1 Añetehápe, péicha he’i Ñandejára, peñembyatyva’ekuépe pemog̃uahẽ hag̃ua hembipota penderehegua:

2 Péina ápe, kóva iporã pene Ñandejárape g̃uarã, ha anhelkuéra ovy’a penderehe; umi pene ñembo’e ñeikuave’ẽ ojupíkuri Señor de Sabaot apysápe ha ojehai umi oñesantifikapyre réra arandukápe, umi ha’éva múndo celestial-gua.

3 Upévare, Che ambou peẽme, che angirũnguéra, ambue Moangapyhyhára, pe Espíritu Marangatu promésa jepe, oiko hag̃ua pene korasõme; ha ko ambue Moangapyhyhára ha’e upe Che aprometeva’ekue che discípulo-kuérape, ojehaiháicha Juan testimóniope.

4 Ko Moangapyhyhára ha’e promésa Che ame’ẽva peẽme tekove ijapyra’ỹva rehegua, héẽ, reino celestial glória;

5 Ha ko glória ha’e Primohénito tupaoguáva, héẽ, Tupã mba’e, opágui imarangatuvéva, Jesucristo, Ita’ýra rupive—

6 Ha’e, pe ojupiva’ekue yvate, oguejy haguéicha avei opa mba’e guýpe, upéicha rupi oikũmbyva’ekue opa mba’e, oĩ hag̃ua opa mba’épe ha opa mba’e rupive, upe añetegua resape;

7 Pe añetegua omimbíva. Kóva ha’e Cristo resape. Ha’e oĩháicha avei kuarahýpe, ha ha’e kuarahy resape, ha pokatu umíva ojejapohague rupi.

8 Ha’e oĩháicha avei jasýpe, ha ha’e pe jasy resape, ha pokatu umíva ojejapohague rupi.

9 Avei umi mbyja resapéicha, ha upe pokatu umíva ojejapohague rupive;

10 Ha avei pe yvy, ha ipokatu, héẽ, pe yvy peimeha ári.

11 Ha tesape omimbíva, pende resapéva, ou upe pende resa ohesapéva rupive, ha’éva upe tesape omoingovéva umi pene ñeikũmby;

12 Upe tesape oúva Tupã renondégui omyenyhẽ hag̃ua tenda nandi tuichakue—

13 Pe tesape opa mba’épe oĩva, omoingovéva opa mba’e, ha’éva léi opa mba’e oñeisãmbyhyha rupi, héẽ, Tupã pokatu oguapýva ijapykajegua ári, oikóva ára apyra’ỹ py’ápe, oĩva opa mba’e mbytépe.

14 Ko’ág̃a, añetehápe Che ha’e peẽme, pe rredensiõ penderehe ojejapova’ekue rupive, ojejapo umi omanóva jeikovejey.

15 Ha espíritu ha tete ha’e yvypóra ánga.

16 Ha umi omanóva jeikovejey ha’e pe ánga rredensiõ.

17 Ha ánga rredensiõ ou upe omoingovéva opa mba’e rupive, pe ipy’ápe oje’eva’ekue umi imboriahu ha imarangatúva yvy arigua ohupytytaha upe yvy jehejapyre ramo.

18 Upévare, tekotevẽ oñesantifika opa tekojoja’ỹgui, oĩ hag̃ua ñembosako’ípe glória celestial-rã;

19 Okumpli rire ijapopy medída, oñembojeguátagui glóriape, jepeve Tupã pe Túva ñeime reheve.

20 Umi tete ha’éva reino celestial-gua ohupyty hag̃ua kóva akói ha tapiaite g̃uarã; upevarã ojejapo ha ojeapova’ekue, ha upevarã oñesantifika chupekuéra.

21 Ha umi noñesantifikáiva upe léi Che ame’ẽva’ekuére peẽme, ha’éva Cristo léi, ohupytyva’erã ambue rréino, taha’e peteĩ rréino terrestre térã peteĩ rréino telestial.

