Sección 113
Isaías jehaipy rehegua porandukuéra ñembohovái, oñeme’ẽva’ekue José Smith upe Proféta rupive, Far West, Misuri ypýpe térã ag̃ui upégui, marzo 1838-pe.
1–6, Ojekuaa Isaí rakã, pe vára hakãgui osẽtava ha Isaí rapo; 7–10, Sion rembyre isarambíva oguereko derécho sacerdocio-gui ha oñehenói oujey hag̃ua Ñandejárape.
1 Mávapa pe Isaí rakã oñeñe’ẽvare Isaías kapítulo 11, umi versíkulo 1, 2, 3, 4, ha 5-pe?
2 Añetehápe, péicha he’i Ñandejára: Ha’e Cristo.
3 Mba’épa pe vára oñeñe’ẽvare Isaías, kapítulo 11, versíkulo peteĩháme, osẽtava Isaí rakãgui?
4 Péina ápe, péicha he’i Ñandejára: Ha’e peteĩ tembiguái Cristo pópe, ha’éva sapy’a Isaí ñemoñare ha avei Efraín, térã José rogaygua, upe oñeme’ẽva’ekuépe heta pu’aka.
5 Mba’épa Isaí rapo, oñeñe’ẽvare versíkulo 10, kapítulo 11-pe?
6 Péina ápe, péicha he’i Ñandejára: ha’e peteĩ Isaí ñemoñare, ha avei José ñemoñare, pe derécho rupive orekóva umi sacerdocio ha rreinogua llavekuéra, peteĩ poyvíramo, ha che tavayguakuéra ñembyatyrã umi ára pahápe.
7 Umi porandu ojapova’ekue Elias Higbee: Mba’e he’ise tembiapoukapy oñeme’ẽva Isaías, kapítulo 52, versíkulo 1-pe, he’íva: Eñembyao pokatúgui, O Sion—ha mba’e távare oñe’ẽ Isaías?
8 Ha’e oñe’ẽkuri umi ára pahápe Tupã ohenóitavare, umi oguerekótava upe sacerdocio pu’aka omoĩjey hag̃ua Sion-pe ha ojapo hag̃ua Israel rredensiõ; ha oñembyao imbaretépe he’ise oñembyao sacerdocio pu’akápe, ha’e, Sion, oguerekoha derécho lináhe rupive; ha avei ohupyty jey hag̃ua upe pu’aka ohundiva’ekue.
9 Mba’épa ñaikũmbyva’erã segundo versículo he’ívare Sion tojora ijehegui ijajúra jokuaha?
10 Ñaikũmbyva’erã oñemokyre’ỹha ambuekuéra isarambívape oujey hag̃ua Ñandejárape, ojeiva’ekuégui hikuái; ha ojapóramo upéva, Ñandejára oñe’ẽme’ẽkuri oñe’ẽtaha chupekuéra, térã ome’ẽtaha chupekuéra rrevelasiõ. Tojehecha umi versíkulo 6, 7, ha 8. Ijajúra sã ha’e umi Tupã ñe’ẽngái hi’ári, térã Israel rembyre ári, iñeime sarambípe hentilkuéra apytépe.