1 Ojesella hag̃ua ko kuatiañe’ẽ ha Mormón Kuatiañe’ẽ testimónio, romomarandu José Smith, upe Proféta ha ityke’ýra Hyrum Smith, upe Patriarca martírio. Mokõivévape ojejapíkuri Carthage ka’irãime, junio 27, 1844-pe, ka’aru cinco aravo rupi, peteĩ populácho rehe—hova hũmbáva— oĩháme ciento cincuenta ha dociento-rupi tekove armádo. Hyrum-pe raẽve ohupyty umi mbokapu ha py’aguapýpe ho’a, he’ívo: Che ha’e kuimba’e omanombyréva! José opo ventána rupi, ha oñeha’ãvo opo hag̃ua, ojejuka válape, he’ívo: O Ñandejára, che Tupã! Omano riréma hikuái, oñembokapu vaipaite hi’arikuéra ha mokõivépe ohupyty irundy vála.

2 John Taylor ha Willard Richards, mokõi Dosegua, ha’ékuri umi tekove añoite oĩva’ekue pe kotýpe upe ára; peteĩva ojejapi vaietékuri irundy válape, ha katu oĩporã jeýma; ambuéva, Tupã providénsia rupi, ndohupytýikuri ijaópe ni peteĩ kuára.

3 José Smith, Ñandejára Proféta ha Techapahára, ojapovékuri tekove salvasiõrã ko múndope, oimeraẽ ambue oikova’ekuégui ipype, ndaha’éirõ Jesús añoite. Véinte ary mbykýpe, ha’e oguenohẽkuri tesakãme Mormón Kuatiañe’ẽ, ombohasava’ekue Tupã don ha pokatu rupive, ha oguenohẽuka mokõi kontinéntepe; oguerahaukákuri upe evanhélio opave’ỹva plenitu, upe kuatiañe’ẽme oĩva, irundy yvy pehẽme; oguenohẽva’ekue umi rrevelasiõ ha tembiapoukapykuéra oĩva ko Doctrina ha Konveniokuéra kuatiañe’ẽme, ha upéicha avei heta ambue dokuménto arandu ha mbo’epykuéra yvypóra ra’ykuéra ñeimeporãrã; ombyatýkuri hetaiterei Santokuéra Ára Pahapeguápe, omopu’ã peteĩ táva tuicha ha ohejákuri peteĩ téra ha terakuãporã ikatu’ỹva oñehundi. Oikova’ekue tekoporãme ha omanova’ekue tekoporãme Tupã ha itavayguakuéra resa renondépe; ha hetave Ñandejára unhídoicha umi ára ymaguarépe, osellava’ekue imisiõ ha hembiapokue huguy teépe; ha upéicha avei ityke’ýra Hyrum. Hekovépe noñemboja’óikuri ha iñemanóme ndojepe’ái ojuehegui!

4 José ohoramoguare Carthage-pe, oñemoĩ hag̃ua umi léi ojerure gua’úvape, mokõi térã mbohapy ára ojejuka mboyve, he’íkuri: “Aha ovechara’ýicha matadérope; ha katu chepy’aguapy peteĩ arahaku ko’ẽicha; areko peteĩ konsiénsia ipotĩva angaipágui Tupãre ha opa tekovekuérare. Che amanóta angaipa’ỹre, ha oje’éta uvei cherehe: ojejukákuri tuguy ro’ysãme”.—Upe pyharevete, Hyrum, oñembosako’i rire oho hag̃ua—jejukahápe, ja’éta? héẽ, ha upéichakuri—ha’e omoñe’ẽkuri ko párrafo, Éter kapítulo dóse paha mbotápe, Mormón Kuatiañe’ẽme, ha ombope upe kuatiarogue:

5 Ha ojehu ajerure Ñandejárape ome’ẽ hag̃ua grásia Gentil-kuérape, oguereko hag̃ua hikuái karida. Ha ojehu Ñandejára he’i chéve: Ndoguerekóiramo hikuái karida, upéva ndaha’éi nde rupive oikóva; nde ndejeroviarekókuri; upévare, nde aokuéra ipotĩta. Ha rehecha haguére nde rekokangy, reñemombaretéta, reguapy peve jepeve tenda che ambosako’iva’ekuépe che Ru rogaguasúpe. Ha ko’ág̃a, che … amomaitei Gentil-kuérape, héẽ, ha avei che joyke’ykuéra ahayhúvape, rojotopa peve Cristo trivunal renondépe, opa yvypóra oikuaatahápe che ao noñemongy’aihague pende ruguy rehe. Testador-kuéra ko’ág̃a omanóma, ha itestaménto ovaléma.

6 Hyrum Smith ombotýkuri cuarenta y cuatro áño, febrero 1844-pe, ha José Smith ombotýkuri treinta y ocho, diciembre 1843-pe; ha ko’ág̃a guive herakuéra ojeipapáta rrelihiõgua mártir apytépe; ha opa tetãygua omoñe’ẽva oikuaáta hepyhague tuguy iporãvéva siglo diecinueve-gua, oñeguenohẽ hag̃ua tupaogua Mormón Kuatiañe’ẽ ha ko Doctrina ha Konveniokuéra, peteĩ múndo ñehundipyre salvasiõrã; ha pe tata ikatúramo ombopiru yvyramáta hovyũva Tupã gloriarã, hasy’ỹvéta tojehapy umi yvyramáta ipirúva oñemopotĩ hag̃ua pe víña opa ñembyaígui. Oikoveva’ekue hikuái glóriare; omanova’ekue hikuái glóriare; ha glória ha’e ijopói ijapyra’ỹva. Ñemoñareatýgui ñemoñareatýpe herakuéra ohasáta ta’yrakuérape, jeguaka ramo umi oñesantifikava’ekuépe g̃uarã.

7 Iñangaipa’ỹva’ekue hikuái opa tembiapovaígui, py’ỹiete ojehechauka haguéicha upe mboyve, ha oñemoĩva’ekue hikuái ka’irãime tekovekuéra rembiapoñemi ha traisiõ rupi añónte; ha huguykuéra iñangaipa’ỹva oñeñohẽva’ekue Carthage ka’irãi yvýpe ha’e peteĩ séllo guasu “Mormónismo-re” oñemoĩva, mba’eve trivunal mundogua ikatúva ombotove; ha huguykuéra iñangaipa’ỹva Illinois estádo eskúdore, ñe’ẽ jejapyhara igovernador ome’ẽva’ekue reheve, ha’e peteĩ testimónio evanhélio opave’ỹva añeteguaha, múndo tuichakue ikatu’ỹva ombohovái, ha huguykuéra iñangaipa’ỹva tekosãso pavellõ ári, ha Estados Unidos léi guasu ári, ha’e peteĩ Jesucristo rrelihiõ embajador, opokótava tekovekuéra ijapu’ỹva korasõre opa tetãnguérape; ha huguykuéra iñangaipa’ỹva, opa mártir ruguy iñangaipa’ỹva reheve, Juan ohechava’ekue upe altar guýpe, osapukáita upe Señor de los Ejércitos-pe, ha’e ovenga peve upe tuguy ko yvy ári. Amén.