22 Pe ndaikatúiva iñe’ẽrendu peteĩ reino celestial léire, ndaikatúi ogueropu’aka peteĩ glória celestial.

23 Ha pe ndaikatúiva ipu’aka peteĩ rréino terrestre léire, ndaikatúi ipu’aka peteĩ glória yvygua.

24 Ha pe ndaikatúiva ipu’aka rréino telestial-gua léire, ndaikatúi ipu’aka peteĩ glória telestial; upévare, ndahekomarangatúi peteĩ glória rréinore. Upévare, ipu’akava’erã peteĩ rréino ndaha’éivare glória rehegua.

25 Ha avei, añetehápe Che ha’e peẽme, pe yvy iñe’ẽrenduha peteĩ reino celestial léire, okumplígui ijapopy medída, ha ndojapyharái upe léi—

26 Upévare, oñesantifikáta; héẽ, omanótarõ jepe, oñemoingove jeýta; ha ogueropu’akáta upe pokatu chupe omoingovéva, ha umi hekojojáva ohupytýta ijehejapyre ramo.

27 Omanorõ jepe hikuái, avei opu’ã jeýta hikuái, tete espiritual-kuéra.

28 Umi ha’éva peteĩ espíritu celestial-gua ohupytýta upe tete ha’eva’ekue tete natural; héẽ, peẽ pehupytýta pende rete, ha pende glória ha’éta upe pende rete oñemoingovéva rupive.

29 Peẽ umi peñemoingovéva glória celestial pehẽ rupive, upéicha pehupytýta chugui, peteĩ plenitu jepeve.

30 Ha umi oñemoingovéva glória terrestre pehẽngue rupive, upéicha ohupytýta chugui, peteĩ plenitu jepeve.

31 Ha avei umi oñemoingovéva glória telestial pehẽngue rupive, upéicha ohupytýta chugui, peteĩ plenitu jepeve.

32 Ha umi opytáva avei oñemoingovéta; upevére, ou jeýta hikuái hendag̃uáme, ovy’a hag̃ua hikuái umi ohupytysévare, ndovy’aséigui hikuái umi ikatúvare ohupytýkuri.

33 Ha mba’épa ohupytýne pe kuimba’e oñeme’ẽvape peteĩ don, nomog̃uahẽiramo upe don? Péina ápe, ni ndovy’ái upe oñeme’ẽvare chupe, ni ndovy’ái upe don ome’ẽvare.

34 Ha avei, añetehápe Che ha’e peẽme, upe léire oñeisãmbyhýva, avei léire oñeñongatu, ha kóvare oñemoĩporã ha oñesantifika.

35 Upe ojapyharáva peteĩ léi, ha ndaipu’akáiva upe léire, ha katu oñemoĩséva ijupe peteĩ léi ramo, ha oikose angaipápe, ha opytapaite angaipápe, ndaikatúi oñesantifika léire, ni poriahuverekóre, ni hustísiare, ni huísiore. Upévare, opytava’erã gueteri hikuái ky’ápe.

36 Opa rréinope oñeme’ẽva’ekue peteĩ léi;

37 Ha oĩ heta rréino; ndaipórigui tenda noĩrihápe rréino; ha ndaipóri rréino noĩriha tenda, taha’e peteĩ rréino tuichavéva térã michĩvéva.

38 Ha mayma rréinope oñeme’ẽva’ekue peteĩ léi; ha mayma léipe g̃uarã oĩ límite ha kondisiõ.

39 Opa oikovéva okumpli’ỹva ko’ã kondisiõ ndojehustifikái.

40 Akãporã ojoajúgui akãporãndi; arandu omog̃uahẽ arandúpe; añetegua oñañua añeteguápe; virtu ohayhu virtúpe; tesape ojoaju tesapére; poriahuvereko ombyasy poriahuverekópe ha ojerure imba’éva; hustísia oho meme ha ojerure imba’éva; huísio oho upe oguapýva apykajegua ári ha oisãmbyhy ha ojapóva opa mba’e rova renondépe.

