Sección 78
Rrevelasiõ oñeme’ẽva’ekue José Smith upe Proféta rupive, Kirtland, Ohio-pe, marzo 1, 1832-pe. Upe ára, proféta ha ambue líder-kuéra oñembyaty’akue oñemongeta hag̃ua umi Tupao rembiapóre. Ko rrevelasiõ ohekombo’e ñepyrũ profétape, Sidney Rigdon ha Newel K. Whitney-pe, oje’ói hag̃ua Misuri-pe, ha omohenda hag̃ua tupaogua mercantil ha editorial rembiapo, peteĩ “firma” apo rupive, ohechátava umíva umi tembiapo, ha oguerútava fóndo, Sion oñemoĩ hag̃ua, ha umi imboriahúva ñeimeporãrã. Upe firma, ojeikuaáva Firma Unida ramo, oñemohendákuri Abril 1832-pe, ha oñembopaha 1834-pe (tojehecha sección 82). Mbovy ára oñembopaha rire, ha José Smith poguýpe, upe frase “umi almasẽ rehegua imboriahúvape g̃uarã” omyengovia “establecimientos mercantiles ha editoriales-pe”, upe rrevelasiõme, ha ñe’ẽ “orden” oñemoĩ “firma” rangue.
1–4, Santokuéra omohenda ha omoĩva’erã peteĩ almasẽ; 5–12, Imba’erepykuéra jeporu arandúpe oporogueraháta salvasiõme; 13–14, Tupao isãsova’erã umi yvy arigua pu’akágui; 15–16, Miguel (Adán) oservi Imarangatuetéva (Cristo) ñeisãmbyhy guýpe; 17–22, Ojehovasapyre umi ijeroviarekóva, ha’ekuéra ohupytýtagui jehejapyre ramo opa mba’e.
1 Ñandejára oñe’ẽ’akue José Smith, upe ta’ýrape, he’ívo: Pejapysaka cherehe, he’i Ñandejára pende Tupã, peẽ peñeordenava’ekue che tupao sumo sacerdocio-pe, ha peñembyaty’akue oñondive;
2 Ha pehendu upe yvatégui pene ordenava’ekue ñemoñe’ẽ, oñe’ẽtava pende apysápe umi arandu ñe’ẽ, pejuhu hag̃ua salvasiõ upe mba’e pemoĩva’ekue che renondépe, he’i Tupã Ñandejára.
3 Añetehápe Che ha’égui peẽme, og̃uahẽma ára ha hi’ãguíma; ha péina ápe, péicha tekotevẽ oĩ peteĩ che tavayguakuéra ñemohenda, oñeisãmbyhývo ha oñemoĩporãvo umi mba’e almasẽ rehegua, che tavayguakuéra apytépe imboriahúvape g̃uarã, ko tendápe ha Sion retãme avei—
4 Peteĩ opa’ỹva ha ijapyra’ỹva ñemohenda ha ñemoĩmbyre che tupaópe g̃uarã, pemboguata hag̃ua pe káusa peñañuãva’ekue, yvypóra salvasiõrã, ha pende Ru Yvágape oĩva gloriarã;
5 Peteĩchapa hag̃ua umi mba’e yvagagua ñembojoajúpe, héẽ, ha umi mba’e yvy ariguápe avei, pehupyty hag̃ua umi mba’e yvagagua.
6 Napeteĩchapáiramo umi mba’e yvy ariguápe, ndaikatúi peteĩchapa pehupytývo umi mba’e yvagagua;
7 Peipotáramo Che ame’ẽ peẽme peteĩ tenda múndo celestial-pe, tekotevẽ peñembosako’i pejapóvo umi mba’e Che amanda ha ajerureva’ekue peẽme.
8 Ha ko’ág̃a, añetehápe péicha he’i Ñandejára, iporã peẽ, peiméva guive ko orden-pe, pejapo opa mba’e che gloriarã;
9 Térã, ambue ñe’ẽme, toguapy konsíliope che rembiguái Newel K. Whitney ha che rembiguái José Smith, upe ta’ýra, ha che rembiguái Sidney Rigdon, santokuéra Sion-pe oĩva ndive;
10 Upeicha’ỹramo, Satana oñeha’ã ombojere añeteguágui umi ikorasõ, ombohecha’ỹ hag̃ua chupekuéra, ha noikũmbýi hag̃ua umi mba’e oñembosako’íva chupekuéra g̃uarã.
11 Upévare, Che ame’ẽ peẽme tambiapoukapy, peñembosako’i ha peñemohenda hag̃ua, peteĩ ñembojoaju térã konvénio opave’ỹva rupive, ikatu’ỹva ojejapyhara.
12 Ha pe ojapyharávagui ojepe’áta ikárgo ha ijestádo tupaópe, ha oñeme’ẽta umi Satana tovajepetépe rredensiõ ára peve.
13 Péina ápe, kóva ha’e ñembosako’i Che pombosako’iva reheve, ha ñemopyenda ha tembiecharã Che ame’ẽva peẽme, ikatutaha rupive pekumpli tembiapoukapykuéra oñeme’ẽva peẽme.
14 Ikatu hag̃uáicha che ñeñangareko rupive, taha’e ha’éva umi jeiko’asy oúva pende ári, pe tupao taisãso mayma ambue tekovekuéragui múndo celestial guýpe;
15 Pejupi hag̃ua pehupyty peve koróna oñembosako’íva peẽme g̃uarã, ha peñemoĩ hag̃ua sãmbyhyhára heta rréino ári, he’i Tupã Ñandejára, Sion-gua Imarangatuetéva, pe omoĩva’ekue Adán-ondi-Ahmán ñemopyendakuéra;
16 Upe ohenoiva’ekue Miguel-pe pene Príncipe-rã, ha omohendava’ekue ipy, ha omoĩva’ekue chupe yvate, ha ome’ẽva’ekue chupe salvasiõ llavekuéra, pe Imarangatuetéva ñemoñe’ẽ ha ñeisãmbyhy guýpe, ndoguerekóiva ára ñepyrũmby ni tekove paha.
17 Añetehápe, añetehápe, Che ha’e peẽme, peẽ ningo mitã michĩ, ha ne’ĩra gueteri peikũmby umi tuichaite jehovasa Túva oguerekóva ipópe, ha ombosako’iva’ekue peẽme g̃uarã;
18 Ha ndaikatúi pegueropu’aka opa mba’e ko’ág̃a; upevére, peñanima, Che poisãmbyhýtagui. Penemba’e upe rréino ha umi jehovasa ipypegua, ha penemba’e umi ára apyra’ỹmegua rrikésa.
19 Ha pe omog̃uahẽva opa mba’e aguyjerekópe ojeglorifikáta; ha oñeme’ẽvéta chupe umi mba’e ko yvygua, jepeve cien jeyve, héẽ, ha hetave.
20 Upévare, pejapo umi mba’e Che amandava’ekue peẽme, he’i pene Redentor, uvei Ta’ýra Ahmán, upe ombosako’íva opa mba’e pendegueraha mboyve;
21 Peẽ ha’égui pe Primohénito tupao, ha ha’e penderupíta peteĩ araípe, ha ome’ẽta opa tekovépe imba’erãva.
22 Ha upe ha’éva majordómo ijeroviareko ha iñarandúva ohupytýta jehejapyre ramo opa mba’e. Amén