1 Péicha he’i Ñandejára, añetehápe, añetehápe, Che ha’e ndéve, che ra’y, oñeperdona ne angaipakuéra, rejerure haguéicha, umi ne ñembo’e ha nde joyke’ykuéra ñembo’e og̃uahẽgui che apysápe.

2 Upévare, rejehovasapyre ko’ág̃a guive tenonderã, reguerekóva rreinogua llavekuéra oñeme’ẽva’ekue ndéve; rréino oúva ipahaite.

3 Añetehápe Che ha’e ndéve, ko rreinogua llavekuéra araka’eve ndojepe’amo’ãi ndehegui, reime aja ko múndope, ni upe múndo oútavape;

4 Upevére, umi rrevelasiõ oñeme’ẽta nde rupi ambuévape, héẽ, pe tupaópe.

5 Ha umi ohupytýva Tupã rrevelasiõ, toñangarekóke mba’éicha oiporu umíva, ani ojapo’i, ha kóvape oike kondenasiõme, ha oñepysãnga ha ho’a oguejy vove umi aravai ha umi yvytu oipeju ha oguejy umi amaguasu, ha ho’a hogakuérare.

6 Ha añetehápe, añetehápe Che ha’e nde joyke’ykuéra, Sidney Rigdon ha Frederick G. Williams-pe, oñeperdona avei chupekuéra iñangaipakuéra, ha ndéicha avei ojehecha chupekuéra ko rréino paha llavekuéra jererekópe;

7 Ha avei, ne rembiapo rupive, umi proféta mbo’ehaogua llavekuéra, Che amandava’ekue oñemohenda hag̃ua;

8 Ko’ãva reheve oñemoĩporãmba hag̃ua hikuái iministériope, Sion salvasiõrã, ha Israel-gua tetãnguéra, ha opa hentilkuéra ogueroviaháicha;

9 Ne rembiapo rupive ohupyty hag̃ua hikuái pe ñe’ẽ, ha hembiapokuéra rupive toho pe ñe’ẽ yvy paha peve, hentilkuérape raẽve, ha upéi, péina ápe, péicha oujeýta hudiokuérape.

10 Ha upérõ oúta ára pokatúpe ojehechaukataha Ñandejára jyva, oipy’amovã hag̃ua tetãnguérape, umi tetã oguerovia’ỹva, José róga, isalvasiõkuéra evanhéliore.

11 Ojehútagui upe ára, opa tekove ohendúta pe evanhélio plenitu iñe’ẽ ojepokuaaha ha iñe’ẽ teépe, umi ko pokatúpe oñeordenava’ekue rupive, pe Moangapyhyhára ñeisãmbyhy rupive, oñeñohẽ’akue hi’arikuéra, Jesucristo-pe orrevela hag̃ua.

12 Ha ko’ág̃a, añetehápe Che ha’e peẽme, Che ame’ẽ peẽme tembiapoukapy pepyta meme hag̃ua upe ministério ha presidencia-pe.

13 Ha pejapopa vove profetakuéra rehegua ñembohasa, pepresidíta tupaogua ha mbo’ehaogua mba’ekuéra ári, upe guive tenonderã;

14 Ha sapy’apy’a, pe Moangapyhyhára ohechaukataháicha, pehupytýta umi rrevelasiõ pemohesakã hag̃ua umi ñemimby rreinogua.

15 Ha pemoĩta hekópe tupaokuéra, ha pestudiáta ha peikuaáta, ha peñemoarandúta opa aranduka iporãvape ha umi ñe’ẽ, ñe’ẽ jepokuaaha, ha tavayguakuéra reheguápe.

16 Ko kóva ha’éta pene rembiaporã ha pene misiõ opa pende rekove pukukue, pe presidi umi konsého ha pemoĩ hekópe opa ko tupao ha rréino mba’ekuéra.

17 Ani petĩ, ni peneapañuãi; ha katu toñeñemoñe’ẽ peẽme opa pene ñembotuicha ha orgúllore, kóva omoñuhágui pene angakuéra.