41 Ha oikũmby opa mba’e, ha opa mba’e oĩ henondépe, ha opa mba’e oĩ ijerére; ha ha’e oĩ opa mba’e ári, ha opa mba’épe, ha opa mba’e rupive, ha ojere opa mba’ére; ha opa mba’e oiko ha’e rupive ha chugui, héẽ, Tupã, akói ha tapiaite g̃uarã.

42 Ha avei, añetehápe Che ha’e peẽme, ha’e ome’ẽva’ekue peteĩ léi opa mba’épe, omýiva rupive umíva hi’ára ha hi’arajerépe;

43 Ha hapekuéra oñemoĩmbyre, héẽ, umi yvága ha yvy rape, oikehápe upe yvy ha opa umi planéta.

44 Ha umíva ojohesape hi’ára ha hi’arajerépe, hi’aravo’i, hi’aravo, idía, isemána, imése, ha hi’arýpe. Opa ko’ãva ha’e peteĩ ary Tupãme, ha katu ndaupéichai yvypórape.

45 Pe yvy ojere umi ipepo ári, ha kuarahy ohesape ára aja, ha jasy ohesape pyhare aja, ha umi mbyja avei ohesape, ojerévo umi ipepo ári glóriape, Tupã pokatu mbytépe.

46 Mba’ére ambojojáta ko’ã rréino ikatu hag̃ua peikũmby?

47 Péina ápe, opa ko’ãva ha’e rréino, ha oimeraẽ tekove ohechava’ekue oimeraẽva térã ko’ãvagui michĩvéva, ohechava’ekue Tupãme omba’apóvo ituichakue ha ipokatúpe.

48 Che ha’e peẽme, ohechákuri chupe; upevére, upe ouva’ekue imba’ekuérape noñeikũmbýikuri.

49 Upe tesape omimbi umi pytũmbýpe, ha umi pytũmby ndoikũmbýi; upevére, oúta ára peikũmbytaha, Tupãme jepeve, peñemoingovévo ipype ha ha’e rupive.

50 Upérõ peikuaáta cherechahague, ha’eha Che, ha ha’eha tesape añete oĩva pende pype, ha peẽ peimeha chepype; upeicha’ỹrõ ndaikatumo’ãikuri pekakuaa.

51 Péina ápe, Che ambojojáta ko’ã rréino peteĩ kuimba’e orekóvare peteĩ ñu, ha ombou hembiguaikuéra oyvyjo’o hag̃ua pype.

52 Ha he’i peteĩháme: Tereho ha emba’apo upe ñúme, ha aravo peteĩháme Che ajúta ne rendápe, ha rehecháta che rova rory.

53 Ha he’i mokõiháme: Nde avei tereho upe ñúme, ha aravo mokõiháme Che rovisitáta che rova rorýpe.

54 Ha avei mbohapyhápe, he’ívo: Che rovisitáta;

55 Ha irundyhápe, ha péicha duodésimo peve.

56 Ha ñu jára ou peteĩháme aravo peteĩháme, ha opyta hendive opa upe aravo pukukue, ha ha’e ovy’a ijára rova resapére.

57 Ha upérõ osẽ peteĩha rendágui ovisita hag̃ua avei mokõiháme, ha mbohapyha, ha irundyha, ha péicha duodésimo peve.

58 Ha kóicha opavave ohupyty ijára rova resape, opa kuimba’e hi’aravópe, hi’árape, ha hi’arajerépe.

59 Oñepyrũvo peteĩhágui, ha kóicha ipahagua peve; ha ipahagua guive peteĩha meve, ha peteĩha guive ipahagua peve;

60 Opa kuimba’e hi’orden teépe, oñekumpli peve hi’aravo, jepeve ijára omanda haguéicha chupe, ijára ojeglorifika hag̃ua hese, ha ha’e ijárare, opavave ojeglorifika hag̃ua.

61 Upévare, Che ambojojáta opa ko’ã rréino ha umi ipype oikóva ko parávolare—mayma rréino hi’aravópe ha hi’árape ha hi’arajerépe, apoukapy Tupã omoĩ haguéicha.

