Sección 60
Rrevelasiõ oñeme’ẽva’ekue José Smith upe Proféta rupive, Independence, Jackson kondádo, Misuri-pe, agosto 8, 1831-pe. Upe ára umi elder oje’oiva’ekue Jackon kondádope, ha oĩva’ekue pe yvy ha pe témplo rendag̃uáme ojededikárõ guare, oikuaase mba’épa ojapova’erã hikuái.
1–9, Élder-kuéra ombo’eva’erã pe evanhélio umi iñañáva atýpe; 10–14, Ndahekoreiriva’erã hikuái, ni noñomirĩva’erã italentokuéra; 15–17, Ha’ekuéra ikatu ojepyhéi testimónio ramo umi ombotovéva evanhélio rehe.
1 Péina ápe, péicha he’i Ñandejára itupaogua élder-kuérape, umi pya’e oho jeyva’erã upe tetã ou haguégui: Péina ápe, chembovy’a pejuhague ko’ápe;
2 Ha katu oĩ máva Che ndaguerohorypáiva, ndojejurupe’aséigui, ha katu oñomi pe talénto Che ame’ẽva’ekue chupekuéra, okyhyje rupi yvypóragui. Áina ko’ãva, hendýgui che pochy hesekuéra.
3 Ha ojehúta, ndaijeroviarekovéimarõ hikuái cherehe, jepeve umi orekóva, ojepe’áta chuguikuéra.
4 Che, Ñandejára, arreinágui yvágape, ha umi ehésito yvy arigua apytépe; ha ára Che ambyaty vove oñondivepa umi che jeguaka, opa tekove oikuaáta mba’épa ohechauka pe Tupã pokatu.
5 Ha katu, añetehápe, Che añe’ẽta peẽme pende je’ói rehe upe tetã peju haguégui. Tojejapo térã tojejogua peteĩ ygára, peẽme oĩporaháicha, peteĩchante chéve, ha peje’ói pya’e, tenda hérava Saint Louis-pe.
6 Ha toje’ói che rembiguaikuéra Sidney Rigdon, Joseph Smith, upe ta’ýra, ha Oliver Cowdery, upe guive Cincinnati peve;
7 Ha tohupi iñe’ẽpu ko tendápe ha tomombe’u che ñe’ẽ ñe’ẽpu hatãme, ñeko’õi ha py’amokõi’ỹre, ohupívo hi’arikuéra po marangatu. Che ikatúgui ajapo pendehegui sánto, ha oñeperdona peẽme pene angaipakuéra.
8 Ha tosẽ ambuekuéra Saint Louis-gui, mokõi mokõi, ha tombo’e upe ñe’ẽ, ndaha’éi pya’épe, umi iñañáva aty apytépe, oho jey peve hikuái umi tupao ou haguégui.
9 Ha opa ko’ãva tupaokuéra ñeimeporãrã; upevarã Che amondova’ekue chupekuéra.
10 Ha che rembiguái Edward Partridge tome’ẽ pirapire Che ame’ẽva’ekuégui chupe, peteĩ pehẽngue che élder-kuérape, umi oñemandava’ekuépe ou jey hag̃ua.
11 Ha pe ikatúva, tome’ẽ jey pe ahénte rupive; ha pe ndaikatúivape, ndojejeruremo’ãi.
12 Ha ko’ág̃a Che añe’ẽ umi oútavare ko tetãme.
13 Péina ápe, oñembou’akue chupekuéra ombo’e hag̃ua che evanhélio umi aty iñañáva apytépe; upévare, Che ame’ẽ chupekuéra ko tembiapoukapy: Ndereiporuvaimo’ãi nde ára, ni nereñomimo’ãi ne talénto ani hag̃ua ojekuaa.
14 Ha rejupi rire Sion retãme, ha remomarandu rire che ñe’ẽ, pya’e reju jeýta, remombe’úvo che ñe’ẽ umi aty iñañáva apytépe, ndaha’éi pya’épe, ni ñeko’õi ni ñorairõme.
15 Ha reityvyróta pe yvytimbo nde pýgui umi nanemog̃uahẽiva rehe, ndaha’éi hovakekuéra, ani rembopochy chupekuéra, ha katu ñemiháme; ha ejohéi umi nde py, testimónio ramo hesekuéra huísio árape.
16 Péina ápe, kóva iporãntema peẽme, ha ha’e upe penembou’akue rembipota.
17 Ha che rembiguái José Smith, upe ta’ýra juru rupive, ojekuaaukáta Sidney Rigdon ha Oliver Cowdery rehegua. Upe hembýva, tenondeve. Taupéicha. Amén.