1 Che rembiguái Orson Hyde oñehenóikuri iñordenasiõ rupive, omomarandu hag̃ua pe evanhélio opave’ỹva, Tupã oikovéva Espíritu rupive, tavayguágui tavayguápe, peteĩ tetãgui ambue tetãme, umi iñañáva atykuérape, isinagogakuérape, ohesa’ỹijóvo hendivekuéra ha omohesakãvo chupekuéra opa escritura-kuéra.

2 Ha, péina ápe, péicha kóva ha’e tembiecharã opa umi oñeordeva’ekue ko sacerdocio-pe, umi oñeme’ẽva’ekuépe imisiõ osẽ hag̃ua—

3 Ha kóva ha’e peteĩ tembiecharã chupekuéra, oñe’ẽva’erãha hikuái pe Espíritu Santo omomyiháicha chupekuéra.

4 Ha oimeraẽ mba’e ha’ekuéra oñe’ẽva, omomýi jave chupekuéra Espíritu Santo, ha’éta escritura, ha’éta Ñandejára rembipota, ha’éta Ñandejára he’iséva, ha’éta Ñandejára ñe’ẽpu, ha’éta Ñandejára ñe’ẽpu, ha Tupã pokatu salvasiõrã.

5 Péina ápe, kóva ha’e Ñandejára promésa peẽme, O che rembiguaikuéra.

6 Upévare, pevy’áke ha ani pekyhyje, Che Ñandejára aimégui penendive, ha aiméta pende ykére; ha petestifikáta chehegui, héẽ, Jesucristo, Che ha’eha pe Tupã oikovéva Ra’y, Che ha’ehague, Che ha’eha, ha Che ajútava.

7 Kóva ha’e Ñandejára ñe’ẽ ndéve g̃uarã, che rembiguái Orson Hyde, ha avei che rembiguái Luke Johnson-pe g̃uarã, ha che rembiguái Lyman Johnson, ha che rembiguái William E. McLellin-pe g̃uarã, ha opa che tupaogua élder-kuéra ijeroviarekóvape g̃uarã—

8 Tapeho opa mundopýre, pembo’e evanhélio mayma tekovépe, pejapóvo autorida Che ame’ẽva’ekue peẽme rupive, peporomongaraívo Túva, ha Ta’ýra, ha Espíritu Santo rérape.

9 Ha pe oguerovia ha oñemongaraíva, ojesalváta, ha pe ndogueroviáiva, oñekondenáta.

10 Ha pe ogueroviáva ojehovasáta techaukakuéra reheve oĩtava hendive, jepeve ojehaiháicha.

11 Ha peẽme oñeme’ẽta peikuaa umi ára rechaukakuéra, ha pe Kuimba’e Ra’y jeju rechaukakuéra;

12 Ha opa umi Túva ome’ẽvagui testimónio, oñeme’ẽta peẽme pu’aka pesella hag̃ua chupekuéra tekove ijapyra’ỹvape g̃uarã.

13 Ha ko’ág̃a, umi mba’e rehegua oñembojoapýva umi konvénio ha tembiapoukapýre, umíva ha’e ko’ãva—

14 Opyta ojeaparta hag̃ua tenondeve, Ñandejára árape, ambue obispo-kuéra tupaópe, oministra hag̃ua iñepyrũmeguáicha;

15 Upévare, ha’eva’erã hikuái sumo sacerdote hekomarangatúva, ha oñehenóita chupekuéra Sacerdocio de Melquisedec Primera Presidencia rupive, ndaha’éiramo Aarón ñemoñare teéva.

16 Ha ha’éramo hikuái Aarón ñemoñare tee, oguereko derécho legal oĩvo obispado-pe, ha’éramo hikuái ijypykue, Aarón ra’ykuéra apytépe;

17 Pe ijypykue oguerekógui derécho ko sacerdocio presidencia-pe, ha umi lláve térã autorida kóva rehegua.

18 Avave kuimba’e ndoguerekói derécho legal ko oficio-pe, oguereko hag̃ua ko sacerdocio llavekuéra, ndaha’éirõ Aarón ñemoñare tee ha ijypykue.