62 Ha avei, añetehápe Che ha’e peẽme, che angirũnguéra, Che aheja peẽme ko’ã ñe’ẽ pejepy’amongeta hag̃ua hese pene korasõme, ko tembiapoukapy Che ame’ẽva reheve peẽme, cherenói hag̃ua Che aime ag̃ui aja—

63 Peñemboja cherehe, ha Che añembojáta penderehe; chereka jesarekópe ha chejuhúta; pejerure ha oñeme’ẽta peẽme; pembota ha ojepe’áta peẽme.

64 Oimeraẽ mba’e Túvape pejeruréva che rérape oñeme’ẽta peẽme, iporãramo peẽme g̃uarã;

65 Ha pejerurérõ peteĩ mba’e naiporãiva peẽme g̃uarã, ha’éta pene kondenasiõrã.

66 Péina ápe, ko pehendúva ha’e peteĩ tave’ỹme osapukáiva ñe’ẽpúicha—tave’ỹme, ndaikatúigui pehecha chupe—che ñe’ẽpu, che ñe’ẽpu ha’égui Espíritu; pe che Espíritu añetegua; pe añetegua opyta ha ndaijapýrai; ha oĩramo pendepype, okakuaáta.

67 Ha pema’ẽramo che glóriare añónte, pende retepy henyhẽta tesapégui ha ndaiporimo’ãi pytũmby pendepype; ha tete tesapégui henyhẽva oikũmby opa mba’e.

68 Upévare, peñesantifika, pene akã oĩ hag̃ua Tupãre añónte, ha oúta umi ára pehechataha chupe; ha’e ohechaukátagui hova peẽme, ha hi’árape, ha ha’e oipotaháicha, ha hembipotáicha.

69 Penemandu’áke promésa guasu ha ipaháva Che ajapova’ekue peẽme; peipe’a tekorei pene akãgui ha pukareiguasu pende apytégui.

70 Pepyta, pepyta ko tendápe, ha pehenói peteĩ asamblea solemne umi ha’évape g̃uarã peteĩha tembiapohára ko rréino pahápe.

71 Ha tohenói Ñandejárape umi omomaranduva’ekuépe hikuái ije’óipe, ha tojepy’amongeta ikorasõme, peteĩ ára mbyky aja, upe ñemomarandu oñeme’ẽva’ekuére chupekuéra.

72 Péina ápe, péicha Che añangarekóta pende ovecha’atýre, ha amopu’ãta élder-kuéra ha amboúta chupekuéra.

73 Péina ápe, Che ambopya’éta che rembiapo hi’árape.

74 Ha Che ame’ẽ peẽme, ha’éva tembiapohára peteĩha ko rréino pahápe, tembiapoukapy peñembyaty hag̃ua, ha peñemohenda, peñembosako’i ha peñesantifika hag̃ua; héẽ, pepurifika pene korasõ ha pemopotĩ pende po ha pende py che renondépe, Che pomopotĩ hag̃ua;

75 Che atestifika hag̃ua pende Rúpe, ha pende Tupã ha che Tupãme, penepotĩha ko ñemoñareaty ñaña ruguýgui; Che akumpli hag̃ua peẽme ko promésa, ko tuicha ha ipaháva promésa Che ajapova’ekue peẽme, ha’e jave Che rembipota.

76 Avei, Che ame’ẽ peẽme tembiapoukapy peñembo’e ha pe’ajuna meme hag̃ua ko’ág̃a guive tenondeve gotyo.

77 Ha Che ame’ẽ peẽme tembiapoukapy peñombo’e hag̃ua rreinogua doctrina.

78 Peñombo’e jesarekópe, ha che grásia oĩta penendive, peñehekombo’e porãve hag̃ua teoría, principio, doctrina, evanhélio léi, ha opa mba’e ha’évape Tupã rreinogua, iporãva peikũmby;

79 Umi mba’e yvága ha yvygua, ha yvy guypegua; umi mba’e ha’eva’ekue, ha’éva ha pya’e oikótava; umi tetãmegua mba’e, umi mba’e okapegua; umi tetãnguéra ñorairõguasu ha mba’evaiete, ha umi huísio oúva upe tetã ári; ha umi tetã ha rreinokuéra kuaapy—

80 Peime hag̃ua ñembosako’ípe opa mba’épe, Che pombou jey vove pembotuicha hag̃ua upe llamamiénto Che pohenoihague, ha misiõ Che pokomisionahague reheve.

