Sección 119
Rrevelasiõ oñeme’ẽva’ekue José Smith upe Proféta rupive, Far West, Misuri-pe, julio 8, 1838-pe, oñembohováivo jerure’asy: “O Ñandejára! Ehechauka ne rembiguaikuérape mboýpa rejerure, diezmo ramo, nde tavayguakuéra mba’erepykuéragui”. Diezmo léi, ko árape ojeikuaaháicha, noñeme’ẽikuri Tupaópe ko rrevelasiõ mboyve. Pe ñe’ẽ diezmo, ojeporúva ko ñembo’e oje’eramóvape, ha péicha avei, rrevelasiõ upe mboyveguápe (64:23; 85:33; 97:11), oñe’ẽkuri ndaha’éi pe désima párterente, ha katu opa ñeme’ẽmby voluntáriore, térã donasiõre, Tupao fondokuéragui. Ñandejára ome’ẽkuri Tupaópe upe mboyve pe konsagrasiõ léi, ha mba’erepykuérare majordomía, umi miembro (ko’ýte umi élder oisãmbyhýva) oikévape peteĩ konvénio rupive, opave’ỹva’erãha. Oĩgui heta nokumplíriva upe konvénio, Ñandejára oipe’ákuri sapy’a ha upevarangue ome’ẽ pe diezmo léi opa Tupaópe. Proféta oporandu Ñandejárape mboýpa imba’erepykuéragui Ha’e ojerure umi propósito sagradorã. Upe ñembohovái ha’ékuri ko rrevelasiõ.
1–5, Santokuéra ome’ẽva’erã imba’erepykuéragui hembýva, ha uperire, ome’ẽ diésmo ramo, désima párte oganávagui káda áño; 6–7, Koichagua tembiapo osantifikáta Sion retã.
1 Añetehápe, péicha he’i Ñandejára, Che ajerure opa imba’erepykuéragui hembýva toñemoĩ Sion-pe che tupao obispo pópe,
2 Oñemopu’ã hag̃ua che róga, ha oñemoĩ hag̃ua Sion pyenda, ha sacerdocio-pe g̃uarã, ha che tupao Presidencia devehakuérarã.
3 Ha kóva ha’éta che tavayguakuéra diézmo ñepyrũmby.
4 Ha péva rire, opa umi ome’ẽva’ekue ko diésmo, ohepyme’ẽta pe désima párte oganávagui káda áño; ha kóva ha’éta chupekuéra léi oñemova’ỹva akoiete g̃uarã, che santo sacerdocio-pe g̃uarã, he’i Ñandejára.
5 Añetehápe Che ha’e peẽme, ojehúta opa umi oñembyatýva Sion retãme oñediesmáta opa imba’erepykuéra rembyrégui, ha oñongatúta ko léi, térã ndojejuhumo’ãi hikuái hekomarangatúva oiko hag̃ua pende apytépe.
6 Ha Che ha’e peẽme, che tavayguakuéra naiñe’ẽrendúirõ ko léire, oñongatu marangatu hag̃ua, ni nosantifikái chéve g̃uarã Sion retã ko léi rupive, oñeñongatu hag̃ua ipype che apoukapykuéra ha che huisiokuéra, ha’e hag̃ua imarangatuvéva, péina ápe, añetehápe Che ha’e peẽme, ndaha’emo’ãi peẽme g̃uarã Sion retã.
7 Ha kóva ha’éta apopyrã opa Sion estakakuérape. Taupéicha. Amén.