Sección 8
Rrevelasiõ oñeme’ẽva’ekue José Smith upe Proféta rupive, Oliver Cowdery-pe, Harmony, Pensilvania-pe, Abril 1829-pe. Mormón Kuatiañe’ẽ oñembohasa aja, Oliver, oipytyvõnteva ohóvo haihára ramo, ohaívo pe Proféta he’íva, oñandu oñembyaoseha ñembohasa don reheve. Ñandejára ombohovái ijerure’asy ome’ẽvo chupe ko rrevelasiõ.
1–5, Rrevelasiõ ou Espíritu Santo pu’aka rupive; 6–12, Umi Tupã ñemimby jeikuaa ha pu’aka oñembohasa hag̃ua jehaipyrekuéra yma, ou jerovia rupive.
1 Oliver Cowdery, añetehápe, añetehápe, Che ha’e ndéve, Ñandejára oikoveháicha, ha’éva nde Tupã ha ne Redentor, katuete rehupytýta kuaapy, jepeve oimeraẽ mba’e rejerurévagui chéve, jerovia reheve, korasõ japu’ỹme, regueroviávo rehupytytaha kuaapy umi jahaipyre ymágui, heta ary guaréva, oguerekóva umi che escritura pehẽngue oñeñe’ẽhague che Espíritu jehechauka rupive.
2 Héẽ, péina ápe, Che añe’ẽta ndéve ne akã ha ne korasõme, Espíritu Santo rupive, oguejýtava nde ári ha opytátava ne korasõme.
3 Ko’ág̃a, péina ápe, kóva ha’e pe rrevelasiõ espíritu; péina ápe, kóva ha’e pe espíritu Moisés omboguatahague rupi Israel ra’ykuérape Mar Rojo rupive yvy ikãva ári.
4 Upévare, kóva ha’e ne don; eiporu ha rejehovasáta, nemosãsótagui umi nderayhu’ỹva pógui, upeicha’ỹramo, ndejukáta hikuái ha ogueraháta ne ánga ñehundípe.
5 O, nemandu’áke ko’ã ñe’ẽre, ha eñongatu umi che rembiapoukapy. Nemandu’áke, kóva ha’e ne don.
6 Ko’ág̃a, ndaha’éi kóva añónte ne don; eguerekógui ambue don, ha’éva Aarón don; péina ápe, ohechaukava’ekue ndéve heta mba’e;
7 Péina ápe, ndaipóri ambue pu’aka, ndaha’éiramo Tupã pu’aka, ikatúva ojapo ko Aarón don toĩ nendive.
8 Upévare, ani ndepy’aheta, ha’égui Tupã don; ha reguerekóta nde pópe, ha rejapóta tembiapo hechapyrãva; ha mba’evéichagua pu’aka oipe’áta nde pógui, ha’égui Tupã rembiapo.
9 Ha, upévare, oimeraẽ mba’e rejeruréva chéve ha’e hag̃ua ndéve, upéva rupi, ame’ẽta ndéve, ha rehupytýta kuaapy upéva rehegua.
10 Nemandu’áke jerovia’ỹre ndaikatuiha rejapo mba’eve; upévare, ejerure jerovia reheve. Ani re’apo’i ko’ã mba’e; aníke rejerure pe rejerure’ỹva’erã.
11 Ejerure eikuaa hag̃ua umi Tupã ñemimby, ha ikatu hag̃ua embohasa ha ehupyty kuaapy opa umi jehaipyre yma oñeñomiva’ekuégui, imarangatúva; ha rejeroviaháicha ojejapóta ndéve.
12 Péina ápe, Che pe añe’ẽva’ekue upéva; ha chete pe añe’ẽva’ekue ndéve iñepyrũmby guive. Amén