81 Péina ápe, Che pombouva’ekue petestifika ha pemomarandu hag̃ua tavayguakuérape, ha iporã opa tekove oñemomaranduva’ekue tomomarandu hapichápe.

82 Upévare, opyta hikuái excusa-ỹre, ha iñangaipakuéra opyta iñakã arikueraite.

83 Upe voi cherekáva, chejuhúta, ha ndojehejareimo’ãi.

84 Upévare, pepyta, ha jesarekópe pemba’apo, peñemoĩporãmba hag̃ua pene ministériope, peho hag̃ua hentilkuéra apytépe ipahaite, mayma Ñandejára juru ohenóiva, ojokua hag̃ua pe léi ha osella hag̃ua pe testimónio, ha ombosako’i hag̃ua santokuérape huísio oútava aravópe g̃uarã.

85 Umi hi’ánga okañy hag̃ua Tupã ñeko’õigui, upe mba’evaiete oporohundívagui, oha’arõva umi iñañávape, ko múndo ha múndo oútavape. Añetehápe, Che ha’e peẽme, umi ndaha’éiva élder-kuéra peteĩha toĩnte upe víñape, Ñandejára juru ohenói peve chupekuéra, hi’arakuéra neĩragui og̃uahẽ; ijaokuéra naipotĩgui ko ñemoñareaty ruguýgui.

86 Pepyta pe tekosãso peñemosãsóvape; ani peike angaipápe, ha katu taipotĩ umi pende po Ñandejára ou peve.

87 Nda’aréi ko ára guive, pe yvy oryrýita ha ovaváta peteĩ tekove ka’úicha; ha pe kuarahy omokañýta hova ha ndohesapesemo’ãi; ha umi jasy oñemopytãta tuguýicha; ha ho’áta yvy gotyo pe ígo igéragui ho’aháicha.

88 Ha pene testimónio rire ou umi ñeko’õi ha pochykue ko tavayguakuéra ári.

89 Pende testimónio rire oúgui umi yvyryrýi testimónio omopyahẽtava pe yvy mbyte, ha tekovekuéra ho’áta yvýpe ha ndaikatumo’ãi opyta ñembo’yhápe.

90 Ha avei ou umi arasunu ñe’ẽpu testimónio, ha umi aratiri ñe’ẽpu, ha umi aravai ñe’ẽpu, ha umi yguasu pu’ã ñe’ẽpu osẽva umi hembe’ýgui.

91 Ha opa mba’e oĩta ñemomyipyvaípe; ha añetehápe, tekovekuéra korasõ ikangýta, kyhyje oútagui opa tavayguakuéra ári.

92 Ha anhelkuéra ovevéta yvága mbyte rupi, osapukáivo ñe’ẽpu atãme, ombopúvo Tupã turu, he’ívo: Peñembosako’íke, peñembosako’íke, O yvy ári peikovéva, ñande Tupã huísio og̃uahẽmagui. Péina ápe, péicha pe Menarã ou; pesẽke pemoirũ hag̃ua ichupe.

93 Ha uperiremi ojekuaáta peteĩ techauka yvágape, ha opa tavayguakuéra ohecháta oñondivepa.

94 Ha ambue ánhel ombopúta ituru, he’ívo: Pe tupao guasu, umi tembiapoky’a sy, ojapóva opa umi tetãme toy’u ifornikasiõnguéra ñeko’õi vínogui, omuñáva Tupã santokuérape, oñohẽva huguykuéra—upe oguapýva heta y ári ha umi yguasu ísla ári—péina ápe, ha’e pe ñanavai yvy arigua; ojejokuáva atýpe; umi ijokuaha imbaretéva, ha avave ndaikatúi ojora; upévare, oĩma ojehapy hag̃uáicha. Ha ha’e ombopúta ituru puku ha hatãporã, ha opa tetãnguéra ohendúta.

