1 Pejapysaka, O che tupaogua elder-kuéra, ha pehendu Tupã oikovéva ñeʼẽpu; ha pejesareko umi ñeʼẽ arandu oñemeʼẽtavare peẽme, peporandu ha peime haguéicha peteĩ ñeʼẽme, pe Tupao ha umi espíritu yvy ári oikóva rehegua.

2 Péina ápe, añetehápe Che haʼe peẽme, oĩha heta espíritu añeteguaʼỹva, oñemosarambiʼakue yvy ári, múndope ombotavývo.

3 Ha avei Satana oñehaʼãkuri penembotavy, ikatu hag̃ua penerundi.

4 Péina ápe, Che, Ñandejára, amaʼẽkuri penderehe, ha ahechavaʼekue umi tembiapokyʼa, upe tupao che réra omomarandúvape.

5 Ha katu ojehovasapyre umi ijeroviareko ha ogueropuʼakáva, tahaʼe tekove térã ñemanóme, oñemeʼẽgui chupekuéra tekove ijapyraʼỹva jehejapyre ramo.

6 Ha katu ái umi oporombotavy ha hovamokõiva, péicha heʼígui Ñandejára, Che aguerúta chupekuéra huísiope.

7 Péina ápe, añetehápe Che haʼe peẽme, oĩ hovamokõiva pende apytépe, ha ombotavyvaʼekue tapichakuéra, ha péva omeʼẽkuri puʼaka añáme; ha katu péina ápe, koʼãvape ojeguerujeýta;

8 Ha katu umi hovamokõiva ojepilláta ha ojeipeʼáta, tahaʼe tekove térã ñemanóme, jepeve Che rembipotáicha; ha ái umi ojeipeʼáva che tupaógui, koʼãvare ipuʼaka haguére múndo.

9 Upévare, toñeñangareko opa tekove, ani ojapo ijojaʼỹ ha añeteguaʼỹva che renondépe.

10 Ha koʼág̃a peju, Espíritu rupive, heʼi Ñandejára, itupaogua elder-kuérape, ha ñañomongeta oñondive, peikũmby hag̃ua;

11 Ñañomongeta péicha, jepe peteĩ kuimbaʼe oñomongetaháicha ambue ndive, ojováre.

12 Ha koʼág̃a, tekove oñomongeta jave, ambue tekove oikũmby ichupe, oñomongetágui hikuái tekove oñeʼẽháicha; péicha avei Che, Ñandejára, añomongetáta penendive peikũmby hag̃ua.

13 Upévare, Che Ñandejára ajapo peẽme ko porandu—mbaʼépe peñeordena raʼe?

14 Pemboʼe hag̃ua che evanhélio Espíritu rupive, jepeve Moangapyhyhára oñembouvaʼekue omboʼe hag̃ua pe añetegua.

15 Ha upérõ pehupytyvaʼekue umi espíritu ikatuʼỹva peikũmby, ha pemog̃uahẽvaʼekue umíva Tupãguigua ramo; ha ikatúpa pejehustifika koʼãvape?

16 Péina ápe, peẽte pembohováita ko porandu; upevére, Che poporiahuverekóta; ha umi pende apytépe ikangýva, oñemombaretéta koʼágui guive tenonderã.

17 Añetehápe Che haʼe peẽme, pe che aordenavaʼekue ha oñemboúva omboʼe hag̃ua añetegua ñeʼẽ Moangapyhyhára rupive, añetegua Espíritupe, omboʼépa añetegua Espíritu rupive térã ambue hendáicha?

18 Ha ambue hendáicharõ, ndahaʼéi Tupãguigua.

19 Ha avei, pe omog̃uahẽva añetegua ñeʼẽ, omog̃uahẽpa añetegua Espíritu rupive térã ambue hendáicha?

20 Ha ambue hendáicharõ, ndahaʼéi Tupãguigua.

21 Upévare, mbaʼéicha piko ndaikatúi peikũmby ha peikuaa, pe omog̃uahẽva upe ñeʼẽ añetegua Espíritu rupive, omog̃uahẽha añetegua Espíritu omboʼeháicha?

22 Upévare, pe omboʼe ha pe omog̃uahẽva, oñoikũmby hikuái, ha mokõive ojeʼedifika ha ovyʼa oñondive.

23 Ha pe ndoporoʼedifikáiva, ndahaʼéi Tupã mbaʼe, haʼe pytũmbygua.

24 Tupã mbaʼéva haʼe tesape; ha pe omog̃uahẽva tesape ha opytáva Tupãndi, ohupytyve tesape; ha upe tesape omimbi mimbive ára porãmba meve.

