Sección 17
Rrevelasiõ oñeme’ẽva’ekue José Smith upe Proféta rupive, Oliver Cowdery, David Whitmer ha Martin Harris-pe, Fayette, Nueva York, Junio 1829-pe, ohecha mboyve hikuái umi planchapegua jehai, oguerekóva Mormón Kuatiañe’ẽ jehaipyre. José ha pe chupe g̃uarã ohaíva, Oliver Cowdery, oikuaákuri, Mormón Kuatiañe’ẽ pláncha ñembohasa rupi, oñemoĩtaha mbohapy testígo ijojaha’ỹva (tojehecha Éter 5:2–4; 2 Nefi 11:3; 27:12). Oliver Cowdery, David Whitmer, ha Martin Harris oñeñandu inspirádo ha’e hag̃ua umi mbohapy testígo ijojaha’ỹva. Proféta oporandu Ñandejárape, ha oñeme’ẽ ko rrevelasiõ, ñembohovái ramo, Urim ha Tumim rupive.
1–4, Jerovia rupive, umi Mbohapy Testígo ohecháta umi pláncha ha ambue mba’e imarangatúva; 5–9, Cristo ome’ẽ testimónio Mormón Kuatiañe’ẽ idivinoha.
1 Péina ápe, Che ha’e peẽme pejeroviava’erã che ñe’ẽre, ha pejapóramo korasõ añete reheve, pehecháta umi pláncha, ha avei pe pyti’amo’ãha, pe Labán kysepuku, pe Urim ha Tumim oñeme’ẽva’ekue upe yvyty ári Jared ryke’ýpe, ha’e oñe’ẽrõguare ojováre Ñandejára ndive, ha umi mboguataha milagróso oñeme’ẽva’ekue Lehi-pe oĩ aja tave’ỹme, Mar Rojo jere rembe’ýpe.
2 Ha jerovia peguerekóva rupive ojehejáta peẽme pehecha umíva, jepeve jerovia oguerekova’ekue profetakuéra ymaguare rupive.
3 Ha pehupyty rire upe jerovia, ha pehecha rire pende resa reheve, petestifikáta umívagui, Tupã pokatu rupive.
4 Ha péva pejapóta che rembiguái, José Smith, upe ta’ýra, ani hag̃ua oñehundi, ajapo hag̃ua ko tembiapópe umi che propósito ijojáva yvypóra ra’ykuérape g̃uarã.
5 Ha petestifikáta pehechahague, che rembiguái José Smith, upe ta’ýra, ohecha haguéicha jepe; che pu’aka rupive ha’e ohechágui umíva, ha oguereko rupi jerovia.
6 Ha ombohasákuri pe kuatiañe’ẽ, pe pehẽngue che amandava’ekue chupe jepe, ha oikoveháicha pene Ñandejára ha pende Tupã ha’e añetegua.
7 Upévare, peẽme oñeme’ẽkuri upéichagua pu’aka, upéichagua jerovia, ha upéichagua don chupe oñeme’ẽva’ekue;
8 Ha pejapóramo ko’ã che rembiapoukapy paha, ame’ẽva’ekue peẽme, umi añaretã rokẽ ndaipu’akamo’ãi penderehe; che grásia iporãntema haguére peẽme g̃uarã, ha peñemopu’ãta pe ára pahápe.
9 Ha Che, Jesucristo, pene Ñandejára ha pende Tupã, añe’ẽva’ekue peẽme upéva, ikatu hag̃ua ajapo umi che propósito ijojáva yvypóra ra’ykuéra ndive g̃uarã. Amén