95 Ha oĩta kirirĩ yvágape peteĩ aravo mbyte aja; ha uperiremi ojepe’áta pe yvága vélo, peteĩ rrólloicha ojejoráva ojelia rire, ha Ñandejára rova ojekuaáta;

96 Ha umi santo oĩva yvy arigua oikovéva, oñemoingovéta ha ojehupíta yvate omog̃uahẽ hag̃ua chupe.

97 Ha umi okeva’ekue iñeñotỹháme osẽta, ojepe’átagui umi iñeñotỹha; ha avei ha’ekuéra ojehupíta yvate omog̃uahẽ hag̃ua chupe yvága pyenda jokoha mbytépe—

98 Ha’ekuéra Cristo ndivegua, umi yva ñepyrũha, umi hendive oguejy raẽvétava, ha umi oĩva yvy ári ha iñeñotỹha ryrúpe, umi ojehupi raẽtava yvate omog̃uahẽ hag̃ua chupe; ha opa ko’ãva Tupã ánhel turu pu ñe’ẽpu rupive.

99 Ha kóva rire, ambue ánhel ombopúta, ha turu mokõiháta; ha upérõ ou umi Cristo mba’éva ijeju rredensiõme, umi ohupytyva’ekue ipárte upe ka’irãi oñembosako’i’akuépe chupekuéra g̃uarã, ohupyty hag̃ua evanhélio, ha ojehusga hag̃ua yvypóraicha hetépe.

100 Ha avei, ambue turu ipúta, ha’éva turu mbohapyha; ha upérõ ou umi tekove espíritu ojehusgava’erã, ha oĩva kondenasiõ guýpe.

101 Ha ko’ãva ha’e umi omanóva rembyre; ha ndoikove jeymo’ãvéima hikuái ohasapa peve mil ary, ni ndoikove jeymo’ãvéima yvy paha peve.

102 Ha ambue turu ipúta, ha’éva turu irundyha, he’ívo: Ojejuhu umi opytáva ára tuicha ha ipaha peve apytépe, jepeve ipaha, ha’e umi iky’átava gueteri.

103 Ha ambue turu ipúta, ha’éva upe kínto turu, ha’éva kínto ánhel, ovevéva yvága mbyte rupive, ha ome’ẽ pe evanhélio opave’ỹva opa tetãnguéra, avaretãnguéra, ñe’ẽnguéra ha tavayguakuérape;

104 Ha kóva ha’éta ituru pu, he’ívo opa tavayguakuérape, yvága ha yvýpe, ha yvy guýpe—opa apysa ohendútagui, ha opa tenypy’a oñesũta, ha opa kũ okonfesáta, ohendu aja upe turu pu, he’íva: Pekyhyjéke Tupãgui, ha peme’ẽ glória upe apykajegua ári oguapývape, akói ha tapiaite g̃uarã; ihuísio aravo og̃uahẽmagui.

105 Ha avei, ambue ánhel, ha’éva sexto ánhel, ombopúta ituru, he’ívo: Ho’ákuri upe ojapóva opa umi tetãme toy’u ifornikasiõnguéra ñeko’õi vínogui; ha’e ho’ákuri, ho’ákuri!

106 Ha avei, ambue ánhel, ha’éva sétimo ánhel, ombopúta ituru, he’ívo: Oikopáma; oikopáma! Tupã Cordero ipu’aka ha opyrũmbákuri ha’eño pe uva ñamiháre, jepeve Tupã Ipu’akapáva ñeko’õi ñarõ uvañamiháre.

107 Ha upérõ anhelkuéra oñekoronáta ipu’aka glória reheve, ha santokuéra henyhẽta iglóriagui, ha ohupytýta ijehejapyrekuéra ha peteĩchapáta hendive.

108 Ha upérõ pe ánhel peteĩha ombopu jeýta ituru opa oikovéva apysápe, ha oikuaaukáta tekovekuéra rembiapo ñemi ha umi Tupã rembiapo hechapyrãva upe milénio peteĩha aja.

