Sección 108
Rrevelasiõ oñeme’ẽva’ekue José Smith upe Proféta rupive, Kirtland, Ohio-pe, diciembre 26, 1835-pe. Ko sección ojehupytýkuri ojerurégui Lyman Sherman, pe mboyve oñeordenava’ekue seténta, ha ouva’ekue Proféta rendápe ojerure hag̃ua peteĩ rrevelasiõ oikuaauka hag̃ua chupe hembiaporã.
1–3, Lyman Sherman-pe oñeperdona hi’angaipakuéra; 4–5, Ha’e ojeipapáta Tupao élder-kuéra imba’eguasuvéva apytépe; 6–8, Ha’e oñehenói ombo’e hag̃ua evanhélio ha omombarete hag̃ua ijoyke’ykuérape.
1 Añetehápe, che rembiguái Lyman, péicha he’i ndéve Ñandejára: Oñeperdona ndéve ne angaipakuéra, neñe’ẽrendúgui che ñe’ẽpúre rejúvo ko’ápe ko pyhareve rehupyty hag̃ua ñemoñe’ẽ upe Che ahenoiva’ekuégui.
2 Upévare, topytu’u ne ánga ne ñeime espiritual reheguápe, ha anive reñemoĩ che ñe’ẽpúre.
3 Ha epu’ã ha ejesarekove ko’ág̃a guive tenondeve gotyo, reñongatúvo umi vóto rejapova’ekue ha rejapóva, ha rejehovasáta tovasapy tuichaitéva reheve.
4 Eha’arõ py’aguapýpe oñehenói peve che rembiguaikuéra asamblea solemne; upérõ ejegueromandu’áta che élder-kuéra peteĩha ndive, ha rehupytýta pe derécho, ordenasiõ rupive, che élder-kuéra rembyre Che aiporavova’ekuéndi.
5 Péina ápe, kóva ha’e Túva promésa ndéve g̃uarã, rejeroviareko meméramo.
6 Ha oñekumplíta ndéve g̃uarã ára reguereko vove derécho rembo’e hag̃ua che evanhélio, oimeraẽ tenda Che romondohápe, upe ára guive tenondeve gotyo.
7 Upévare, emombarete nde joyke’ykuérape opa ne ñemongetápe, opa ne ñembo’épe, opa ne ñemokyre’ỹme, ha opa ne rembiapópe.
8 Ha péina ápe, péicha Che aime nendive rohovasa ha romosãso hag̃ua akoiete g̃uarã. Amén