Sección 85
Rrevelasiõ oñeme’ẽva’ekue José Smith upe Proféta rupive, Kirtland, Ohio-pe, noviembre 27, 1832-pe. Ko sección ha’e peteĩ pehẽ kuatia Proféta ohaiva’ekuégui William W. Phelps-pe, oikóva Independence, Misuri-pe. Ombohovái umi porandu santokuéra reheguáva, ovava’ekue Sion-pe, ha katu ndojapoiva’ekue tembiapoukapy okonsagra hag̃ua imba’erepykuéra ha upévare ndohupytýikuri ijehejapyre Tupao órdenpe oĩháicha.
1–5, Sion-pe, umi jehejapyre ojehupytyva’erã konsagrasiõ rupive; 6–12, Peteĩ ipu’akapáva ha imbaretéva ome’ẽta santokuérape ijehejapyre Sion-pe
1 Ñandejára secretario rembiaporã, upe ha’e ohenóivape, togueraha peteĩ tembiasakue ha tupao registro general opa mba’e Sion-pe oikóvagui, ha opa umi okonsagrávagui mba’erepykuéra ha legalmente ohupytýva jehejapyrekuéra obispo-gui;
2 Ha avei mba’éicha omboguata hikuái hekove, ijerovia ha hembiapokuéra; ha avei umi apóstatagui, ojeíva ohupyty rire umi ijehejapyre.
3 Ojoavy Tupã rembipota ha tembiapoukapýgui tojehai Tupã tavayguakuéra rérandi umi ndohupytýiva, ijehejapyre rerakuéra, konsagrasiõ rupi, iléipe oĩháicha, ha’e ome’ẽva’ekue, odiesma hag̃ua itavayguakuérape, ombosako’i hag̃ua chupekuéra vengánsa ha jehapy árape g̃uarã.
4 Ni noñeñongatumo’ãi i-genealogía, ni ndojejuhumo’ãi mba’evéichagua tupao jehaipyre térã rembiasakuépe.
5 Ni umi héra, ni ituvakuéra réra, ni ita’yrakuéra réra ndojehaimo’ãi Tupã léi arandukápe, he’i pe Señor de los Ejércitos.
6 Héẽ, péicha he’i upe ñe’ẽpu vevuimi ha guapymi, opa mba’e rupi oñe’ẽmbegue ha oikepypukúva, ha py’ỹi omboryrýiva umi che kangue ojehechauka aja, he’ívo:
7 Ha ojehúta Che, Tupã Ñandejára, amboúta peteĩ ipu’akapáva ha imbaretéva, ojapyhývo ipópe pokatu vára, oñeñuvãva tesapépe ahojapeguáicha, ijuru he’ítava ñe’ẽnguéra, umi ñe’ẽ ijapyra’ỹva; ha umi hyepy katu ha’e añetegua yvu, omoĩ hag̃ua hekópe Tupã róga, ha sortéope omohenda hag̃uáicha santokuéra jehejapyre, herakuéra, itúva ha ita’yrakuéra rérandi, ojehaíva Tupã léi arandukápe;
8 Ha katu upe kuimba’e, Tupãre oñehenoiva’ekue ha oñembohéra, oipysóva ipo ojoko hag̃ua Tupã árka, ho’áta ñemano dárdo rupive, yvyramáta ho’aháicha aratiri mimbi mbaretére.
9 Ha opavave umi héra ndojehaíriva mandu’a kuatiañe’ẽme, ndojuhumo’ãi jehejapyre upe árape, ha katu ojepe’áta hikuái, ha oñeme’ẽta imba’erãnguéra umi oguerovia’ỹva apytépe, oĩháme tasẽ ha tãi pururũ.
10 Che nda’éi ko’ã mba’e chehegui; upévare, Ñandejára oñe’ẽháicha, péicha avei ha’e ojapóta.
11 Ha umi sumo sacerdocio-gua, ha avei sacerdocio menor-gua ha miembro-kuéra, umi héra ndojehaíriva léi arandukápe, térã ojepilla oapostatahague, térã oñemosẽhague tupaógui, ndojuhumo’ãi jehejapyre upe árape, Ijyvatevéva santokuéra apytépe;
12 Upévare, ojejapóta hesekuéra upe sacerdote ra’ykuérandicha, ojehaíva Esdras kapítulo segundo, versíkulo setenta y uno ha dos-pe.