Sección 82
Rrevelasiõ oñemeʼẽvaʼekue José Smith upe Profétape, Independence, Jackson kondádo, Misuri-pe, abril 26, 1832-pe. Upérõ oikókuri Tupaogua sumo sacerdote ha elder-kuéra konsílio. Upe konsíliope, José Smith oñesostene Sumo Sacerdocio Presidente ramo, oficio oñeʼordena ñepyrũ haguépe, sumo sacerdote, elder ha miembro-kuéra conferencia-pe, Amherst, Ohio-pe, enero 25, 1832-pe (tojehecha sección 75 moñepyrũ). Ko rrevelasiõme ojeʼejey umi ñehekomboʼe oñemeʼẽvaʼekue upemboyvegua rrevelasiõme (sección 78), oñemoĩ hag̃ua peteĩ firma, ojekuaáva Firma Unida ramo (José Smith ñeisãmbyhy guýpe, pe término “orden” omyengovia término “firma”-pe), oñerreglamenta hag̃ua umi Tupao rembiapo mercantil ha editorial.
1–4, Heta oñemeʼẽháme, heta ojejerure; 5–7, Pytũmbykuéra orreina múndope; 8–13, Ñandejára oĩ obligado jajapóramo Haʼe heʼíva; 14–18, Sion okakuaavaʼerã porã ha santidápe; 19–24, Opa tekove ohekavaʼerã hapicha ñeimeporã.
1 Añetehápe, añetehápe, Che haʼe peẽme, che rembiguaikuéra, peñoperdona haguére ojupe umi pene rembiapovai, upéicha avei Che, Ñandejára, poperdona.
2 Upevére, oĩ pende apytépe ojapoʼakue tuichaite angaipa; héẽ, jepe opavave peẽ pejapókuri angaipa; ha katu añetehápe Che haʼe peẽme, peñeñangareko koʼág̃a guive tenonderã ha anive pejapo angaipa, ani ou pene akã ári huisiokuéra tuichaitéva.
3 Upe heta oñemeʼẽvape, heta ojejerurégui; ha upe iñangaipáva tuichave tesapére, tuichave kondenasiõ ohupytýta.
4 Pejerure rrevelasiõ che rérape, ha Che ameʼẽ peẽme; ha napeñongatúirõ umi che ñeʼẽ, Che ameʼẽva peẽme, oiko pendehegui ojapyharáva; ha hustísia ha huísio haʼe pe jehavira che léi ojeruréva.
5 Upévare, upe Che haʼéva peteĩme, Che haʼe opavavépe: Pejesarekóke, upe aña omyasãigui umi ipuʼakareko ha umi pytũmby orreina;
6 Ha Tupã pochy hendy yvy ári oikovéva rehe; ha ndaipóri ojapóva iporãva, opavave osẽgui upe tapégui.
7 Ha koʼág̃a añetehápe Che haʼe peẽme, Che, Ñandejára, aheja reitaha peẽme pene angaipa; tapeho ha anive pejapo angaipa; ha katu umi angaipa tuja ou jeýta upe ánga ojapóvape angaipa, heʼi Ñandejára pende Tupã.
8 Ha avei, Che haʼe peẽme, Che ameʼẽha peẽme peteĩ tembiapoukapy pyahu, peikũmby hag̃ua che rembipota penderehegua;
9 Térã, ambue ñeʼẽme, Che pohekomboʼe mbaʼéichapa peikovaʼerã cherenondépe, ojere hag̃ua peẽme pene salvasiõrã.
10 Che, Ñandejára, aĩ obligado pejapóramo pe Che haʼéva; ha katu ndapejapóiramo Che haʼéva, mbaʼevéichagua promésa ndapeguerekói.
11 Upévare, añetehápe Che haʼe peẽme, iporã che rembiguaikuéra Edward Partridge, Newel K. Whitney, A. Sidney Gilbert ha Sidney Rigdon, ha che rembiguái José Smith ha John Whitmer ha Oliver Cowdery, ha W. W. Phelps ha Martin Harris tojoaju peteĩ joaju ha konvénio ikatuʼỹvape oñehundi japyhara rupi, ndahaʼéirõ hapykueriete oútava huísio, umi heta pene majordomíape—
12 Ojehecha hag̃ua umi mbaʼe imboriahúva rehegua, ha opa mbaʼe haʼéva obispado rehegua, Sion ha Kirtland retãme avei.
13 Che akonsagrágui Kirtland retã che árape upe Ijyvatevéva santokuéra ñeime porãrã, ha peteĩ estáka Sion-pe g̃uarã.
14 Sion iporãve ha imarangatuvevaʼerãgui; umi hembeʼy oñembopyrusuvevaʼerã; ijestakakuéra oñemombaretevaʼerã; héẽ, añetehápe Che haʼe peẽme, Sion opuʼãvaʼerã ha oñemonde umi ijao porãme.
15 Upévare, Che ameʼẽ peẽme ko tembiapoukapy, pejoaju hag̃ua ko konvénio rupive, ha ojejapóta Ñandejára léipe heʼiháicha.
16 Péina ápe, kóva iñarandu avei chéve, pene ñeimeporãrã.
17 Ha peteĩchata peẽ, térã ambue ñeʼẽme, peguerekóta derécho tapeteĩcha mbaʼerepykuérare, oñeisãmbyhy porãve hag̃ua umi mbaʼe pene majordomía reheguáva, peteĩteĩ tekove oipota ha oikotevẽháicha, ijojáramo umi oipotáva—
18 Ha opa koʼãva Tupã oikovéva tupao ñeimeporãrã, opa tekove omoĩporãve hag̃ua italénto, ha peteĩteĩ ohupyty hag̃ua ambue talénto, héẽ, cien jeyve jepe, oñeñongatu hag̃ua Ñandejára almasẽme, oiko hag̃ua umívagui opa Tupaogua mbaʼerepykuéra—
19 Peteĩteĩ tekove ohekávo hapicha ñeimeporã, ha ojapóvo opa mbaʼe Tupã glóriarente omaʼẽvo.
20 Che ameʼẽvaʼekue ko orden peẽme, orden opaveʼỹva ramo peẽme ha umi pende rapykueriguápe, ndapejapóiramo angaipa.
21 Ha upe ánga iñangaipáva ko konvénio rehe, ha omohatãva ikorasõ hese, ojejapóta hendive che Tupao léipe heʼiháicha, ha oñemoĩta Satana tovajepetépe rredensiõ ára peve.
22 Ha koʼág̃a, añetehápe Che haʼe peẽme, ha kóva iñarandu, pegana pene angirũrã mbaʼerepy hekojojaʼỹva rehe, ha napenerundimoʼãi hikuái.
23 Peheja chéve pe huísio, chembaʼégui ha Che ahepymeʼẽta. Pyʼaguapy peẽme; che rovasapy topyta penendive.
24 Penembaʼégui gueteri upe rréino, ha akoiete g̃uarãta, ndapeʼáirõ pene ñemovaʼỹgui. Taupéicha. Amén.