Sección 7
Rrevelasiõ oñeme’ẽva’ekue José Smith upe proféta ha Oliver Cowdery-pe, Harmony, Pensilvania, Abril 1829-pe, oporandúrõguare Urim ha Tumim rupive, Juan, pe discípulo ojehayhuetéva, opytápara’e hetépe térã omanóra’e. Upe rrevelasiõ ha’e peteĩ versiõ oñembohasapyre, pe ñemombe’u Juan ohaiva’ekuégui peteĩ pergamíno-pe, ha ha’ete oñomiva’ekue.
1–3, Juan pe Ojehayhuetéva oikovéta Ñandejára ou peve; 4–8, Pedro, Santiago ha Juan oguereko evanhélio llavekuéra.
1 Ha Ñandejára he’i chéve: Juan, pe ahayhuetéva, mba’e reipota? Pe rejeruréva, oñeme’ẽtagui ndéve.
2 Ha che ha’e chupe: Ñandejára, eme’ẽ chéve pu’aka ñemano ári, aikove ha agueru hag̃ua ndéve angakuéra.
3 Ha Ñandejára he’i chéve: Añetehápe, añetehápe, ha’e ndéve, kóva reipota haguére, repytáta che aju peve che glóriape, ha reprofetisáta umi tetã, avaretã, ñe’ẽ ha tavaygua renondépe.
4 Ha péva rupi Ñandejára he’iva’ekue Pedro-pe: Aipotáramo ha’e opyta Che aju peve, mba’éiko ndéve upéva? Ha’e ogueruségui angakuéra chéve g̃uarã, ha nde katu pya’e rejuséma che rendápe che rréinope.
5 Ha’e ndéve, Pedro, kóva ha’ékuri potapy porã; ha katu pe ahayhuetéva ojaposevékuri, térã, peteĩ tembiapo tuichavéva jepe yvypóra apytépe, upe ko’ág̃a peve ojapova’ekuégui.
6 Héẽ, ha’e omotenonde peteĩ tembiapo tuichavéva; upévare, ajapóta chugui tata rendýicha ha peteĩ ánhel ministrante ramo; ha’e oministráta umi salvasiõ eredéro ñeimeporãrã, umi yvy ári oikovéva.
7 Che ajapoukáta nde tereministra ha’e ha nde ryke’y Santiago ñeimeporãrã; ha peẽ mbohapýpe ame’ẽta ko pu’aka ha ko ministério llavekuéra che aju peve.
8 Añetehápe Che ha’e peẽme, mokõivévape oñeme’ẽta peipotaháicha, mokõivéva pevy’águi umi peipotava’ekuépe.