Sección 41
Rrevelasiõ oñemeʼẽvaʼekue Tupaópe José Smith, pe Proféta rupive, Kirtland, Ohio-pe, Febrero 4, 1831-pe. Ko rrevelasiõme oñehekomboʼe Proféta ha Tupaogua elderkuérape toñemboʼe ohupyty hag̃ua Tupã “léi” (tojehecha sección 42). José Smith og̃uahẽramoite Kirtland-pe, Nueva York-gui, ha Leman Copley, Tupao miembro oikóva Thompson yvpýpe, Ohio-pe, “ojerurékuri hermano José ha Sidney [Rigdon]-pe … ou hag̃ua oiko hendive ha haʼe omeʼẽta chupekuéra óga ha hiʼupyrã”. Ko rrevelasiõme oñemohesakã moõpa oikovaʼerã José ha Sidney Rigdon, ha avei oñehenói Edward Partridge-pe haʼe hag̃ua Tupaogua obispo peteĩha.
1–3, Elderkuéra oisãmbyhýta Tupao rrevelasiõ espíritu rupive; 4–6, Umi discípulo añetéva omog̃uahẽta ha añongatúta Ñandejára leikuéra; 7–12, Edward Partridge oñehenói Tupao obispo ramo.
1 Pejapysaka ha pehendu, O che tavayguakuéra, heʼi Ñandejára ha pene Tupã, peẽ pecherendúva, cherorýva ahovasa hag̃ua opavave jehovasa tuichavéva reheve; ha peẽ pejévape peikuaaha che réra ha napecherendúi, che pomoñeʼẽngáita, opa moñeʼẽngaikuéra ipohyivéva reheve.
2 Pejapysaka, O che tupaogua elderkuéra Che ahenoivaʼekue, péina ápe, Che ameʼẽ peẽme tembiapoukapy peñembyaty hag̃ua, peime hag̃ua peteĩ ñeʼẽme, che ñeʼẽ reheguávape;
3 Ha pene ñemboʼe jerovia rupive pehupytýta che léi, peikuaa hag̃ua mbaʼéichapa peisãmbyhýta che tupao ha peguereko porã hag̃ua opa mbaʼe cherenondépe.
4 Ha Che aju vove haʼéta pene sãmbyhyhára; péina ápe, Che ajupotaitéma, ha peñangarekóta toñeñongatu che léi.
5 Pe ohupytýva che léi ha oñongatu, péva haʼe che discípulo; ha pe heʼíva ohupytyha che léi ha noñongatúi, upéva ndahaʼéi che discípulo, ha oñemosẽta pende apytégui;
6 Naiporãigui oñemeʼẽ umi mbaʼe taʼýra ha tajyrakuéra rreinogua mbaʼéva, umi hekojojaʼỹvape, ni umi jaguápe, ni ojeity umi pérla kure renondépe.
7 Ha avei, iporã che rembiguái José Smith, pe taʼýrape, oñemopuʼã peteĩ óga, oiko ha ombohasa hag̃ua upépe.
8 Ha avei, iporã che rembiguái Sidney Rigdon toiko oikosehápe, oñongatúramo che rembiapoukapykuéra.
9 Ha avei, Che ahenóikuri che rembiguái Edward Partridge-pe; ha Che ameʼẽ peteĩ tembipoukapy, haʼe toñenói tupao ñeʼẽpu rupive, ha toñeordena obispo tupaópe, toheja iñalmasẽ ha toiporu opa hiʼára tupao rembiapópe;
10 Ojesareko hag̃ua opa mbaʼe che léipe oñemeʼẽvare chupe, pe ára che ameʼẽ vove umíva.
11 Ha kóva ikorasõ potĩgui che renondépe, ojogua rupi Natanael ymaguarévape, ipype ndaipóriva pombotavy.
12 Koʼã ñeʼẽ oñemeʼẽ peẽme, ha ãva ipotĩ che renondépe; upévare, pejesarekóke mbaʼéicha pehecha umíva, umi pene ánga ombohováitagui koʼãvare huísio árape. Taupéicha. Amén.