19 Ha katu, peteĩ Melquisedec Sacerdocio sumo sacerdote, oguerekógui autorida omba’apo hag̃ua opa ofísio ikarapevévape, ha’e ikatu ojapo obispo oficio, ndojejuhúirõ peteĩ Aarón ñemoñare teéva, oñehenói ha ojeaparta ha oñeordenáramo ko pu’akápe, Melquisedec Sacerdocio Primera Presidencia po rupive.

20 Ha peteĩ Aarón ñemoñare tee oñehenoiva’erã avei ko Presidencia-re, ha ojejuhu hekomarangatuha, ha oñeunhi ha oñeordena ko Presidencia po rupive; upeicha’ỹramo, ndopytái legalmente autorisádo oofisia hag̃ua isacerdocio-pe.

21 Ha katu, pe apoukapy rupive, derécho orekóva rehegua hikuái sacerdocio-pe, ohasáva túvagui ta’ýrape, ha’ekuéra ikatu ojerure iñunsiõ, ikatúrõ oimeraẽ ára ohechauka ilináhe, térã ojejuhu, Ñandejára rrevelasiõ rupive upe presidencia oje’ehague po guýpe.

22 Ha avei, avave obispo térã sumo sacerdote ojeapartáva ko ministerio-rã, ndojehusgái térã noñekondenaiva’erã, mba’evéichagua tembiapovaíre, ndaha’éiramo tupao Primera Presidencia renondépe;

23 Ha ojejuhúramo chupe kúlpa reheve ko Presidencia renondépe, testimónio oñembohovaikuaa’ỹva rupi, oñekondenáta chupe;

24 Ha oñearrepentíramo oñeperdonáta chupe, tupaogua konvénio ha tembiapoukapykuérape he’iháicha.

25 Ha avei, oĩramo sy ha túva orekóva ta’yrakuéra Sion-pe térã oimeraẽ ijestáka oñemohendapyrévape, ha nombo’éi chupekuéra oikũmby hag̃ua arrepentimiénto rehegua doctrina, jerovia Cristo rehe, pe Tupã oikovéva Ra’y, ha ñemongarai ha Espíritu Santo don, po ñemoĩ rupive, ohupytývo ócho áño, pe angaipa opytáta ituvakuéra akã ári.

26 Kóva ha’étagui léi umi Sion-pe oikóvape g̃uarã, térã oimeraẽ ijestáka oñemohendapyrévape.

27 Ha imitãnguéra oñemongaraíta iñangaipakuéra jorarã, oreko vove ócho áño, ha ohupytýta hikuái po ñemoĩ.

28 Ha ha’ekuéra ombo’éta avei imitãnguérape oñembo’e hag̃ua, ha oguata joja hag̃ua Ñandejára renondépe.

29 Ha umi Sion-pe oikóva oñongatúta avei Pytu’uha ára osantifika hag̃ua.

30 Ha umi Sion-pe oikóva imandu’áta avei umi hembiaporãre, oñemandágui chupekuéra omba’apo hag̃ua opa jeroviarekópe; umi hekoreívare oñemomandu’átagui Ñandejára renondépe.

31 Ko’ág̃a, Che, Ñandejára, ndacherorypái umi Sion-pe oikóva ndive, oĩgui hekoreíva ijapytepekuéra; ha avei imitãnguéra okakuaahína tekoñañáme; ha avei ndoheka mbaretéi hikuái umi ára apyra’ỹmegua rrikésa, ha katu umi hesa henyhẽ mba’epotágui.

32 Ko’ã mba’e ndaiporiva’erã ha ojepe’ava’erã ijapyteguikuéra; upévare, togueraha che rembiguái Oliver Cowdery ko’ã ñe’ẽ Sion retãme.

33 Ha peteĩ tembiapoukapy Che ame’ẽ chupekuéra—upe nokumplíriva iñembo’ekuéra Ñandejára renondépe, ára ojejapova’erãhápe, toiko hese momandu’a che tavayguakuéra hue renondépe.

34 Ko’ã ñe’ẽ añetegua ha ijeroviapy; upévare, ani pejapyhara ko’ãva, ha ani peipe’a chugui mba’eve.

35 Péina ápe, Che ha’e Alfa ha Omega, ha Che ajupotáma. Amén.