1 Peteĩ tembiapo tuicha ha hechapyrãva oĩ osẽ hag̃uáicha yvypóra ra’ykuéra apytépe.

2 Péina ápe, Che ha’e Tupã; ehendu che ñe’ẽ, oikove ha ipu’akáva, hãimbevéva kysepuku hãimbejováivagui, oikéva omboja’o peve kangue joajuha ha karaku; upévare, ehendu che ñe’ẽnguéra.

3 Péina ápe, ñu morotĩma ñemono’õrã; upévare, pe omono’õséva, tomoinge ikysekarapã imbarete reheve, ha tomono’õ ára puku aja, oñongatu hag̃ua hi’ángape g̃uarã salvasiõ opave’ỹva Tupã rréinope.

4 Héẽ, oimeraẽva omoingéva ikysekarapã ha omono’õ, péva oñehenói Tupãgui.

5 Upévare, pejeruréramo chéve, oñeme’ẽta peẽme; pembotáramo ojepe’áta peẽme.

6 Ko’ág̃a, pejerurégui, péina ápe, Che ha’e peẽme, peñongatu umi che rembiapoukapy, ha peñeha’ã peguenohẽ tesakãme ha pemopu’ã Sion káusa;

7 Ani peheka rrikésa ha katu arandu, ha péina ápe, umi Tupã ñemimby ojeikuaaukáta peẽme, ha upérõ pende rríkota. Péina ápe, irríko pe oguerekóva tekove ijapyra’ỹva.

8 Añetehápe, añetehápe ha’e ndéve, chehegui reipotaháicha jepe oñeme’ẽta ndéve; ha reipotáramo, ha’éta tembiporu ejapo hag̃ua heta mba’e porã ko ñemoñareatýpe.

9 Ani rembo’e mba’eve ko ñemoñareatýpe ndaha’éiramo arrepentimiénto; eñongatu umi che rembiapoukapy, ha eipytyvõ tosẽ tesakãme che rembiapo, che rembiapoukapýpe oĩháicha, ha rejehovasáta.

10 Péina ápe, reguereko peteĩ don, ha rejehovasapyre ne don rupive. Nemandu’áke imarangatu ha yvatégui ouha—

11 Ha reporandúramo, reikuaáta ñemimby tuicha ha hechapyrãva; upévare, reiporúta ne don rejuhu hag̃ua umi ñemimby, hetápe reikuaauka hag̃ua pe añetegua, héẽ, regueroviauka hag̃ua chupekuéra umi hape oĩvaiha.

12 Ani reikuaauka ne don avavépe, ỹramo umi nde jerovia reheguávape. Ani re’apo’i umi mba’e imarangatúva.

13 Rejapóramo pe iporãva, héẽ, ha repytáramo jeroviarekópe ipahaite peve, rejesalváta Tupã rréinope, ha’éva opa Tupã don-gui pe tuichavéva; ndaipórigui don tuichavéva salvasiõ don-gui.

14 Añetehápe, añetehápe Che ha’e ndéve, rejehovasapyre pe rejapova’ekuére; reporandúgui chéve, ha péina ápe, opa ára reporandu jave, oñeme’ẽkuri ndéve ñehekombo’e che Espíritu-gui. Ndaupéichai rire, nereg̃uahẽiva’erãmo’ã tenda ko ára reiháme.

15 Péina ápe, nde reikuaa reporanduhague chéve ha che amyesakã ne akãmegua; ha ko’ág̃a che ha’e ndéve ko’ã mba’e reikuaa hag̃ua rejehesapehague pe añetegua Espíritu-re;

16 Héẽ, Che ha’e ndéve, reikuaa hag̃ua ndaiporiha oikuaáva umi ne korasõ andu ha py’apota, ndaha’éiramo Tupã.

17 Che ha’e ndéve ko’ã mba’e testimónio ramo ndéve g̃uarã—umi ñe’ẽ ha tembiapo rehaiva’ekuehína añeteguaha.

18 Upévare, ejesarekóke; eime che rembiguái José ykére jeroviarekópe, oimeraẽ jejopy vai ojejuhúvape upe ñe’ẽ rupi.

19 Eñemoñe’ẽ chupe ojavy jave, ha emog̃uahẽ avei ñemoñe’ẽ chugui. Ndepy’aguapy; ne akãguapy; nderekoporã; ereguereko py’aguapy, jerovia, ñeha’arõkuaa ha karida.

