Sección 111
Rrevelasiõ oñeme’ẽva’ekue José Smith upe Proféta rupive, Salem, Massachusetts-pe, agosto 6, 1836-pe. Upe épokape, umi Tupaogua ofisial dirihénte odeve hetákuri hembiapo rupi ministerio-pe. Ohendúvo oĩtaha heta pirapire chupekuéra g̃uarã Salem-pe, pe Proféta, Sidney Rigdon, Hyrum Smith ha Oliver Cowdery oho upépe Kirtland, Ohio-gui, ohecha hag̃ua upéva ha upe jave ombo’e hag̃ua pe evanhélio. Joyke’ykuéra otramita heta mba’e tupao reheguáva ha ombo’e’imi. Oje’évo ndaiporimo’ãiha pirapire, oho jey hikuái Kirtland-pe. Heta umi mba’e ojehechakuaáva oikova’ekue huguápe ojehecha ko rrevelasiõ ñe’ẽnguérape.
1–5, Ñandejára oñangareko Hembiguaikuéra remikotevẽ temporal-re; 6–11, Ha’e oguerekóta poriahuvereko Sion-ndi ha omoĩporãta opa mba’e Hembiguaikuéra ñeimeporãrã.
1 Che, Ñandejára pende Tupã, ndahepochýi peju haguére ko’ápe, jepeve pene arandu’ỹ.
2 Che aguereko heta mba’ehepýva peẽme g̃uarã ko távape, Sion ñeimeporãrã, ha heta tapichakuérape ko távape g̃uarã, Che ambyatýtava hi’árape peẽ rupive, Sion ñeimeporãrã.
3 Upévare, iporã tapeg̃uahẽ peikuaa kuimba’ekuéra ko tavaguápe, peñemboguataháicha, ha oñeme’ẽháicha peẽme.
4 Ha ojehúta hi’árape Che amoĩta ko táva pende pópe, pendepu’aka hag̃ua hi’ári, ha péicha ndoikuaamo’ãi hikuái pene mba’e ñeminguéra; ha penemba’éta imba’erepy óro ha plataguigua.
5 Ani pejepy’apy umi pedevévare, Che ame’ẽtagui peẽme tapendepu’aka pepaga hag̃ua umíva.
6 Ani pejepy’apy Sion-re, Che aguerekótagui poriahuvereko hendive.
7 Pepyta ko tendápe ha umi tenda jerereguápe;
8 Ha pe tenda che aipotavehápe pepyta, ojehechaukáta peẽme che Espíritu py’aguapy ha pokatu rupive, oñehẽtava pende ári.
9 Ikatu pe alkila ko tenda; ha peporandu jesarekópe umi oiko ypyva’ekuére ha umi omopu’ãva’ekuére ko táva;
10 Oĩgui hetave peteĩ mba’ehepývagui peẽme g̃uarã ko távape.
11 Upévare, penearandúke mbóicha, ha upevére, angaipa’ỹme; ha Che amoĩporãta opa mba’e pene ñeimeporãrã, ikatu vove pehupyty umíva. Amén