Sección 99
Rrevelasiõ oñeme’ẽva’ekue José Smith upe Proféta rupive John Murdock-pe, agosto 29, 1832-pe, Hiram, Ohio-pe. John Murdock ombo’ékuri oikóvo pe Evanhélio peteĩ ary rasami aja, upe aja ita’yrakuéra—ityre’ỹva isýgui, hembireko Julia Clapp omano rire, abril 1831-pe—oikókuri ambue ogayguakuérandi Ohio-pe.
1–8, John Murdock oñehenói omomarandu hag̃ua upe evanhélio, ha umi chupe omog̃uahẽva, omog̃uahẽ Ñandejárape ha ohupytýta poriahuvereko.
1 Péina ápe, péicha he’i Ñandejára che rembiguái John Murdock-pe—Reñehenói reho hag̃ua umi tetã kuarahyresẽmeguápe, ógagui ógape, távagui távape, tavaguasúgui tavaguasúpe, remomarandu hag̃ua che evanhélio opave’ỹva umi upépe oikóvape, ñemuña ha tembiapoñaña pa’ũme.
2 Ha pe nemog̃uahẽva, chéve chemog̃uahẽ; ha reguerekóta pu’aka remombe’u hag̃ua che ñe’ẽ che Espíritu Marangatu jehechauka reheve.
3 Ha umi mitã michĩcha nemog̃uahẽva, ohupytýta che rréino; ha ojehovasapyre hikuái, umíva ohupytýtagui poriahuvereko.
4 Ha umi nembotovéva, oñembotovéta che Ru ha hógagui; ha remopotĩta nde py tapére umi tenda ñemíme testimónio ramo hesekuéra.
5 Ha péina ápe, péicha pya’e Che aju huísiope, agueroviauka hag̃ua opavavépe umi hembiapo ñañágui, ojapova’ekue hikuái cherehe, ojehaiháicha chehegui kuatiañe’ẽme.
6 Ha ko’ág̃a, añetehápe Che ha’e ndéve, naiporãi resẽ oñeme’ẽ meve nde ra’ykuérape oikotevẽva, ha oñembou py’aporãme Sion obispo-pe.
7 Ha sa’i ary rire, reipotáramo chehegui, ikatúta avei reho pe yvy porãme reguereko hag̃ua nde jehejapyre;
8 Upeicha’ỹramo, remomarandu meméta che evanhélio rejegueraha peve. Amén