Sección 57
Rrevelasiõ oñeme’ẽva’ekue José Smith upe Proféta rupive, Sion, Jackson kondádo, Misuri-pe, julio 20, 1831-pe. He’iháicha Ñandejára rembiapoukapýpe oho hag̃ua Misuri-pe, Ha’e oikuaaukatahápe “pende yvy jehejapyre” (sección 52), élder-kuéra oje’óikuri Ohio-gui, Misuri kuarahyreike rembe’ýpe. José Smith ojepy’amongeta lamanita-kuéra rekovekuére ha oñeporandu: “Araka’épa umi yvyty rrósaicha ipotyjeráta? Araka’épa oñemopu’ãta Sion iglóriape, ha moõpa oñemoĩta Ne témplo, outahápe opa tetãnguéra umi ára pahápe?”. Uperire, oñeme’ẽva’ekue chupe ko rrevelasiõ.
1–3, Independence, Misuri, ha’e Sion renda ha témplo rendag̃ua; 4–7, Santokuéra ojoguava’erã umi yvy ha ohupyty jehejapyre upe tendápe; 8–16, Sidney Gilbert omoĩva’erã peteĩ almasẽ, William W. Phelps ha’éta impresor, ha Oliver Cowdery omyatyrõ ha ombosako’iva’erã umi mba’e oñeguenohẽ hag̃ua.
1 Pejapysaka, O che tupaogua élder-kuéra, he’i Ñandejára pende Tupã, peẽ, peñembyatyva’ekue ko tetãme, he’iháicha che rembiapoukapýpe, ha’éva Misuri retã, ha’éva tetã Che ahechauka ha akonsagrava’ekue santokuéra ñembyatyrã.
2 Upévare, kóva ha’e pe yvy ñe’ẽme’ẽngue, ha tavaguasu Sion rendag̃ua.
3 Ha péicha he’i Ñandejára pende Tupã, kóvape oĩ arandu, pemog̃uahẽséramo. Péina ápe, tenda ko’ág̃a ojeheróva Independence ha’e pe tenda mbyte; ha témplo rendag̃ua opyta kuarahyreike gotyo, peteĩ yvy pehẽgue namombyrýiva husgádogui.
4 Upévare, iñarandu santokuéra tojogua pe yvy, ha avei opa yvy kuarahyreike gotyogua, jepe pa’ũ ohasáva hudío ha hentilkuéra mbyte rupi.
5 Ha avei opa yvy pehẽngue ñu rembe’ypegua, che discípulo-kuéra ikatuha peve ojogua umi yvy. Péina ápe, kóva iñarandu, ojogua hag̃ua hikuái jehejapyre ijapyra’ỹvaramo.
6 Ha topyta che rembiguái Sidney Gilbert upe kárgo Che ahenói haguépe, ombyaty hag̃ua pirapire, ha’e hag̃ua tupao ahénte, ojogua hag̃ua yvy opa umi tenda jerereguápe, ojejapóma guive tekojojápe, ha arandu ohechaukaháicha.
7 Ha topyta che rembiguái Edward Partridge kárgo Che ahenói haguépe, ha tomboja’o santokuérape umi ijehejapyre, jepeve Che amanda haguéicha; ha avei umi ha’e ohenoiva’ekue oipytyvõ hag̃ua chupe.
8 Ha avei, añetehápe Che ha’e peẽme, toiko che rembiguái Sidney Gilbert ko tendápe, ha tomoĩ peteĩ almasẽ, ovende hag̃ua temiñemunguéra japu’ỹme, ha ohupyty hag̃ua pirapire, ojogua hag̃ua yvy santokuéra ñeimeporãrã, ha ohupyty hag̃ua opa mba’e che discípulo-kuéra oikotevẽva, opyta hag̃ua umi ijehejapyrépe.
9 Ha avei, toguenohẽ peteĩ licencia che rembiguái Sidney Gilbert—péina ápe, kóvape oĩ arandu, ha pe omoñe’ẽva, toikũmby—oguerahauka hag̃ua avei temiñemu umi tetãyguápe, jepe umi ha’e he’íva rupive, mba’apohára chupe oipytyvõva ramo;
10 Ha péicha tome’ẽ che santokuérape g̃uarã, oñembo’e hag̃ua che evanhélio umi oĩva pytũmbýpe ha tenda ñemano’ãme.
11 Ha avei, añetehápe Che ha’e peẽme, toiko ko tendápe che rembiguái William W. Phelps, ha toñemoĩ tupaopegua impresor ramo.
12 Ha péicha, múndo omog̃uahẽramo umi ha’e ohaíva—kóvape oĩ arandu—tohupyty tekojojápe upe ha’e ikatúva, santokuéra ñeimeporãrã.
13 Ha toipytyvõ chupe che rembiguái Oliver Cowdery, jepeve Che amanda haguéicha, oimeraẽ tenda Che ha’ehápe chupe, okopia, omyatyrõ ha oiporavo hag̃ua, opa mba’e ijoja hag̃ua che renondépe, Espíritu ohechaukaháicha ha’e rupive.
14 Ha péicha tou toiko Sion retãme umi Che añe’ẽ haguégui, pya’e ikatuháicha, hogayguakuéra ndive, ojapo hag̃ua ko’ã mba’e, jepe Che añe’ẽ haguéicha.
15 Ha ko’ág̃a, upe ñembyatyrãre—Pe obispo ha upe ahénte tojapo ñembosako’i umi ogayguakuéra oje’eva’ekuépe ou hag̃ua ko tetãme, ikatumi vovénte, ha toñemoĩ chupekuéra ijehejapyrépe.
16 Ha tenondeve oñeme’ẽvéta tekombo’e elder ha miembro-kuéra rembyrépe. Taupéicha. Amén.