Sección 54
Rrevelasiõ oñeme’ẽva’ekue José Smith upe Proféta rupive, Newel Knight-pe, Kirtland, Ohio-pe, junio 10, 1831-pe. Tupao miembro-kuéra oikóva Thompson, Ohio-pe, noĩri peteĩ ñe’ẽme mba’erepykuéra ñekonsagra reheguápe. Ojehechauka chentese ha takate’ỹ. Imisiõ rire temblador-kuérape (tojehecha sección 49 moñepyrũ), Leman Copley ojapyharákuri ikonvénio okonsagra hag̃ua igránha guasu tenda jehejapyre ramo, Santokuéra og̃uahẽvape g̃uarã Collesvile, Nueva York-gui. Upéva rupi, Newel knight (Thompson-gua miembro-kuéra líder), ha ambue élder-kuéra, ou Proféta rendápe oporandúvo chupe mba’éichapa ojapova’erã. Proféta oporandu Ñandejárape ha ohupyty ko rrevelasiõ, oñemandávape Thompson-gua miembro-kuérape oheja hag̃ua Lemon Copley rráncho, ha oje’ói hag̃ua Misuri-pe.
1–6, Santokuéra oñongatuva’erã evanhélio konvénio ohupyty hag̃ua poriahuvereko; 7–10, Oha’arõkuaava’erã hikuái jeiko’asýpe.
1 Péina ápe, péicha he’i Ñandejára, jepe Alfa ha Omega, pe ñepyrũmby ha ipaha, jepeve pe ojehupiva’ekue kurusúre múndo angaipáre—
2 Péina ápe, añetehápe, añetehápe, Che ha’e ndéve, che rembiguái Newel Knight, repytava’erã ñemova’ỹme upe kárgo che rohenói haguépe.
3 Ha nde joyke’ykuéra okañyséramo ihayhu’ỹhakuéragui, toñearrepenti hikuái opa iñangaipágui ha añetehápe toñemomirĩ ha toñembyasy cherenondépe.
4 Ha ojejapyharágui upe konvénio ha’ekuéra ojapova’ekue chendive, ko’ág̃a upéva opytarei ha ndaha’éi mba’eve.
5 Ha áina pe oúva rupi ko tembiapovai, iporãve’erãmo’ã chupe oñapymi rire yguasu ruguápe.
6 Ha katu ojehovasapyre umi oñongatuva’ekue pe konvénio ha ojapo pe tembiapoukapy, ha’ekuéra ohupytýtagui poriahuvereko.
7 Upévare, pepu’ã ko’ág̃a ha peñani upe tetãgui, ani ou pende ári umi penderayhu’ỹva; ha tapeho, ha pehenói máva peipotávape pende líder-rã, ha tome’ẽ pirapire penderehe.
8 Ha péicha peje’óita umi tenda oĩvape kuarahyreike gotyo, Misuri retãme, Lamanita-kuéra retã rembe’ýpe.
9 Ha opa rire upe je’ói, péina ápe, Che ha’e peẽme, pegana penderekovépe g̃uarã kuimba’e ojapoháicha, Che ambosako’i peve peteĩ tenda peẽme g̃uarã.
10 Ha avei, peha’arõkuaa jeiko’asýpe Che aju peve; ha péina ápe, Che ajupotáma, ha che jopói oĩ chendive, ha umi voi cherekava’ekue ojuhúta pytu’u hi’angakuérape g̃uarã. Taupéicha. Amén.