrevelasiõ kóvape ojekuaáva sección 133 ramo, tenondeve ojeheróva Apéndice. Oliver Cowdery oñehenóikuri upe mboyve ogueraha hag̃ua umi rrevelasiõ ha tembiapoukapykuéra pópe jehaipyre, oñembyatyʼakue Independence, Misuri-pe, oñeʼimprimi hag̃ua. Haʼe oguerehavaʼerã avei hendive pirapire oñemeʼẽʼakue oñemopuʼã hag̃ua pe Tupao Misuri-pe. Ko rrevelasiõme oñehekomboʼe John Whitmer-pe oho hag̃ua Oliver Cowdery ndive, ha oñehekomboʼe avei Whitmer-pe, ojeʼói ha ombyaty hag̃ua material histórico, llamamiento orekóvape Tupao historiador ha registrador ramo.
1–2, John Whitmer ohovaʼerã Oliver Cowdery ndive Misuri-pe; 3–8, Avei haʼe omboʼe ha ombyaty, oanota ha ohaivaʼerã umi dato histórico.
1 Pejapysaka cherehe, heʼi Ñandejára pende Tupã, che rembiguái Oliver Cowdery ñeimeporãre. Naiñarandúi chéve g̃uarã oñemeʼẽ chupe umi tembiapoukapy ni umi pirapire haʼe oguerahátava Sion retãme, ndohóiramo hendive peteĩ hekojoja ha ijeroviarekóva.
2 Upévare, Che, Ñandejára, aipota che rembiguái, John Whitmer toho che rembiguái Oliver Cowdery ndive;
3 Ha avei tohaive ha tombyaty meme ohóvo peteĩ tembiasakue opa umi mbaʼeguasu haʼe ohecha ha oikuaávagui che tupao rehegua;
4 Ha avei, tohupyty ñemoñeʼẽ ha pytyvõ che rembiguái Oliver Cowdery ha ambuekuéragui.
5 Ha avei, che rembiguaikuéra oikóva yvy ári, ombouvaʼerã peteĩ ñemombeʼu umi imajordomíagui Sion retãme;
6 Sion retã haʼétagui pe omoakãva ha tenda oñemog̃uahẽ ha ojejapo hag̃ua opa koʼã mbaʼe.
7 Upevére, tojeʼói che rembiguái John Whitmer heta jey peteĩ tendágui ambue tendápe, ha peteĩ tupaógui ambue tupaópe, ohupyty hasyʼỹve hag̃ua kuaapy—
8 Omboʼe ha omyesakãvo, ohai, okopia, oiporavo, ha ohupytývo opa mbaʼe haʼétava tupao ñeimeporãrã, ha umi ñemoñareaty oútavape g̃uarã, okakuaátavape Sion retãme, oguereko hag̃ua umíva, ñemoñareatýgui ñemoñareatýpe, akói ha tapiaite g̃uarã. Amén.