25 Ha avei, añetehápe Che haʼe peẽme, ha Che haʼe peẽme peikuaa hag̃ua añetegua, ha peipeʼa hag̃ua umi tatatĩpytũ pende apytégui;

26 Pe Tupãre oñeʼordena ha oñemboúva, péva oñehenói haʼe hag̃ua tuichavéva, haʼéramo jepeve michĩvéva ha opavave rembiguái.

27 Upévare, haʼe oguereko opa mbaʼe; opa mbaʼe oĩ rupi ipoguýpe, yvága ha yvýpe, tekove ha tesape, Espíritu ha puʼaka, oñemboúva Túva rembipotágui, Itaʼýra Jesucristo rupive.

28 Ha katu ndaipóri oguerekóva opa mbaʼe, ndahaʼéiramo oñemomarãʼỹ ha oñemopotĩva opa angaipágui.

29 Ha peñemomarãʼỹ ha peñemopotĩrõ opa angaipágui, pejeruréta oimeraẽ mbaʼe peipotáva, Jesús rérape, ha oikóta.

30 Ha katu peikuaa kóva, oñemeʼẽtaha peẽme upe mbaʼe pejerurétava; ha peñehenóigui peime hag̃ua iñakãme, espíritu-kuéra oñemoĩta pende poguýpe.

31 Upévare, ojehúta pehecháramo ojehechaukaha peteĩ espíritu ndaikatúiva peikũmby, ha napemog̃uahẽi upe espíritu, pejeruréta Túvape, Jesús rérape; ha haʼe ndohechaukáirõ peẽme upe espíritu, upérõ peikuaáta ndahaʼeiha Tupã mbaʼe.

32 Ha oñemeʼẽta peẽme puʼaka upe espíritu ári; ha peñeʼẽta upe espíritu rehe ñeʼẽpu hatãme, ndahaʼeiha Tupã mbaʼe—

33 Ndahaʼéi ñeʼẽ vaípe, ani hag̃ua ipuʼaka pende rehe, ni ñembotuicha ni vyʼa reheve, ani hag̃ua oñakãrama pende rehe upéva.

34 Pe Tupãgui ohupytýva, tohecha haʼeha Tupãgui; ha tovyʼa Tupã ohechaha chupe hekojojaha ohupyty hag̃ua.

35 Ha pehendu ha pejapóvo koʼã mbaʼe pehupytyvaʼekue, ha umi tenondeve pehupytýtava—ha Túva omeʼẽ peẽme pe rréino ha pokatu, pendepuʼaka hag̃ua opa mbaʼe ndahaʼéivare hese oñeordenavaʼekue—

36 Ha péina ápe, añetehápe Che haʼe peẽme, pejehovasa peẽ pehendúva hína koʼã che ñeʼẽ, che rembiguái jurúgui, oñeperdonágui peẽme pene angaipakuéra.

37 Tosẽ che rembiguái Joseph Wakefield, máva Che cheroryetéva ndive, ha che rembiguái Parley P. Pratt, tupaokuéra apytépe, omombarete hag̃ua chupekuéra ñemokyreʼỹ ñeʼẽ rupive;

38 Ha avei che rembiguái John Corrill, térã opavave che rembiguaikuéra oñeʼordenáva ko oficio-pe, ha ombaʼapóva ko víñape; ha ani avave ndohejái chupekuéra ojapo pe Che haʼevaʼekue ojapovaʼerãha.

39 Upévare, kóvape ndojehustifikái che rembiguái Edward Partridge; upevére, toñearrepenti ha oñeperdonáta chupe.

40 Péina ápe, peẽ ningo mitã michĩ ha ndaikatúi pegueropuʼaka koʼág̃a opa mbaʼe; pekakuaavaʼerã grásia ha añetegua kuaapýpe.

41 Ani pekyhyje, mitã michĩ, peẽ ningo che mbaʼe, ha Che, chepuʼakavaʼekue múndore, ha peẽ haʼe umi che Ru omeʼẽvaʼekue chéve;

42 Ha mavave umi che Ru omeʼẽvaʼekue chéve nokañymoʼãi.

43 Ha Túva ha Che peteĩnte. Che aime Túvape ha Túva oĩ chepype; ha chemog̃uahẽ haguére, peẽ haʼe chepype ha Che pende pype.

44 Upévare, Che aime penembytépe, ha Che haʼe ovecha rerekua mbaʼeporã, ha Israel itaguasu. Ko itaguasu ári omopuʼãva arakaʼeve ndoʼamoʼãi.

45 Ha ou ára pehendutaha che ñeʼẽpu ha cherecháta, ha peikuaáta Che haʼeha.

46 Peñangarekóke, upévare, peime hag̃ua ñembosakoʼípe. Taupéicha. Amén.