Sección 66
Rrevelasiõ oñeme’ẽva’ekue José Smith upe Proféta rupive, Hiram, Ohio-pe, octubre 29, 1831-pe. William E. McLellin, ojerurékuri Ñandejárape kirirĩháme, oikuaauka hag̃ua chupe, upe Proféta rupive, cinco ñeporandu ñembohovái, José Smith ndoikuaáiva. McLellin ojerurégui, Proféta oporandu Ñandejárape ha ohupyty ko rrevelasiõ.
1–4, Upe konvénio opave’ỹva ha’e evanhélio plenitu; 5–8, Élder-kuéra ombo’e, otestifika ha ojepy’amongetava’erã tavayguakuéra ndive; 9–13, Pytyvõ jeroviareko ministériope oasegura peteĩ tekove ijapyra’ỹva jehejapyre.
1 Péina ápe, péicha he’i Ñandejára che rembiguái William E. McLellin-pe—Rejehovasapyréva nde, rehejágui ne rembiapovaikuéra, ha remog̃uahẽkuri umi che añetegua, he’i Ñandejára, ne Redentor, pe múndo Salvahára, jepeve opa umi ogueroviáva che réra.
2 Añetehápe Che ha’e ndéve, rejehovasapyréva nde, remog̃uahẽ haguére che konvénio opave’ỹva, jepeve che evanhélio plenitu, oñembouva’ekue yvypóra ra’ykuérape, oikove hag̃ua ha oñeme’ẽ hag̃ua chupekuéra hendag̃ua umi glória ojehechaukátavape ára pahakuérape, proféta ha apostolkuéra ohai haguéicha ára ymaguarépe.
3 Añetehápe Che ha’e ndéve, che rembiguái William, nepotĩ, ha katu nanepotĩmbái; eñearrepentíke, upéicha, umi mba’e ndaguerohorýivagui, he’i Ñandejára, umíva Ñandejára ohechaukátagui ndéve.
4 Ha ko’ág̃a, añetehápe, Che, Ñandejára, ahechaukáta ndéve mba’épa Che aipota ndehegui, térã mba’épa ha’e che rembipota nderehegua.
5 Péina ápe, añetehápe Che ha’e ndéve, che rembipota ha’eha teremomarandu che evanhélio peteĩ tetãgui ambue tetãme, ha tavaguasúgui tavaguasúpe, héẽ, umi tenda jereregua noñemomarandúi haguépe.
6 Ani repyta heta ára ko tendápe; ani rejupi gueteri Sion retãme; ha katu pe ikatúva rembou, embou; upeicha’ỹramo, ani repensa ne mba’erepykuérare.
7 Tereho umi tetã kuarahyreiképe, etestifika opa tenda rupi mayma tavayguakuérape, umi isinagógape, reñemongetávo umi tavaygua ndive.
8 Toho nendive che rembiguái Samuel H. Smith, ani reheja chupe, ha eme’ẽ chupe ne ñehekombo’ekuéra; ha upe ijeroviarekóva, oñemombaretéta opa tendápe; ha, Che, Ñandejára, aháta penendive.
9 Emoĩ nde po umi hasýva ári, ha ha’ekuéra okueráta. Ani reju, Che, Ñandejára, ha’e peve ndéve. Eha’arõkuaa jehasa’asýpe. Ejerure, ha oñeme’ẽta ndéve; ehenói ha ojepe’áta ndéve.
10 Ani rejepy’apy heta mba’ére. Eheja opa mba’e hekojoja’ỹva. Ani rejapo ñemoakãratĩ—peteĩ jeipy’ara’ã nemyangekoiva’ekue.
11 Eñongatu ko’ã ñe’ẽ, añetegua ha ijeroviarekógui; ha embotuicháta nde oficio, ha hetápe rembyatýta Sion-pe, vy’apavẽ opave’ỹva purahéi reheve iñakã arikuéra.
12 Ejapo meme ko’ã mba’e jepe ipaha peve, ha reguerekóta peteĩ tekove ijapyra’ỹva koróna che Ru akatúape, henyhẽva grásia ha añeteguágui.
13 Añetehápe, péicha he’i Ñandejára nde Tupã, ne Redentor, jepeve Jesucristo. Amén.