Setiembre 30, 1978-pe, Jesucristo Tupao Santokuéra Ara Pahapegua Conferencia General Semestral Número 148-pe, Presidente N. Eldon Tanner, Tupaogua Presidencia General Primer Consejero, opresentákuri kóva:

Ko junio ary ñepyrũme, pe Primera Presidencia omomarandúkuri Presidente Spencer W. Kimball ohupytyhague peteĩ rrevelasiõ oipysóva sacerdocio ha templopegua jehovasakuéra opa kuimba’e ha’éva Tupao miembro hekomarangatúvape. Presidente Kimball ojerurékuri chéve aikuaauka hag̃ua conferencia-pe, ha’e ohupyty rire ko rrevelasiõ, ouva’ekue chupe heta jepy’amongeta ha ñembo’e rire, témplo kotykuéra marangatúpe, ha’e opresentahague ikonseherokuérape, omboaje ha omoneĩva’ekue upéva. Upéi oñepresentákuri Umi Dóse Apóstol Kórumpe, peteĩ ñe’ẽme omoneĩva ha, upe rire, oñepresentákuri opa ambue Autorida Heneralpe, upéicha avei omboajeva’ekue peteĩ ñe’ẽme.

Presidente Kimball ojerurékuri chéve ko’ág̃a amoñe’ẽ hag̃ua ko kuatia:

Rohechávo Ñandejára rembiapo ñemosarambi yvy ári, roñandúkuri aguyje rohechávo heta tetãygua ombohovaihague evanhélio rrestaurádo mensáhe, ha heta hetave ojoaju Tupaóre. Kóva, upe jave, oreispirákuri roikuave’ẽse hag̃ua, peteĩteĩ Tupao miembro hekomarangatúvape, opa priviléhio ha jehovasa evanhélio ome’ẽva.

Roikuaávo umi promesa Tupao proféta ha presidente-kuéra ñanemboyvegua he’iva’ekue, peteĩ árape, Tupã plan ijapyra’ỹvape, opa ñande hermano-kuéra hekomarangatúva ikatutaha ohupyty pe sacerdocio, ha rohechávo umi noñeme’ẽivape sacerdocio hekojojaha, rojerure’asýkuri are ha jesarekópe ko’ãva, ñane hermano-kuéra ijeroviarekóvare, ha rohasákuri heta aravo Témplo koty yvateguápe, rojerure’asývo Ñandejárape guía divína.

Ha’e ohendúkuri ore ñembo’e, ha rrevelasiõ rupive omoañetékuri og̃uahẽmaha upe ára aréma oñeprometeva’ekue peteĩteĩ ijeroviarekóva, Tupaopegua kuimba’e hekomarangatúva ikatutaha ohupyty pe santo sacerdocio, pu’aka reheve omomba’apo hag̃ua ijautorida divína, ha oguerovy’a hag̃ua hapicha ohayhúvandi opa jehovasa pévagui oúva, oikévape umi templogua jehovasa. Upéicha, ikatu oñeme’ẽ pe sacerdocio opa kuimba’e ha’évape Tupao miembro hekomarangatúva, oñema’ẽ’ỹre ni irrása ni ikolor rehe. Oñehekombo’e sacerdocio lider-kuérape, oentrevista porã hag̃ua opa kandidáto oñeme’ẽtavape, taha’e sacerodocio Aarónico térã Melquisedec, ojeasegura hag̃ua okumplipahína umi apoukapy oñemoĩva’ekue ojeikuaa hag̃ua hekojojápa.

Marangatúpe romomarandu, Ñandejára ko’ág̃a oikuaaukaha hembipota opa ta’yrakuéra ojehovasa hag̃ua, opa tetãme, ojapysaka hag̃ua hembiguaikuéra ojeautorisapyréva ñe’ẽpúre, ha oñembosako’i ohupyty hag̃ua opa evanhélio jehovasa.

Jahechakuaávo Spencer W. Kimball-pe, Proféta, Techapahára ha Revelador ramo, ha Jesucristo Tupao Santokuéra Ára Pahapegua Presidente, oñepropone, ñande, asamblea constituyente ramo, ñamboaje ko rrevelasiõ Ñandejára ñe’ẽ ha hembipota ramo. Opa oĩva a favor, tohechaukami omopu’ãvo ipo asu. Oimeraẽ oñeoponéva, tohechauka upéicha avei.

Vóto proposisiõ mboyveguávape ha’ékuri peteĩ ñe’ẽmegua.