Sección 122
Ñandejára ñe’ẽ José Smith upe Profétape, oĩ aja préso Misuri, Liberty ka’irãime. Ko sección ha’e peteĩ jehaipy pehẽ Tupaópe, ojefecháva marzo 20, 1839-pe (tojehecha sección 121 moñepyrũ).
1–4, Umi yvy paha oporandúta José Smith rérare; 5–7, Opa iñeimevai ha ijehasa’asy ome’ẽta chupe tembiasa ha ha’éta iñeimeporãrã; 8–9, Pe Kuimba’e Ra’y oguejyva’ekue opa umíva guýpe.
1 Umi yvy paha oporandúta nde rérare, umi ivýrova oñembohorýta nderehe ha pe añaretã pochýpe oñemoĩta nderehe;
2 Umi ikorasõ potĩva katu, umi iñarandúva, umi hekomarangatúva ha umi hekopotĩva oheka meméta ñemoñe’ẽ, autorida ha jehovasapy nde pógui.
3 Ha nde tavayguakuéra araka’eve ndojeremo’ãi nderehe umi traidor testimónio rupive.
4 Ha hembiapovai ndepoíramo jepe mba’evaípe ha rréha ha tápia kupépe, reñemoherakuãporãta; ha ag̃ui ko’águi ne ñe’ẽpu oporomondyivéta leõ ñarõgui nde rayhu’ỹhakuéra apytépe, nderekojoja rupi; ha nde Tupã neipytyvõta akói ha tapiaite g̃uarã.
5 Reñehenóirõ rehasa hag̃ua jeiko’asy; reimérõ jehasavaípe joyke’ykuéra añetegua’ỹva apytépe; rehasavairõ mondahakuéra apytépe; reime asýrõ yvy térã yguasúpe;
6 Oñeñe’ẽvaíramo nderehe opáichagua ñe’ẽ japu reheve; oúramo nde ári nde rayhu’ỹhakuéra; ndeipe’árõ hikuái nde ru ha nde sýgui, nde joyke’y ha ne reindýgui; ha kysepuku ñeguenohẽme nde rayhu’ỹhakuéra ndeipe’áramo ne rembireko ypýgui ha ne mitãnguéragui, ha nde ra’y tuichavéva, séi áñonte jepe oguerekóva, oñesãingo nde aóre, he’ívo: Che ru, che ru, mba’éreiko ndaikatúi repyta orendive? Che ru, mba’épa ojapóta nderehe ko’ã kuimba’e? ha upérõ, mbaretépe ojehekýi ndehegui, kysepukúpe, ha rejeguerotyryry ka’irãime, ha umi nde rayhu’ỹva ojere nderehe jaguarundi ovecha ruguýreicha;
7 Ha rejeitýramo yvykuápe, térã jukaharakuéra pópe, ha reñekondena remano hag̃ua; rejeitýrõ yguasu pypukúpe; umi ypu’ã mbarete oñemoĩramo nderehe; pe yvytu vaietégui oikóramo nde rayhu’ỹha; umi yvága iñypytũramo ha opa eleménto ojoajúramo omboty hag̃ua tape; ha ko’ýte, pe añaretã rokẽ jepe ojejurupe’a guasúramo nemokõ hag̃uáicha, eikuaáke, che ra’y, opa ko’ã mba’e ome’ẽtaha ndéve tembiasa, ha ha’éta ne ñeimeporãrã.
8 Pe Kuimba’e Ra’y oguejyva’ekue opa ko’ãva guýpe. Ndetuichavépa nde chugui?
9 Upévare, epyta nde rapépe, ha pe sacerdocio opytáta nendive; umi hembe’y oñemoĩmbyrégui, ha ndaikatúi ojehasa umíva. Umi nde ára ojeikuaa ha umi ne áño noñemombykymo’ãi; upévare, ani rekyhyje yvypóra ikatúvare ojapo, Tupã oĩtagui nendive akói ha tapiaite g̃uarã.