Sección 23
Peteĩ série oguerekóva cinco rrevelasiõ oñemeʼẽvaʼekue José Smith, pe Proféta rupive, Manchester, Nueva York, Abril 1830-pe, Oliver Cowdery, Hyrum Smith, Samuel H. Smith, Joseph Smith, pe túva, ha Joseph Knight, pe túva-pe. Oikuaasetégui, koʼã cinco tapicha héra oñemeʼẽva, mbaʼépa hembiaporãnguéra, pe Proféta oporandu Ñandejárape, ha ohupyty peteĩ rrevelasiõ mayma tekovépe g̃uarã.
1–7, Koʼã discípulo peteĩha oñehenói omboʼe, omokyreʼỹ ha omombarete hag̃ua pe Tupao.
1 Péina ápe, haʼe ndéve, Oliver, mbovymi ñeʼẽ. Péina ápe, rejehovasapyre nde, ha nereiméi kondenasiõ guýpe. Ha katu eñeñangarekóke orgúllogui, ani hag̃ua reike pyʼaraʼãme.
2 Eikuaauka ne llamamiento tupaópe, ha avei múndo renondépe, ha oñemohuʼũta ne korasõ remboʼe hag̃ua añetegua, koʼág̃a guive tenondeve gotyo ha tapiaite g̃uarã. Amén.
3 Péina ápe, añeʼẽ ndéve, Hyrum, mbovymi ñeʼẽ; nereiméigui avei kondenasiõ guýpe, ha huʼũma ne korasõ, ha ojeráma ne kũsã; ha ne llamamiento haʼe emokyreʼỹ ha emombarete meme hag̃ua pe tupao. Upévare, ne rembiaporã haʼe tupao ndive g̃uarã tapiaite peve, ha kóva nde rogaygua rupi. Amén.
4 Péina ápe, añeʼẽ mbykymi ndéve, Samuel; nereiméigui avei kondenasiõ guýpe, ha ne llamamiento haʼe emokyreʼỹ ha emombarete hag̃ua pe tupao; ha neʼírã gueteri reñehenói emboʼe hag̃ua múndo renondépe. Amén.
5 Péina ápe, añeʼẽ mbykymi ndéve, Joseph; nereiméigui avei kondenasiõ guýpe, ha ne llamamiento haʼe avei remokyreʼỹ ha remombarete hag̃ua pe tupao; ha kóva haʼe ne rembiaporã, koʼág̃a guive tenondeve gotyo ha tapiaite g̃uarã. Amén.
6 Péina ápe, ahechauka ndéve, Joseph Knight, koʼã ñeʼẽ rupive, ejapyhyvaʼerã nde Kurusu, ha péva rejapo hag̃ua, reñemboʼe ayvuvaʼerã múndo renondépe, ha ñemiháme, ha nderogaygua ndive, ha umi ne angirũ apytépe, ha opa tendápe.
7 Ha péina ápe, ne rembiaporã haʼe rejoaju hag̃ua pe tupao añeteguáre, ha reheja hag̃ua umi ne ñeʼẽ tahaʼe ñemokyreʼỹ meme, rehupyty hag̃ua mbaʼapohára jopói. Amén.