18 Pemoĩ pende rogapy hekópe; pemomombyry pendejehegui ate’ỹ ha tekoky’a.

19 Ko’ág̃a, añetehápe Che ha’e ndéve, toñembosako’i peteĩ óga, pya’e ikatuveháicha, ne konsehéro ha ohaívape ndéve g̃uarã, ha’éva, Frederick G. Williams.

20 Ha topyta hogayguakuérandi che rembiguái itujáva, Joseph Smith, upe túva, pe óga ko’ág̃a oikohápe; ha ani oñevende Ñandejára juru he’i peve.

21 Ha topyta che konsehéro ko’ág̃a oikohápe, ha’éva Sidney Rigdon, Ñandejára juru he’i peve.

22 Ha pe obispo toñeha’ã jesarekópe ojuhu hag̃ua peteĩ ahénte; ha taha’e peteĩ kuimba’e orekóva rrikésa ñongatupy—peteĩ kuimba’e Tupã ndivegua, ha mbaretéva ijeroviápe—

23 Ha péicha ohepyme’ẽmba hag̃ua opa jedeveha; ani hag̃ua Ñandejára almasẽ opyta vai tavayguakuéra resa renondépe.

24 Pehesa’ỹijo jesarekópe, akóinte peñembo’e, pegueroviareko, ha opa mba’e oiko jojáta pene ñeimeporarã, peguata jojáramo ha penemandu’áramo upe konvénio pejapo’akuére oñondive.

25 Tamichĩ pende rogayguakuéra, ko’ýte che rembiguái itujáva Joseph Smith, upe túva, umi ha’e’ỹva rehegua pende rogaygua;

26 Umi mba’e oñeme’ẽva’ekue peẽme pejapo hag̃ua che rembiapo, ani hag̃ua ojepe’a pendehegui ha oñeme’ẽ umi ndahekojojáivape—

27 Ha péicha rupi ndaikatúi pejapo umi mba’e Che amandava’ekue peẽme.

28 Ha avei, añetehápe Che ha’e peẽme, che aipota che rembiguái Vienna Jaques ohupyty pirapire ohepyme’ẽ hag̃ua hemikotevẽnguéra, ha tojupi Sion retãme;

29 Ha upe pirapire rembyre toñekonsagra chéve g̃uarã, ha toñembojopói chupe che árape.

30 Añetehápe Che ha’e ndéve, iporã chéve tojupi ha’e Sion retãme ha tohupyty peteĩ jehejapyre obispo pógui;

31 Oiko hag̃ua py’aguapýpe, ijeroviarekóramo, ha ani ohasa umi hi’ára tekoreípe upe guive tenonderã.

32 Ha péina ápe, añetehápe Che ha’e peẽme, pehaiva’erãha ko tembiapoukapy, ha pejeva’erã pende joyke’ykuéra Sion-guápe, maitei joayhúpe, Che avei pohenoihague pepresidi hag̃ua Sion che árape.

33 Upévare, anivéma chemyangekói ko’ã mba’ére.

34 Péina ápe, Che ha’e peẽme umi pende joyke’y oĩva Sion-pe oñepyrũma oñearrepenti, ha anhelkuéra ovy’a hesekuéra.

35 Upevére, oĩ heta mba’e Che ndarohorypáiva; ha ndachembororypái che rembiguaikuéra William E. McLellin ha Sidney Gilbert; ha avei pe obispo ha ambuekuéra oguereko heta mba’e oñearrepentiva’erãgui.

36 Ha katu añetehápe Che ha’e peẽme, Che, Ñandejára, añorairõtaha Sion-ndi, ha akonvenséta imburuvichakuérape, ha ahaviráta chupe ipu’akapa peve ha oñemopotĩ meve che renondépe.

37 Ndojepemo’ãigui chupe hendágui. Che, Ñandejára, añe’ẽva’ekue upéva. Amén