109 Ha upérõ pe ánhel mokõiha ombopúta ituru, ha ojekuaaukáta tekovekuéra rembiapo ñemi ha ikorasõ andu ha py’apota, ha umi Tupã rembiapo hechapyrãva milénio mokõiha aja.

110 Ha upéicha, pe sétimo ánhel ombopu peve ituru; ha oñembo’ýta yvy ári ha yguasu ári, ha ohuráta upe oguapýva apykajegua ári rérape, pe ára opataha; ha Satana ojejokuáta, upe mbói yma oñehenóiva aña, ha ndojejoramo’ãi mil ary pukukue aja.

111 Ha upérõ ojepoíta chugui peteĩ ára mbyky aja, ombyaty hag̃ua umi ijehérsito.

112 Ha Miguel, pe sétimo ánhel, upe arkánhel jepeve, ombyatýta ijehersitokuéra, héẽ, umi yvagagua tekoveaty.

113 Ha pe aña ombyatýta ijehersitokuéra; jepeve umi tekoveaty añaretãmegua, ha ohóta ñorairõme Miguel ha ijehersitokuéra rehe.

114 Ha upérõ ou Tupã guasu ñorairõ; ha pe aña ha ijehersitokuéra oñemombóta hendag̃uáme, anivéma hag̃ua ipu’aka hikuái santokuérare.

115 Miguel oñorairõtagui iñorairõnguéra, ha ipu’akáta upe apykajegua ohekávare pe oguapýva apykajegua árigui, héẽ, upe Cordero.

116 Kóva ha’e Tupã glória ha umi oñesantifikapyréva; ha ha’ekuéra ndohechamo’ãvéima ñemano.

117 Upévare, añetehápe Che ha’e peẽme, che angirũnguéra, pehenói pende asamblea solemne, Che amanda haguéicha.

118 Ha opavave ndojeroviáigui, peheka jesarekópe ha peñohekombo’e umi arandu ñe’ẽ; héẽ, peheka arandu ñe’ẽ umi aranduka iporãvévagui; peheka kuaapy, jepeve ñemoarandu ha jerovia rupive.

119 Peñemohenda; pembosako’i opa mba’e tekotevẽva; ha pemoĩ peteĩ óga, héẽ, peteĩ ñembo’e róga, peteĩ ajúno róga, peteĩ jerovia róga, peteĩ ñehekombo’e róga, peteĩ glória róga, peteĩ orden róga, peteĩ Tupã róga;

120 Pende jeike ha’e hag̃ua Ñandejára rérape; pende ñesẽ ha’e hag̃ua Ñandejára rérape; ha opa pene ñemomaitei ha’e hag̃ua Ñandejára rérape, po jehupi reheve pe Ijyvatevéva gotyo.

121 Upévare, pepoi opa umi pene ñemongeta reígui, opa jepukágui, opa potapyvai mba’epotágui, opa pende orgúllo ha ñemboharái rekógui, ha opa pene rembiapo ñañágui.

122 Pehenói pende apytégui peteĩ mbo’ehára; ha ani peñe’ẽ jovaipa; ha katu peñe’ẽ peteĩteĩ ha opavave pehendu upe he’íva, opavave oñe’ẽmba vove, opavave pejeedifika hag̃ua opavavére, ha opa tekove oreko hag̃ua peteĩchagua priviléhio.

123 Pejohayhúke; anive peipota umi penemba’e’ỹva; peikuaa mba’éicha peme’ẽva’erã ojupe evanhélio ojerureháicha.

124 Anive penderekorei; anive pendeky’a; anive peñe’ẽvai ojuehe; anive peke areve peikotevẽvagui; peke voi ani hag̃ua penekane’õ; pepu’ã voi pende rete ha pene akã oñemombarete hag̃ua.

125 Ha opa mba’e ári, peñemonde karida rehegua ñembojoajúpe, peteĩ mántopeicha, ha’éva ñemoĩporãmba ha py’aguapy ñembojoaju.

