Declaración Oficial 2
Mormón Kuatiañeʼẽme oñemboʼe “opavave peteĩchaha Tupã renondépe”, tahaʼe “hũ térã morotĩ, oñeñapytĩ térã isãsóva, kuimbaʼe térã kuña” (2 Nefi 26:33). Tupao rembiasa pukukue aja, tekovekuéra opa rrása ha etnia-gua heta tetãme oñemongaraivaʼekue ha oiko Tupao miembo ijeroviarekóva ramo. José Smith rekove aja, oĩvaʼekue kuimbaʼe rrása hũva Tupao miembro oñeordenavaʼekue sacerdocio-pe. Tupao rembiasa ñepyrũmbýpe, iliderkuéra nomeʼẽvéikuri upe sacerdocio kuimbaʼekuéra rrása negra ascendencia africana-vape. Tupao jehaipyrekuéra nomombeʼu porãi moõpa oñemoñepyrũ ko jepokuaa. Tupao lider-kuéra ogueroviákuri tekotevẽha peteĩ rrevelasiõ Tupãgui oñemoambue hag̃ua ko jepokuaa ha ohekákuri mboguata ñemboʼe rupive. Upe rrevelasiõ oúkuri Tupao Presidente, Spencer W. Kimball-pe, ha oñemoañetékuri ambue Tupao lider-kuérape, Salt Lake City-pegua Témplope, junio 1ro., 1978-pe. Pe rrevelasiõ oipeʼa opa rrestrisiõ rrása reheguáva, peteĩ ára oñemoĩvaʼekue sacerdocio-pe.
Oñemog̃uahẽtavape g̃uarã:
Setiembre 30, 1978-pe, Jesucristo Tupao Santokuéra Ara Pahapegua Conferencia General Semestral Número 148-pe, Presidente N. Eldon Tanner, Tupaogua Presidencia General Primer Consejero, opresentákuri kóva:
Ko junio ary ñepyrũme, pe Primera Presidencia omomarandúkuri Presidente Spencer W. Kimball ohupytyhague peteĩ rrevelasiõ oipysóva sacerdocio ha templo pegua jehovasakuéra opa kuimbaʼe haʼéva Tupao miembro hekojojávape. Presidente Kimball ojerurékuri chéve aikuaauka hag̃ua conferencia-pe, haʼe ohupyty rire ko rrevelasiõ, ouvaʼekue chupe heta jepyʼamongeta ha ñemboʼe rire, témplo kotykuéra marangatúpe, haʼe opresentahague ikonseherokuérape, omboaje ha omoneĩvaʼekue upéva. Upéi oñepresentákuri Umi Dóse Apóstol Kórumpe, peteĩ ñeʼẽme omboajéva ha, upe rire, oñepresentákuri opa ambue Autorida Heneralpe, upéicha avei omboajevaʼekue peteĩ ñeʼẽme.
Presidente Kimball ojerurékuri chéve koʼág̃a amoñeʼẽ hag̃ua ko kuatia:
Junio 8, 1978
Opa Jesucristo Tupao Santokuéra Ára Pahapegua oficial general ha local múndo jerereguápe:
Hermano-kuéra Pejehayhuetéva:
Rohechávo Ñandejára rembiapo ñemosarambi yvy ári, roñandúkuri aguyje rohechávo heta tetãygua ombohovaihague evanhélio rrestaurádo mensáhe, ha heta hetave ojoaju Tupaóre. Kóva, upe jave, oreʼispirákuri roikuaveʼẽse hag̃ua, peteĩteĩ Tupao miembro hekojojávape, opa priviléhio ha jehovasa evanhélio omeʼẽva.
Roikuaávo umi promesa Tupao proféta ha presidente-kuéra ñanemboyvegua heʼivaʼekue, peteĩ árape, Tupã plan ijapyraʼỹvape, opa ñande hermano-kuéra hekojojáva ikatutaha ohupyty pe sacerdocio, ha rohechávo umi noñemeʼẽivape sacerdocio hekojojaha, rojerureʼasýkuri are ha jesarekópe koʼãva, ñane hermano-kuéra ijeroviarekóvare, ha rohasákuri heta aravo Témplo koty yvateguápe, rojerureʼasývo Ñandejárape guía divína.
Haʼe ohendúkuri ore ñemboʼe, ha rrevelasiõ rupive omoañetékuri og̃uahẽmaha upe ára aréma oñeprometevaʼekue, opa kuimbaʼe ijeroviarekóva ha Tupao miembro hekojojáva, ohupytytaha upe santo sacerdocio, puʼaka reheve omombaʼapo hag̃ua ijautorida divína, ha oguerovyʼa hag̃ua hapicha ohayhúvandi opa jehovasa pévagui oúva, témplo jehovasa jepeve. Upéicha, ikatu oñemeʼẽ upe sacerdocio opa kuimbaʼe haʼévape Tupao miembro hekojojáva, oñemaʼẽʼỹre ni irrása ni iʼcolor-re. Oñehekomboʼe sacerdocio lider-kuérape, oʼentrevista porã hag̃ua opa kandidáto oñemeʼẽtavape, tahaʼe sacerodocio Aarónico térã Melquisedec, ojeʼasegura hag̃ua okumplipahína umi apoukapy oñemoĩvaʼekue ojeikuaa hag̃ua hekojojápa.
Marangatúpe romomarandu, Ñandejára koʼág̃a oikuaaukaha hembipota opa taʼyrakuéra ojehovasa hag̃ua, opa tetãme, ojapysaka hag̃ua hembiaguaikuéra ojeʼautorisapyréva ñeʼẽpúre, ha oñembosakoʼi ohupyty hag̃ua opa evanhélio jehovasa.
Añetete,
Spencer W. Kimball
N. Eldon Tanner
Marion G. Romney
Primera Presidencia
Jahechakuaávo Spencer W. Kimball-pe, Proféta, Techapahára ha Revelador-ramo, ha Jesucristo Tupao Santokuéra Ára Pahapegua Presidente, oñepropone, ñande, asamblea constituyente-ramo, ñamboaje ko rrevelasiõ Ñandejára ñeʼẽ ha hembipota ramo. Opa oĩva a favor, tohechaukami omopuʼãvo ipo asu. Oimeraẽ oñeoponéva, tohechauka upéicha avei.
Vóto proposisiõ mboyveguávape haʼékuri peteĩñeʼẽmegua.
Salt Lake City, Utah, setiembre 30, 1978-pe.