Sección 95
Rrevelasiõ oñeme’ẽva’ekue José Smith upe Proféta rupive, Kirtland, Ohio-pe, junio 1, 1833-pe. Ko rrevelasiõ ha’e peteĩ moñepyrũjey umi ñehekombo’e marangatúgui oñemopu’ã hag̃ua peteĩ óga adorasiõ ha ñehekombo’erã, Ñandejára róga (tojehecha sección 88:119–136).
1–6, Ojeja’o santokuérape nomopu’ãi haguére Ñandejára róga; 7–10, Ñandejára oiporuse Hóga ombyao hag̃ua Itavayguakuérape yvategua pu’aka reheve; 11–17, Upe óga ojededikava’erã tenda ojeadora hag̃ua ha Apostolkuéra mbo’ehaorã.
1 Añetehápe, péicha he’i Ñandejára peẽ che ahayhúvape, ha umi ahayhúvape, che ahavira avei, oñeperdona hag̃ua iñangaipakuéra, pe jehavira reheve, Che ambosako’ígui peteĩ tape aipe’a hag̃ua chupekuéra jeipy’ara’ãgui opa mba’épe, ha Che pohayhúkuri—
2 Upévare, tekotevẽ pejeja’o ha pepyta jehavirápe che rova renondépe;
3 Pejapóguikuri cherehe peteĩ angaipa ivaietéva, ndapejesarekói haguére opa mba’épe, upe tembiapoukapy guasu Che ame’ẽva’ekuére peẽme, che róga ñemopu’ã rehegua;
4 Ñembosako’i Che ambosako’iseha reheve che apostolkuérape, okopi hag̃ua ipahaite che víña, ajapo hag̃ua che rembiapo hechapyrãva, añohẽ hag̃ua che Espíritu opa oikovéva ári—
5 Ha katu, añetehápe Che ha’e peẽme, oĩ pende apytépe heta oñeordenava’ekue, umi Che ahenoiva’ekue, ha katu mbovy ijapytepekuéra ojeiporavo.
6 Umi ndojeporavóiva ojapókuri peteĩ angaipa ivaietereíva, oikógui hikuái pytũmbýpe asaje vove.
7 Ha kóva rupi Che ame’ẽkuri peẽme tembiapoukapy pehenói hag̃ua peteĩ asamblea solemne, umi pene ajúno ha pende jahe’o ojupi hag̃ua upe Señor de Sabaot apysápe, he’iséva oñehesa’ỹijóvo ára peteĩha apohare, upe iñepyrũmby ha ipaha.
8 Héẽ, añetehápe Che ha’e peẽme, Che ame’ẽkuri peẽme tembiapoukapy pemopu’ã hag̃ua peteĩ óga, upe ógape Che ambyaose yvategua pu’aka reheve umi Che aiporavova’ekuépe;
9 Kóva ha’égui Túva promésa peẽme g̃uarã; upévare, Che amanda peẽme pepyta hag̃ua, che apostolkuéraicha Jerusalén-pe jepeve.
10 Upevére, che rembiguaikuéra ojapókuri peteĩ angaipa ivaitéva; ha oĩkuri ñorairõ profetakuéra mbo’ehaópe; che py’apyeteva’ekue, he’i pene Ñandejára; upévare, Che amosẽkuri chupekuéra ojehavira hag̃ua.
11 Añetehápe Che ha’e peẽme, che aipota pemopu’ã peteĩ óga. Peñongatúramo che rembiapoukapykuéra, pendepu’akáta pemopu’ã hag̃ua.
12 Napeñongatúiramo che rembiapoukapykuéra, upe Túva mborayhu ndopytamo’ãi penendive; upévare, peikóta pytũmbýpe.
13 Ko’ág̃a, kópe oĩ arandu, ha pe Ñandejára potapy—toñemopu’ã pe óga, ani múndo ojapoháicha, Che ndahejáigui peẽme peiko múndo oikoháicha;
14 Upévare, toñemopu’ã pe Che ahechaukataháicha mbohapy pende apytepeguápe, pehenói ha peordenátavape ko pu’akápe g̃uarã.
15 Ha pe koty orekóta hyepýpe cincuenta y cinco pies ipykue ha sesenta y cinco ipukukue.
16 Ha pededikáta chéve g̃uarã iguypegua koty ryepy pene ñeme’ẽmby sacramental-rã, ha pepredika hag̃ua, umi pene ajúno ha pene ñembo’erã, ha umi pene rembipota imarangatuvéva ñeme’ẽmby chéve g̃uarã, he’i pene Ñandejára.
17 Ha pededika chéve g̃uarã pe koty yvategua che apostolkuéra mbo’ehaorã, he’i upe Ta’ýra Ahmán; térã, ambue ñe’ẽme, Alfa; térã, ambue ñe’ẽme, Omega; ha’éva, Jesucristo pende Tupã. Amén