Sección 12
Rrevelasiõ oñeme’ẽva’ekue José Smith upe Proféta rupive, Joseph Knight, upe túvape, Harmony, Pensilvania, Mayo 1829-pe. Joseph Knight ogueroviákuri José Smith he’íva, oguerekoha hendive Mormón Kuatiañe’ẽ planchakuéra ha pe tembiapo ñembohasa ojejapovahína upérõguare, ha heta ára jave ha’e ome’ẽ ñepytyvõ material José Smith ha chupe g̃uarã ohaívape, ohejáva chupekuéra oho meme ñembohasáre. Joseph Knight ojerurégui, Proféta oporandu Ñandejárape ha oñeme’ẽ chupe ko rrevelasiõ.
1–6, Umi víñape omba’apóva ohupytýta salvasiõ; 7–9, Opavave omba’apose ha orekóva katupyry ikatu oipytyvõ Ñandejára rembiapópe.
1 Peteĩ tembiapo tuicha ha hechapyrãva oĩ osẽ hag̃uáicha yvypóra ra’ykuéra apytépe.
2 Péina ápe, Che ha’e Tupã; ehendu che ñe’ẽ oikove ha ipu’akapáva, hãimbevéva kysepuku hãimbejováivagui, oikéva omboja’o peve umi kangue joajuha ha karaku; upévare, ehendu che ñe’ẽ.
3 Péina ápe, pe ñu morotĩma ñemono’õrã; upévare, pe omono’õséva, tomoinge ikysekarapã imbarete reheve, ha tomono’õ ára ipuku aja, oñongatu hag̃ua hi’ángape g̃uarã salvasiõ opave’ỹva Tupã rréinope.
4 Héẽ, oimeraẽva omoingéva ikysekarapã ha omono’õva, péva oñehenói Tupãgui.
5 Upévare, rejeruréramo chéve, oñeme’ẽta ndéve; rembotáramo, ojepe’áta ndéve.
6 Ko’ág̃a, rejerurégui, péina ápe, ha’e ndéve, eñongatu umi che rembiapoukapy, ha eñeha’ã eguenohẽ tesakãme ha emopu’ã Sion káusa.
7 Péina ápe, añe’ẽ ndéve, ha avei opa umi oguenohẽséva tesakãme ha omopu’ãsévape che rembiapo;
8 Ha avave ndaikatúi omba’apo ipype nda’éirõ pe oñemomirĩ ha henyhẽva mborayhúgui, oguerekóva jerovia, ñeha’arõkuaa ha karida, iñakãguapývo opa mba’épe, oimeraẽ mba’e oñeme’ẽvape chupe oñangareko hag̃ua.
9 Péina ápe, che ha’e múndo resape ha rekove, pe ha’éva ko’ã ñe’ẽ, upévare, ehendu nde pu’aka katupyry reheve, ha upérõ, reñehenóita. Amén