126 Akóinte peñembo’e, ani hag̃ua penekangy, Che aju peve. Péina ápe, péicha Che pya’e ajúta, ha pojapyhýta chemba’erã. Amén

127 Ha avei, upe óga oñembosako’íva profetakuéra mbo’ehao presidencia-pe g̃uarã órden, oñemoĩva iñehekombo’erã opa mba’e chupekuéra iporãvape g̃uarã, héẽ, opa tupao ofisialkuérape g̃uarã, térã ambue ñe’ẽme, umi oñehenóiva tupao ministériope, oñeñepyrũvo sumo sacerdote-kuéragui, umi diákono peve jepeve—

128 Ha kóva ha’éta upe mbo’ehao presidencia rogapegua órden: Pe oñehenóiva presidente térã maestro, opytáta hendag̃uáme, upe óga oñembosako’ívape chupe g̃uarã.

129 Upévare, ha’éta peteĩha Tupã rógape, peteĩ tenda, umi oñembyatýva upe ógape, ikatuhágui ohendu umi iñe’ẽ jesareko ha jehechakuaápe, ndaha’éi ñe’ẽ atãme.

130 Ha ha’e oikévo Tupã rógape, ha’étagui peteĩha upe ógape—péina ápe, kóva iporãite, ha’e hag̃ua tembiecharã—

131 Toñeme’ẽ ñembo’épe, ñesũháme Tupã renondépe, techauka térã momandu’áramo upe konvénio ijapyra’ỹvagui.

132 Ha oĩramo oikéva ha’e rire, topu’ã pe maestro, ha omopu’ãvo umi ipo yvága gotyoite, tomomaitei ijoyke’ýpe térã ijoyke’ykuérape ko’ã ñe’ẽme:

133 Ndépa joyke’y térã joyke’ykuéra? Pomomaitei Ñandejára Jesucristo rérape, techauka térã momandu’áramo upe konvénio ijapyra’ỹvagui, konvénio pomog̃uahẽvape membresíape, peteĩ determinasiõ oku’e’ỹvape, oñemoambue’ỹva ha ova’ỹvape, ha’e hag̃ua pene angirũ ha hermano, Tupã grásia rupive mborayhu joajúpe, ojeiko hag̃ua opa Tupã rembiapoukapykuérape he’iháicha, kulpa’ỹre, aguyjeme’ẽme, akói ha tapiaite g̃uarã. Amén

134 Ha pe hekopotĩ’ỹvape ko maiteirã, ndorekomo’ãi hendag̃ua pende apytépe; ndapehejamo’ãigui omongy’a che róga.

135 Ha pe oikéva ha ijeroviarekóva che renondépe, ha ha’e peteĩ joyke’y, térã joyke’ykuéra, omomaiteíta presidente térã maestro-pe, oipysóvo ipo yvága gotyo, koichagua ñembo’e ha konvénio reheve, térã he’ívo Amén, kóva rechaukahárõ.

136 Péina ápe, añetehápe, Che ha’e peẽme, kóva ha’e peteĩ ñeñomomaitei apoukapy peẽme g̃uarã Tupã rógape, profetakuéra mbo’ehaópe.

137 Ha oñemanda peẽme pejapo hag̃ua kóva ñembo’e ha aguyjeme’ẽme, pe Espíritu oñandukaháicha peẽme peje hag̃ua, opa pene rembiapópe Ñandejára rógape, profetakuéra mbo’ehaópe, ha’e hag̃ua peteĩ santuário, pe Espíritu Marangatu renda marangatu pene edifikasiõrã.

138 Ha napemog̃uahẽmo’ãi pende apytépe avave ko mbo’ehaópe, ndaha’éirõ ipotĩva ko ñemoñareaty ruguýgui;

139 Ha oñemog̃uahẽta chupe py jejohéi ordenansa rupive, pevarã oñemoĩgui.

140 Ha avei, py jejohéi rehegua ordenánsa oadministrava’erã upe tupaogua presidente térã élder presidente.

141 Oñeñepyrũta peteĩ ñembo’e reheve; ha oje’u rire mbujape ha víno, kóva ojejapova’erã techaukarã oñeme’ẽháicha Juan testimónio, kapítulo decimotercero-pe, che reheguáva. Amén