20 Péina ápe, nde ha’e Oliver, ha Che añe’ẽva’ekue ndéve potapy reguerekóva rupi; upévare, eñongatu mba’erepýicha ko’ã ñe’ẽ ne korasõme. Ejeroviarekóke ha ejesareko eñongatúvo Tupã rembiapoukapykuéra, ha roañuãta che mborayhu jyvápe.

21 Péina ápe, Che ha’e Jesucristo, Tupã Ra’y. Chete pe ajuva’ekue umi chemba’évape, ha umi chemba’éva nachemog̃uahẽi. Che ha’e tesape omimbíva pytũmbýpe, ha umi pytũmby ndoikũmbýi.

22 Añetehápe, añetehápe, Che ha’e ndéve, eipotavéramo testimónio, epensa upe pyharére ejerure’asýrõguare ne korasõme, reikuaa hag̃ua pe añetegua ko’ã mba’e rehegua.

23 Nañe’ẽipa py’aguapy ne akãme upe mba’ére? Mba’e testimónio tuichavéva ikatu reguereko Tupãgui?

24 Ha ko’ág̃a, péina ápe, rehupytýkuri peteĩ testimónio; ha ha’érõkuri ndéve umi mba’e avave oikuaa’ỹva, nderehupytýipa péicharõ peteĩ testimónio?

25 Ha, péina ápe, ame’ẽ ndéve peteĩ don, reipotáramo chehegui, rembohasa hag̃ua, che rembiguái José-cha jepeve.

26 Añetehápe, añetehápe, Che ha’e ndéve, oĩ umi jehaipyre oguerekóva heta che evanhélio rehegua, ojejokova’ekue tavayguakuéra rembiapoñaña rupi;

27 Ha ko’ág̃a Che amanda ndéve, nerembipota porãramo—rembyatyséramo umi mba’erepy ndejupe g̃uarã yvágape—upéicharõ, reipytyvõta ne don reheve, osẽ hag̃ua tesakãme umi che escritura pehẽngue oñeñomiva’ekue tembiapovai rupi.

28 Ha ko’ág̃a, péina ápe, Che ame’ẽ ndéve, ha che rembiguái José-pe avei, ko don llavekuéra, oguenohẽtava tesakãme ko ministério; ha mokõi térã mbohapy testígo juru rupi oñemoĩta opa ñe’ẽ.

29 Añetehápe, añetehápe, Che ha’e peẽme, ombotovéramo hikuái che ñe’ẽnguéra ha ko che evanhélio ha ministério pehẽngue, pejehovasapyre, ndaikatúigui ha’ekuéra ojapove penderehe, cherehe ojapo haguégui.

30 Ha ojapóramo jepe penderehe cherehe ojapo haguéicha, pejehovasapyre, peikótagui chendive glóriape.

31 Ha katu nombotovéiramo hikuái umi che ñe’ẽ, oñemoĩtava testimónio oñeme’ẽtava rupive, ojehovasapyre hikuái, ha upéramo, peguerekóta vy’apavẽ umi pene rembiapokuére.

32 Añetehápe, añetehápe, Che ha’e peẽme, ha’e haguéicha che discípulo-kuérape, oĩháme mokõi térã mbohapy ijatýva che rérape, peteĩ mba’ére, péina ápe, upépe Che aiméta ijapytepekuéra—jepe Che aimeháicha pende apytépe.

33 Ani pekyhyje, che ra’ykuéra, pejapo hag̃ua iporãva, oimeraẽ mba’e peñemitỹva, upevaite pemono’õtagui. Upévare, peñotỹramo iporãva, pemono’õta avei iporãva pende jopoirã.

34 Upévare, ani pekyhyje, ovecha’atymi; pejapo iporãva; yvy ha añaretã ojoajúramo jepe oñemoĩ hag̃ua penderehe, oiméramo peñemopu’ã che itaguasu ári, ndaipu’akamo’ãi umíva.

35 Péina ápe, Che napokondenái; tapeho ha anive peneangaipa; pejapo hekópe tembiapo amandava’ekue peẽme.

36 Pema’ẽ cherehe opa akãremiandúpe; ani peduda, ani pekyhyje.

37 Pema’ẽ umi jekutu kuare che yke oikytĩva’ekue, ha avei umi klávo rendague che po ha che pýpe; pendejeroviareko, peñongatu che rembiapoukapykuéra, ha oñeme’ẽta peẽme jehejapyre ramo yvága rréino. Amén