Sección 28
Rrevelasiõ oñeme’ẽva’ekue José Smith upe Proféta rupive, Oliver Cowdery-pe, Fayette, Nueva York, Setiembre 1830-pe. Hiram Page, Tupaogua miembro, oguereko peteĩ ita ha he’i, upéva rupi ohupytyha rrevelasiõ, Sion ñemopu’ã ha Tupao órdenpe g̃uarã. Ko’ã mba’e ombotavy heta miembro-pe, ha Oliver Cowdery jepe ojegueraha vai. Peteĩ conferencia ojejapo mboyvemi, pe Proféta, ipy’aite guive oporandu Ñandejárape ko mba’e rehe ha ohupyty ko rrevelasiõ.
1–7, José Smith oguereko umi ñemimby llavekuéra, ha ha’e añónte ohupyty Tupaópe g̃uarã rrevelasiõ; 8–10, Oliver Cowdery ombo’eva’erã Lamanita-kuérape; 11–16, Satana ombotavy Hiram Page-pe ha ome’ẽ chupe umi rrevelasiõ añetegua’ỹva.
1 Péina ápe, Oliver, Che ha’e ndéve, oñeme’ẽtaha pe tupao tanerendu opaite mba’e rembo’évape chupekuéra pe Moangapyhyhára rupive, umi rrevelasiõ ha tembiapoukapy che ame’ẽva’ekue rehegua.
2 Ha katu, péina ápe, añetehápe, añetehápe, Che ha’e ndéve, avave noñehenoimo’ãi ohupyty hag̃ua tembiapoukapy ha rrevelasiõ ko tupaópe, ndaha’éiramo che rembiguái José Smith, upe ta’ýra, ha’e ohupytýtagui Moiséicha jepe.
3 Ha nde neñe’ẽrenduva’erã umi mba’e chupe ame’ẽtavare, Aarón-cha jepe, Tupaópe remombe’u hag̃ua jeroviarekópe umi tembiapoukapy ha rrevelasiõ, pu’aka ha autorida reheve.
4 Ha oimeraẽ ára pe Moangapyhyhára oñandukáramo reñe’ẽ térã rembo’e hag̃ua, térã opa ára tembiapoukapy rupive, pe tupaópe, ikatu rejapo.
5 Ha katu nderehaimo’ãi tembiapoukapy, ha katu arandúpe rehaikuaa;
6 Ha neremandaiva’erã upe máva nde’ári omyakãvape, térã ha’éva pe tupao akã;
7 Che ame’ẽgui chupe umi ñemimby llavekuéra, ha umi rrevelasiõ ojesellapyréva, Che ahenói peve chupekuéra ambuéva hendaguépe.
8 Ha ko’ág̃a, péina ápe, che ha’e ndéve rehotaha Lamanita-kuérape ha rembo’éta chupekuéra che evanhélio; ha omog̃uahẽramo hikuái ne mbo’epykuéra, remopu’ãukáta che tupao ijapytepekuéra; ha reguerekóta umi rrevelasiõ, ha katu ani rehai umíva tembiapoukapy rupive.
9 Ha ko’ág̃a, péina ápe, che ha’e ndéve ndojehechaukaihague, ni avave yvypóra ndoikuaaiha moõpa oñemopu’ãta Sion tavaguasu, ha katu oñeme’ẽta tenondeve. Péina ápe, che ha’e ndéve ha’etaha umi yvy rembe’y Lamanita-kuéra ypýpe.
10 Neresẽmo’ãi ko tendágui térã pe conferencia rire; ha pe conferencia ñe’ẽ rupive, che rembiguái José oñehenóita opresidi hag̃ua upéva, ha pe ha’e he’íva ndéve, péva eréta.
11 Ha avei, tereho nde joyke’y, Hiram Page ndive, nde ha ha’e peneañoháme, ha eréta chupe umi mba’e ha’e ohaiva’ekue pe itágui ndaha’eiha chemba’e, ha Satana ombotavyha chupe;
12 Ha péina ápe, noñeme’ẽigui chupe ko’ã mba’e, ni avavépe ko tupaópe noñeme’ẽmo’ãi mba’eve oñemoĩva tupao konveniokuérare.
13 Opa mba’e ojejapova’erãgui hekopete ha peteĩ ñe’ẽme tupaópe, jerovia ñembo’e rupive.
14 Ha reipytyvõta toñemoĩporã opa mba’e, tupao konveniokuérape oĩháicha, reje’ói mboyve Lamanita-kuéra apytépe.
15 Ha ojehechaukáta ndéve, ára resẽ guive, ára rejujey peve, mba’épa rejapova’erã.
16 Ha opa ára rejejurupe’áta, remomarandúvo vy’apavẽ púpe che evanhélio. Amén