Sección 51
Rrevelasiõ oñeme’ẽva’ekue José Smith upe Proféta rupive, Thompson, Ohio-pe, mayo 20, 1831-pe. Umi árape oñepyrũkuri og̃uahẽ Ohio-pe, Santokuéra oúva umi estado Este-gui, ha tekotevẽkuri oñemohenda porã chupekuéra oiko hag̃ua upépe. Ko tembiapo ha’e rupi obispo oficio, obispo Edward Partridge ojerure ñehekombo’e upéva rehegua, ha Proféta oporandu Ñandejárape.
1–8, Edward Partridge oñehenói oisãmbyhy hag̃ua umi majordomía ha mba’erepykuéra; 9–12, Santokuéra oikova’erã japu’ỹme ha peteĩchapa ohupytyva’erã; 13–15, Ha’ekuéra orekova’erã peteĩ obispo almasẽ ha omohenda umi mba’erepykuéra Ñandejára léipe he’iháicha; 16–20, Ohio ha’éta sapy’ami peteĩ tenda ñembyatyrã.
1 Pejapysaka cherehe, he’i Ñandejára pende Tupã, ha Che añe’ẽta che rembiguái Edward Partridge-pe ha ame’ẽta chupe ojapova’erã; tekotevẽgui ha’e ohupyty ñehekombo’e mba’éicha omohendava’erã ko tavayguakuéra.
2 Tekotevẽgui oñemohenda chupekuéra che leikuérape he’iháicha; upéicha’ỹro, ojepe’áta chupekuéra.
3 Upévare, che rembiguái Edward Partridge ha umi ha’e oiporavova’ekue, umi che aguerohorýva, tohechauka ko tavayguakuérape, pehẽngue chupekuéra g̃uarãva, peteĩchapa, peteĩteĩ tekove oĩháicha hogayguápe, ha’e ikatuháicha ha umi ha’e oipota ha oikotevẽháicha.
4 Ha che rembiguái Edward Partridge, ohechauka vove peteĩ tekovépe imba’erãva, tome’ẽ chupe peteĩ kuatiahai chupe g̃uarãiteha pe imba’éva, ikatu hag̃ua oñongatu, héẽ, ko derécho ha jehejapyre tupaópe, ojapyhara peve, ha tupao ñe’ẽpu rupive, ko tupao léi ha konveniokuérape he’iháicha, ojehecha chupe nahekomarangatuveimaha, ha’e hag̃ua tupaogua.
5 Ha ojapyharárõ ha nahemarangatuvéima ha’e hag̃ua tupaogua, ndaikatumo’ãi ojerure umi mba’e obispo-pe okonsagrava’ekue, che tupaogua imboriahu ha oikotevẽvape g̃uarã; upévare, ndoguerekomo’ãvéima pe ome’ẽva’ekue, ha katu oguerekóta derécho pe mba’e ohupytyva’ekue kuatiahai rupive añorente.
6 Ha péicha ojeaseguráta opa mba’e, tetã leikuérape he’iháicha.
7 Ha toñeme’ẽ ko tavayguápe, ko tavaygua mba’éva.
8 Ha pirapire hembýva ko tavayguápe—toñehenói peteĩ ahénte ko tavayguakuérape g̃uarã, ojapyhýtava pe pirapire ome’ẽ hag̃ua tembi’u ha ao, ko tavaygua oikotevẽháicha.
9 Ha opa tekove tehekojapu’ỹ hembiapópe, ha tapeteĩchapa hikuái ko tavaygua apytépe, ha peteĩchapa tohupyty, peñemopeteĩ hag̃ua, jepeve Che amanda haguéicha peẽme.
10 Ha ani peheja ojeipe’a ko tavayguágui imba’éva ha oñeme’ẽ ambue tupaoguápe.
11 Upévare, ambue tupao oipotárõ pirapire ko tupaógui, tohepyme’ẽ jey hikuái ko tupaópe oñomongeta haguéicha;
12 Ha kóva ojejapóta pe obispo térã pe ahénte rupive, oñehenóitava tupao ñe’ẽpu rupive.
13 Ha avei, tomoĩ pe obispo peteĩ almasẽ ko tupaópe; ha toñeñongatu obispo pópe opa mba’e, pirapire ha hi’upy, hetave oikotevẽvagui ko tavayguakuéra.
14 Ha toheja avei ijupe g̃uarã pe ha’e oikotevẽháicha, ha hogayguakuéra oikotevẽháicha, omba’apo aja ko tembiapópe.
15 Ha péicha Che ame’ẽ mba’eporã ko tavayguápe oñemohenda hag̃ua che leikuérape he’iháicha.
16 Ha Che akonsagra chupekuéra g̃uarã ko tetã ára mbyky aja, Che, Ñandejára, ha’e peve ambuéicha, ha amanda chupekuéra tosẽ ko’águi;
17 Ha noñeme’ẽi chupekuéra aravo ni ára; upévare, topyta hikuái ko tetãme oikotaramoguáicha ipype heta ary, ha upéva ouporãta chupekuéra.
18 Péina ápe, kóva ha’éta techaukarã pe ambue tendápe g̃uarã che rembiguái Edward Partridge-pe, opa tupaópe.
19 Ha pe ojejuhúva majordómo ijeroviarekóva, hekojoja ha añarandúva, oikéta Iñandejára vy’apavẽme, ha ohupytýta jehejapyre ramo tekove ijapyra’ỹva.
20 Añetehápe, Che ha’e peẽme, Che ha’e Jesucristo, pya’e ajúva, aravo peha’arõ’ỹvape. Taupéicha. Amén.