1 Añetehápe, péicha he’i Ñandejára peẽ che rembiguaikuérape, parávola trígo ha ñanavai reheguáre:

2 Péina ápe, añetehápe Che ha’e peẽme, pe ñu ha’ékuri upe múndo, ha apostol-kuéra ha’ékuri pe yvara’ỹi ñotỹharakuéra;

3 Ha oke rire hikuái, upe tupao muñaha guasu, upe apóstata, pe hekovaivéva, jepe Babilonia, omboy’ukáva opa tetãme ikópagui, umi ikorasõme, pe oporohayhu’ỹva, jepe Satana, oguapýva orreina hag̃ua—péina ápe, ha’e oñotỹ pe ñana; upévare, upe ñana ojaho’i trígo ha omoñani topaópe tave’ỹme.

4 Ha katu péina ápe, umi ára pahápe, jepeve ko’ág̃a, Ñandejára oñepyrũ aja oguenohẽ tesakãme upe ñe’ẽ ha pe ka’avo hokyhína ha ikyrỹi gueteri—

5 Péina ápe, añetehápe Che ha’e peẽme, umi ánhel ojerure’asy Ñandejárape ára ha pyharekue, ha oñembosako’íma ha oha’arõhína oñembou omono’õ hag̃ua umi ñu;

6 Ha katu Ñandejára he’i chupekuéra, ani pehekýi ñanavai upe ka’avo ikyrỹi aja (añetehápe ikangýgui pende jerovia), ani mba’e pehundi avei upe trígo.

7 Upévare, peheja tokakuaa oñondive trígo ha ñanavai hi’ajupaite peve upe kóga; upérõ pembyaty raẽvéta pe trígo umi ñanavai apytégui, ha pembyatypa rire pe trígo, péina ápe, péicha pe ñanavai ojejokuáta atýpe, ha upe ñu opytáta ojehapy hag̃ua.

8 Upévare, péicha he’i Ñandejára peẽme, akói opytáva ndive pe sacerdocio pende rukuéra lináhe rupive—

9 Peẽ ha’égui eredéro tee, tetépe, ha peñeñomiva’ekue múndogui Cristo-ndi Tupãme—

10 Upévare, opytákuri pende rekove ha sacerdocio, ha tekotevẽ opyta peẽ ha pene lináhe rupive opa mba’e oñemoĩjey peve, oje’eva’ekue opa proféta marangatu juru rupive, múndo ñepyrũmby guive.

11 Upévare, pejehovasapyre peẽ, pepyta meméramo che py’aporãme, ha’évo peteĩ tesape hentilkuérape, ha ko sacerdocio rupive, peteĩ salvador, che tavayguakuéra Israel-pe g̃uarã. Ñandejára he’ímakuri. Amén