Sección 106
Rrevelasiõ oñeme’ẽva’ekue José Smith upe Proféta rupive, Kirtland, Ohio-pe, Noviembre 25, 1834-pe. Ko rrevelasiõ ha’e Warren A. Cowdery-pe g̃uarã, Oliver Cowdery ryke’y.
1–3, Warren A. Cowdery oñehenói ofisial presidente upepegua ramo; 4–5, Pe Jeju Mokõiha nomondyimo’ãi mondaháicha umi tesape ra’ýpe; 6–8, Tuicha jehovasa ogueru Tupaópe ñeiptyvõ jeroviarekópe.
1 Che aipota che rembiguái Warren A. Cowdery toñehenói ha toñeordena che tupaogua sumo sacerdote presidente Freedom retãme ha umi tenda jerereguápe;
2 Ha tombo’e che evanhélio opave’ỹva ha tohupi iñe’ẽpu omomarandu hag̃ua tavayguakuérape, ndaha’éi ha’e oikohápente, ha katu umi kondádo ijypypeguápe;
3 Ha tomoĩ opa hi’ára ko llamamiénto yvate ha marangatúpe, Che ame’ẽva chupe ko’ág̃a, ohekávo jesarekópe yvága rréino ha hekojoja, ha opa mba’e tekotevẽva oñemoĩvéta; mba’apohára ohupytýgui hembiapo repy.
4 Ha avei, añetehápe Che ha’e peẽme, Ñandejára jeju hi’ag̃uimaha, ha oipy’amondýita múndope mondaháicha pyharekue—
5 Upévare, pejeku’a jokua, oiko hag̃ua pendehegui tesape ra’ykuéra, ha ani upe ára penepy’amondýi mondaháicha.
6 Ha avei, añetehápe Che ha’e peẽme oĩhague vy’apavẽ yvágape che rembiguái Warren oñakãityrõguare che sétrope, ha oñemomombyry tekovekuéra ñemoñuhãgui;
7 Upévare, ojehovasapyre che rembiguái Warren, che aiporiahuverekótagui chupe; ha, ikorasõ ojejapóramo jepe, Che ambotuicháta chupe oñemomirĩramo che renondépe.
8 Ha Che ame’ẽta chupe grásia ha jeroviapy ojejoko mbarete hag̃ua; ha ha’e memérõ peteĩ testígo ijeroviarekóva ha peteĩ tesape tupaópe g̃uarã, Che ambosako’íkuri chupe g̃uarã peteĩ koróna umi che Ru rogaguasúpe. Taupéicha. Amén