Sección 67
Rrevelasiõ oñemeʼẽvaʼekue José Smith, upe Proféta rupive, Hiram, Ohio-pe, noviembre 1831-pe. Uperõguare ojejapókuri peteĩ conferencia especial, ha upévape, umi rrevelasiõ oñemeʼẽmaveʼekue Ñandejáragui pe Proféta rupive, ojehecha ha oñemoporã iñeguenohẽrã, (tojehecha sección 1 moñepyrũ). William W. Phelps omoĩramókuri Tupao imprenta Independece, Misuri-pe. Upe conferencia-pe ojeʼe oñeguenohẽ hag̃ua umi rrevelasiõ peteĩ kuatiañeʼẽme hérava Book of Commandments (Tembiapoukapykuéra Kuatiañeʼẽ), ha oñeimprimi hag̃ua 10.000 kópia (upe rire oguejýva 3.000 kópiape, mbaʼeasy oñeharoʼỹva rupi). Heta hermano omeʼẽ testimónio mbarete, añeteguaha umi rrevelasiõ oñembyatyʼakue oñeguenohẽ hag̃ua, otestifika haguéicha pe Espíritu Santo, oñehẽʼakue hiʼarikuéra. José Smith rembiasakuépe ojeʼe, oñemeʼẽ rire pe rrevelasiõ ojeikuaáva sección 1 ramo, oñeñeʼẽhague ñeʼẽnguéra ojeporúvare umi rrevelasiõme. Ha osẽ ko rrevelasiõ.
1–3, Ñandejára ohendu Hiʼelder-kuéra ñemboʼe ha oñangareko hesekuéra; 4–9, Haʼe odesafia tekove iñaranduvévape ohaijey hag̃ua umi Irrevelasiõ imbaʼeguasuʼỹvéva; 10–14, Elder-kuéra ijeroviarekóva oñemoingovéta upe Espíritu rupive ha ohecháta Tupã rova.
1 Péina ápe, pejapysaka, O che Tupaogua elder-kuéra peñembyatyʼakue, umi iñemboʼe Che ahenduʼakue ha ikorasõkuéra Che aikuaáva, ha umi ipotapy ojupiʼakue chéve.
2 Péina ápe ha péicha, che resa oĩ pende ári, ha yvága ha yvy oĩ che pópe, ha umi ára apyraʼỹmegua mbaʼerepy chembaʼe ameʼẽ hag̃ua.
3 Peñehaʼãkuri peguerovia pehupytytaha jehovasa oñeikuaveʼẽʼakue peẽme; ha katu péina ápe, añetehápe Che haʼe peẽme, oĩhague kyhyje pene korasõme, ha añetehápe, upéva rupi ndapehupytýikuri.
4 Ha koʼág̃a Che, Ñandejára, ameʼẽ peẽme peteĩ testimónio koʼã tembiapoukapy oĩva pene renondépe añeteguaha.
5 Pende resa oĩkuri che rembiguái José Smith, upe taʼýra ári, ha iñeʼẽ ha ijejavykuéra peẽ peikuaákuri; ha pehekákuri kuaapy pene korasõme, peñeʼẽkuaave hag̃ua chugui. Kóva peikuaa avei.
6 Koʼág̃a, peiporavo Tembiapokapykuéra Arandukágui, pe imbaʼeguasuʼỹvéva ijapyteguikuéra, ha pehenói pe iñaranduvéva pende apytégui;
7 Térã, oĩramo pende apytépe ikatúva ojapo peteĩ peichagua, upérõ pejehustifika pejévo ndapeikuaaiha añeteguápa umíva;
8 Ha katu ndaikatúirõ pejapo peteĩ peichagua, peime kondenasiõ guýpe ndapetestifikáirõ umíva añeteguaha.
9 Peikuaágui ndaiporiha tekojojaʼỹ ipypekuéra, ha pe ijojáva yvatégui ou, umi tesape Túvagui.
10 Ha avei, añetehápe Che haʼe peẽme, penembaʼeha upe mbaʼeporã, ha Che ajapo peẽme peteĩ promésa, peẽ peñeordenavaʼekue ko ministériope, peipeʼáramo pende jehegui opa jeguerekose ha kyhyje, ha peñemomirĩ che renondépe, napeñemomirĩmbáigui, upe vélo ojeipeʼáta ha cherecháta, ha peikuaáta Che haʼeha—ndahaʼéi apytuʼũ mortal térã natural-pe, ha katu espiritual-vape.
11 Ndaipórigui avave arakaʼeve ohechavaʼekue Tupãme hetépe, ndahaʼéirõ oñemoingovéva Tupã Espíritu rupive.
12 Ni ndaikatúi peteĩ yvypóra natural ogueropuʼaka Tupã ñeime, ni apytuʼũ mortal rupive.
13 Ndaikatúi pegueropuʼaka koʼág̃a Tupã ñeime, ni umi ánhel ministrasiõ; upévare, pehónte ñehaʼarõkuaápe peneporãmba peve.
14 Ani pejevy pene akãme; ha penderekojoja vove, che árape, pehecha ha peikuaáta upe oñemeʼẽʼakue peẽme che rembiguái José Smith, upe taʼýra po rupive. Amén.